bwiza.com
Ahabanza » RDC: Martin Fayulu yasabye ko amatora yasubirwamo mu gihe kitarenze amezi atandatu
Amakuru Politiki

RDC: Martin Fayulu yasabye ko amatora yasubirwamo mu gihe kitarenze amezi atandatu

Nyuma y’aho inzira zose yitabaje muri Congo zitagize icyo zitanga, Martin Fayulu watsinzwe na Felix Tshisekedi mu matora yo kuwa 30 Ukuboza, yahamagariye Afurika Yunze Ubumwe gushyiraho komite idasanzwe igomba kugenzura ukuri kw’aya matora ndetse no gusubirishamo amatora mu gihe kitarenze amezi atandatu.

Ni mu ibaruwa yohereje kuwa 08 Gashyantare Jeune Afrique dukesha iyi nkuru yabashije kubona kopi yayo, Martin Fayulu yasabiyemo ko amatora y’umukuru w’igihugu, ay’abadepite n’ay’abayobozi b’intara yasubirwamo mu gihe kitarenze amezi atandatu.

Uyu mukandida watsinzwe mu matora y’umukuru w’igihugu muri Repubulika iharanira Demokarasi ya Congo yo kuwa 30 Ukuboza 2018 ukomeje kwamagana intsinzi ya Felix Tshisekedi, yasabye abakuru b’ibihugu bya Afurika bari bateraniye mu nama ya 32 ya Afurika Yunze Ubumwe, gushyiraho komite idasanzwe igomba kugenzura ukuri kw’ibyavuye muri aya matora kugirango hamenyekane perezida wa nyawe w’iki gihugu ndetse n’abadepite ba nyabo batowe.

Ni mu gihe umuryango wa Afurika Yunze Ubumwe kuri uyu wa 10 Gashyantare wagaragaje ko watambutse ipaji y’amatora yo muri Congo ugena Felix Tshisekedi nka visi perezida w’umuryango, ariko Fayulu agashimangira ko uyu muryango uzi neza ko Tshisekedi atari we watowe n’abaturage.

Martin Fayulu mu ibaruwa ye akaba yashimangiye ko niba amatora adasubiwemo Abanyekongo batazongera kwizera amatora kandi bizagaragaza gutsindwa kwa demokarasi muri Congo.

 

 

Izindi wakunda

Bwiza.com
error: Alert: Ntabwo byemewe!!