bwiza.com
Ahabanza » Uganda: Col Ndahura uri mu bashinjwa gucyura ku ngufu impunzi z’Abanyarwanda yarekuwe 
Amakuru Politiki

Uganda: Col Ndahura uri mu bashinjwa gucyura ku ngufu impunzi z’Abanyarwanda yarekuwe 

Col Atwooki Ndahura, wahoze akuriye ishami ry’Igipolisi cya Uganda rishinzwe iperereza ku byaha akaba akurikiranweho ibyaha birimo gucyura ku ngufu impunzi z’Abanyarwanda, kuri uyu wa Mbere yarekuwe by’agateganyo n’Urukiko Rukuru rwa Gisirikare.

Col Ndahura akurikiranweho ibyaha birimo kunanirwa kurinda ibikoresho bya gisirikare  no gufasha abapolisi bagenzi be gucyura mu Rwanda ku ngufu impunzi z’Abanyarwanda.

Ubushinjacyaha buvuga ko hagati ya Gashyantare na Werurwe muri 2018, ku cyicaro cy’ishami rya polisi rishinzwe iperereza ku byaha I Bugolobi, muri Kampala, Col Ndahura yahimbye ikimenyetso cy’inyandiko irimo urutonde rw’impunzi z’Abanyarwanda isobanura ishimutwa ryabo no gucyurwa ku ngufu mu Rwanda.

Ikibazo cye ariko kiracyakurikiranwa n’ubushinjacyaha mu Rukiko Rukuru rwa Gisirikare leta iregamo abandi bagenzi be barimo, Gen Kale Kayihura, SCP Joel Aguma, SSP Nickson Agasirwe n’abandi barindwi nk’uko iyi nkuru dukesha Spyreports ikomeza ivuga.

Kuba nta cyaha kiramuhama kandi akaba arwaye, nibyo urukiko rwagendeyeho rumurekura by’agateganyo ku ngurane nk’uko byatangajwe na Perezida w’urukiko, Lt. Gen. Gutti.

Lt. Gen Gutti yavuze ko Col Ndahura agomba kujya yitaba urukiko rimwe mu kwezi kandi ko atemerewe kurenga Kampala n’uturere twa Wakiso. Naramuka arenze kuri aya mabwiriza ifungurwa rye ry’agateganyo rizavanwaho.

Col Ndahura umaze amezi hafi 8 afungiye mu kigo cya gisirikare cya Makindye areganwa n’uwahoze ari umukuru w’igipolisi, Gen Kale Kayihura kunanirwa kurinda ibikoresho bya gisirikare no kugira uruhare mu gucyura impunzi z’Abanyarwanda ku ngufu.

Yasabye urukiko kuba rumurekuye ashingiye ku mpamvu zitandukanye zirimo ikibazo cy’umuvuduko w’amaraso avuga ko adashobora kuvurwa afunze.

 

Izindi wakunda

Bwiza.com
error: Alert: Ntabwo byemewe!!