bwiza.com
Amakuru mu mahanga

Impunzi z’Abarundi ziri mu Rwanda, Tanzania, RDC na Uganda ziratabarizwa

Agashami k’Umuryango w’Abibumbye kita ku mpunzi (UNHCR) gatangaza ko hakenewe miliyoni 296 z’Amadolari ya Amerika zo kwita ku buzima bw’impunzi z’Abarundi ziri mu Rwanda, Tanzania, Uganda na Repubulika Iharanira Demokarasi ya Congo.

HCR yabitangarije abafatanyabikorwa bayo barimo imiryango mpuzamahanga iharanira uburenganzira bwa muntu, ku wa Gatandatu tariki ya 9 Gashyantare 2019, i Lusenda, ahari inkambi y’Abarundi muri Congo, Teritwari ya Fizi, muri Kivu y’Amajyepfo.

Nk’uko Radiyo Okapi ibitangaza, ngo hari mu nama ya mbere ibaye muri uyu mwaka wa 2019, yateguwe n’umuryango OCHA, HCR ndetse n’abandi bafatanyabikorwa.

Iyi nama ngo yari igamije gusubiza amaso inyuma hakarebwa ibikorwa byakozwe mu mwaka wa 2018,  ndetse bakagira ibyo bahinduramo bitagenze neza ari nako bategura imishinga izakorwa muri uyu mwaka wa 2019 bafasha impunzi z’Abarundi ziri mu nkambi ya Lusenda na Mulongwe muri teritwari ya Fizi.

HCR itangaza ko izi miliyoni zikenewe zizakoreshwa mu mishanga 35 muri uyu mwaka, irimo uw’uburezi, kurwanya ihohotera rishingiye ku gitsina rikorerwa abagore ndetse n’abana b’abakobwa,…

Iyi mishanga kandi ngo izagira ingaruka nziza ku barundi b’impunzi basaga ibihumbi 350 bari muri Tanzania, Rwanda, Uganda, ndetse na RDC.

Izi mpunzi ngo zikeneye ibiribwa, ibikoresho by’ishuri by’abana, iby’isuku, ubuzima, kurwanya ihohoterwa rikorerwa abagore n’abakorwa rikorwa rimwe na rimwe n’ababa barekereje inyuma y’inkambi aba barundi babarizwamo, basohotse inkambi bagiye gutashya,…

Izi mpunzi z’Abarundi ni izahunze mu mwaka wa 2015, ubwo mu Burundi havukaga imvururu za politiki zakuruwe no kwiyamamaza kuri manda ya Gatatu kwa Perezida Nkurunziza, abaturage bose batavuzeho rumwe.

Inkambi ya Lusenda na Mulongwe zibarizwamo impunzi z’Abarundi zisaga ibihumbi 30. Hamwe n’izindi ziri muri ibi bihugu byatangajwe haruguru zikaba zisaga ibihumbi 350, zifashwa na HCR n’indi miryango irimo CNR, AID, AIDES, ADES, WAR Child Hollande, ADRA, AIRD,…

 

Izindi wakunda

Bwiza.com