bwiza.com
Ahabanza » Indonesia: Umunyatanzaniya yafatiwe ku kibuga cy’indege yahishe ikiyobyabwenge mu nda
Amakuru Politiki

Indonesia: Umunyatanzaniya yafatiwe ku kibuga cy’indege yahishe ikiyobyabwenge mu nda

Umugabo ukomoka muri Tanzania yafatiwe ku Kibuga cy’indege cya Bali muri Indonesia afite ikiyobyabwenge cya methamphetamine gisaga ikilo yari yahishe mu nda nk’uko byatangajwe n’abayobozi kuri uyu wa Kabiri.

Abayobozi mu rwego rushinzwe abinjira n’abasohoka muri Indonesia bakunze gufatana abanyamahanga ibiyobyabwenge babyinjiza mu gihugu, bavuze ko uyu mugabo Abdul Rahman Asman yafatiwe ku Kibuga Mpuzamahanga cya Bali kuwa 30 Mutarama.

Ibyuma bya radiography na CT Scan byo ku kibuga cy’indege nibyo byavumbuye udupfunyika 99 twuzuyemo ifu y’umweru Asman yari yamize basanga dupima ikilo kirenga.

Ibi biyobyabwenge akaba ari byo kuri uyu wa kabiri byagaragarijwe itangazamakuru n’uwo babifatanye, Asman w’imyaka 42, yanambitswe impuzankano y’abagororwa.

Iyi nkuru dukesha ikinyamakuru Citizen cyo muri Tanzania iravuga ko hataramenyekana niba ubushinjacyaha buzasabira Asman igihano cy’urupfu, gusa igihugu cya Indonesia kizwiho kugira amategeko akarishye ahana ikwirakwizwa ry’ibiyobyabwenge, arimo no kurasirwa ku karubanda.

Biravugwa ko muri iki gihugu hari abacuruzi benshi b’ibiyobyabwenge bategereje igihano cy’urupfu barimo Umwongerezakazi n’Umunyamerika nabo bafatanywe methamphetamine, kandi ngo hari Abanyafurika benshi bakomoka mu burengerazuba bakatiwe igihano cy’urupfu kubera ibiyobyabwenge.

Umunyamerika Husein Ashadi Bahri w’imyaka 60 nawe akaba yarerekanwe mu kiganiro n’itangazamakuru nyuma yo gutabwa muri yombi amaze kuvumburwaho amagarama 45 y’urumogi yari yahishe muri keyboard ya mudasobwa. Uyu akaba ashobora guhanishwa igifungo kitarenze imyaka 15 naramuka ahamwe n’icyaha.

 

Izindi wakunda

Bwiza.com
error: Alert: Ntabwo byemewe!!