bwiza.com
Ahabanza » Uko ibikorwa byo kwibuka Jenoside yakorewe Abatutsi ku nshuro ya 25 bizakorwa
Amakuru Politiki

Uko ibikorwa byo kwibuka Jenoside yakorewe Abatutsi ku nshuro ya 25 bizakorwa

Mu kiganiro n’abanyamakuru kuwa Gatanu ushize, itariki 8 Gashyantare 2019, Umunyamabanga Nshingwabikorwa  wa Komisiyo y’Igihugu yo Kurwanya Jenoside (CNLG), Dr Bizimana Jean Damascene yavuze ko kwibuka ku nshuro ya 25 Jenoside yakorewe Abatutsi bizakorwa hibandwa ku rubyiruko. Ikiganiro cyabereye ku rwibutso rwa Jenoside rwa Kigali ku Gisozi.

Cyabanjirijwe n’inama n’abahagarariye imiryango y’abacitse ku icumu rya Jenoside yakorewe Abatutsi aho bunguranye n’Umunyamabanga Nshingwabikorwa wa CNLG ibitekerezo ku myiteguro yo kwibuka ku nshuro ya 25 Jenoside yakorewe Abatutsi kuhira ngo buri wese azagire uruhare mu migendekere myiza y’iki gikorwa.

Dr Bizimana  yavuze ko ikigamijwe ari ukugira ngo  urubyiruko rumenye neza uruhare rwabo mu  mu kurinda ko igihugu cysakongera gusubira mu mateka mabi cyanyuzemo. Yibukije ko insanganyamatsiko izakomeza ariKwibuka Twiyubaka  ( Remember – Unite – Renew).

Yagize ati: “urubyiruko nirwo tuzitaho cyane kubera ko abanyarwanda bari munsi y’imyaka 30 basaga 60 % by’Abanyarwanda bose. Urubyiruko rwacu rerousanga batazi amateka ya Jenoside cyangwa bayiziho dukeya”.

Ibikorwa byo kwibuka ku nshuro ya 25 Jenoside yakorewe Abatutsi bizashingira  ku bintu bine by’ingenzi birimo : kwibuka n’ubumwe n’ubwiyunge,ubutabera, kurwanya ihakana rya Jenoside no kubazwa inshingano.

Dr Bizimana yavuze kokubazwa inshingano Bifite aho bihurira cyane n’urugendo rwo kwiyubaka kandi bikaba Bifite aho bihurira cyane na Jenoside yakorewe Abatutsi.

Yagize ati “hari ibibazo bikigaragara kugeza uyu munsi; urugero hari ahari abacitse ku icumu batitabwaho uko bikwiriye kandi ababishinzwe bakwiriye kubibazwa”.

Imyiteguro irarimbanije

Imyiteguro yo kugira ngo kwibuka ku nshuro ya 25 Jenoside yakorewe Abatutsi irarimbanije mu gihugu hose. Bimwe mu bikorwa biteganyijwe harimoharimo gusura ababyeyi bagizwe incike na Jenoside batujwe mu nzu z’amasaziro zizwi nka Impinganzima. Iki gikorwa kizabera mu Turere twa Huye, Bugesera na Nyanza.

Ibindi bikorwa birimo ibikorwa by’ubukangurambaga byo byatangiye. Harimo kandi icyumweru cy’ubutabera kizatuma abantu bamenya amategeko y’igihugu arebana na Jenoside ndetse n’arebana n’ubumwe bw’Abanyarwanda.

Dr Bizimana yagize ati “abahawe ibihano n’Inkiko Gacaca barangije ibihano barimo bararekurwa ndetse n’abandi benshi bari hafi kurangiza ibihano byabo bakagaruka mu muryango Nyarwanda. Ni ngombwa rero ko abantu baganira ku buryo abo bantu bazasubizwa mu Muryango Nyarwanda kandi bakabana n’abandi.

Si ikintu cyoroshye ku muntu wacitse ku icumu kubona umuntu wamumariye umuryango hanze kandi atanazi igihe uwo muntu yafunguriwe. Ibi bishobora gutera ibibazo by’ihungabana. Dukwiriye rero kubivugaho. Aba bantu bakwiriye  kwitegura kubana n’abo babiciye imiryango”.

Uko ibikorwa biteganijwe

Kubijyanye n’ibikorwa biteganyijwe mbere ya tariki ya 7 Mata, usibye gusura ababyeyi bagizwe incike na Jenoside,

Tariki 16 Werurwe: hazasurwa imidugudu itatu  ituyemo abasirikare bamugariye ku rugamba rwo kubohora igihugu I Masaka, kinigi na Nyagatare. Aba basirikare bamugariye ku rugamba bafite umurage ukomeye ku rubyiruko rw’igihugu.

Tariki 30 Werurwe: hazakorwa umuganda wo gusukura inzibutso mu Turere twose tw’igihugu. Uzaba n’umwanya wo gushishikariza urubyiruko kwitabira ibikorwa byo kwibuka.

Tariki 3 Mata: hazabaho umwihererro w’urubyiruko ruturutse hirya no hino mu gihugu ndetse no muri diasporaaho bazahurira I Kigali bagasobanurirwa amateka y’igihugu cyabo ndetse n’uruhare rwabo mu kucyubaka.

Tariki ya 4 n’iya 5 Mata: Hazabaho inama mpuzamahanga kuri Jenoside.

Tariki ya 8 Mata: Hazabaho kumurika igice cyambere cy’umushinga w’ubusitani bw’urwibutso ku rwibutso rwa Jenoside rwa Nyzana, Kicukiro.

Tariki ya 9 n’iya 10: iyi minsi uko ari ibiri yahariwe kwibuka muri za Minisiteri, ibigo bya Leta n’ibyigenga. Buri rwego ruzajya ruhitamo umunsi umwe muri iyi ibiriabe ariwo bakoreraho igikorwa cyo kwibuka.

Tariki 11 Mata: Za ambasade n’imiryango mpuzamahanga ikorera I Kigali bazibukira ku rwibutso rwa Jenoside rwa Kigali ku Gisozi mu gitondo, nyuma ya saa sita bifatanye n’Abanyarwanda ku rwibutso rwa Jenoside rwa Nyanza, Kicukiro.

Tariki 12 Mata ni umunsi wahariwe kwibuka mu madini n’amatorero ndetse n’abandi bavuga rikijyana. Icyumweru cy’icyunamo kizasozwa tariki 13 Mata hibukwa by’umwihariko abanyapolitiki bishwe muri Jenoside yakorewe Abatutsi. Aho ibikorwa bizaba birimo kubera ku rwego rw’Akarere,hazabandwa cyane ku kuzirikana akamaro politiki nziza igira mu kubaka igihugu n’iterambere ryacyo.

Ibindi bikorwa byo kwibuka ku nshuro ya 25 Jenoside yakorewe Abatutsi birimo gusura inzibutso za jenoside zitandukanye hirya no hino mu gihugu zifite amateka yihariye arebana na Jenoside yakorewe Abatutsi. Iki gikorwa cyiswe “Kwibuka Tour” kizakorerwa ku nzibutso 10 hirya no hino mu gihugu kugira ngo abantu, cyane cyane urubyiruko babashe gusobanukirwa amateka ya Jenoside yakorewe Abatutsi mu duce izo nzibutso ziherereyemo.

Ku itariki ya 7 Mata, ku munsi wo gutangira icyumweru cy’icyunamo, hazashyirwa indabo ku rwibutso rwa jenoside rwa Kigali ku Gisozinyuma ibindi bikorwa bikomereze kuri Stade Amahoro.

Abanyarwanda mu midugudu bazahabwa ikiganiro kijyanye no kwibuka nyuma baze no gukurikira Ijambo nyamukuru ry’umukuru w’Igihugu. Nyuma ya saa sita hazabaho urugendo rwo kwibuka ruzatangirira ku ngoro y’Inteko Ishinga Amategeko rugana kuri Stade Amahoro ahazabera umugoroba wo kwibuka.

 

Izindi wakunda

Bwiza.com
error: Alert: Ntabwo byemewe!!