bwiza.com
Ahabanza » Kylian Mbappe avuga ko imvune ya Neymar na Cavani idakwiye gutera ubwoba abafana ba PSG
Amakuru Imikino

Kylian Mbappe avuga ko imvune ya Neymar na Cavani idakwiye gutera ubwoba abafana ba PSG

Rutahizamu Kylian Mbappe wa Paris Saint-Germain yasabye ko “inkuru za byacitse” kuko abakinnyi Neymar na Edinson Cavani bavunitse zahagarara, nyuma yaho iyi kipe itsinze Manchester United ibitego 2-0 mu mukino wa Champions League wabaye ku wa kabiri.

Ni umukino wabereye ku kibuga Old Trafford cya Manchester United.

Neymar na Cavani bombi ntibari muri uwo mukino Mbappe yatsinzemo igitego cya kabiri gikurikiye icya mbere cyinjijwe na Presnel Kimpembe.

Mbappe w’imyaka 20 y’amavuko yagize ati: “Ducyeneye guhagarika izi nkuru za byacitse. Abantu bakwiye kureka kugira ubwoba. Twabigaragaje iri joro [ku wa kabiri]. Tumeze neza”.

Byitezwe ko Neymar, ruhatizamu wa Paris Saint-Germain n’uw’ikipe y’igihugu ya Brezil, agaruka mu kibuga mu gihe kitari mbere nibura y’ukwezi kwa kane nyuma yo kuvunika igufa ryo ku kirenge.

Umunyamakuru w’Umufaransa Julien Laurens yabwiye ikiganiro cya BBC Radio 5 live ko hari ubwoba ko uyu mwaka w’imikino ushobora no kurangira Neymar atongeye gukina.

Cavani, rutahizamu w’iyi kipe n’uw’ikipe y’igihugu ya Uruguay, we yavunitse mu itako mu mpera y’icyumweru gishize, ariko ashobora kuzaba ameze neza agashobora gukina umukino wo kwishyura uzabera mu murwa mukuru Paris w’Ubufaransa ku itariki ya 6 y’ukwezi gutaha kwa gatatu.

Ariko Mbappe ni we kuri ubu umaze gutsinda ibitego byinshi kurusha abandi muri iyi kipe, aho igitego yatsinze Manchester United cyabaye icya 23 atsinze muri uyu mwaka w’imikino mu marushanwa yose.

Iki gitego cyabaye icya 14 yatsinze muri Champions League, kivuze ko yamaze kunganya ibitego n’ikirangirire mu mupira w’amaguru w’Ubufaransa, Zinedine Zidane.

Mbappe yagize ati: “Birumvikana Neymar ni ingenzi cyane na Cavani ni ingenzi kuri twe, ariko umupira w’amaguru ukinirwa mu kibuga kandi ibyo twabyerekanye uyu munsi [ku wa kabiri]”.

“Umupira w’amaguru w’Ubufaransa ugomba kugera kure hashoboka mu gikombe cy’Uburayi [cya Champions League]. Abantu bagomba kudushyigikira, tuzashyigikira Lyon [ikina na Barcelona] mu cyumweru gitaha”.

“Turishimye, ariko iki ni igice cya mbere muri uyu mukino kandi ducyeneye gukomeza kwitegura neza, kuko ntekereza ko mu minota 20 ya nyuma y’umukino twacitse intege gacye”.

Izindi wakunda

Bwiza.com
error: Ntibyemewe