bwiza.com
Ahabanza » Uganda: Haravugwa indi dosiye ishobora kurushaho guteza ibibazo Gen Kale Kayihura
Amakuru Featured Politiki

Uganda: Haravugwa indi dosiye ishobora kurushaho guteza ibibazo Gen Kale Kayihura

Uwahoze ari umukuru w’Igipolisi cya Uganda, Kale Kayihura, usanzwe afite urubanza atarakiranuka narwo mu Rukiko Rukuru rwa Gisirikare, yongeye gushyirwa mu majwi mu yandi mahano nyuma y’aho iperereza rihishuriye ko yasohoye mu buryo bunyuranyije n’amategeko akayabo ka miliyoni 500 z’amashilingi akagurira imodoka zihenze abahoze ari abunganizi be ba hafi mu gipolisi nta burenganzira yahawe n’Inama ya Polisi.

Amakuru aturuka mu gipolisi agera ku rubuga Spyreports dukesha iyi nkuru, aravuga ko ubwo aya makuru yageraga mu matwi y’uyoboye Igipolisi cya Uganda muri iki gihe, Martin Okoth Ochola, yahise ategeka umuyobozi ushinzwe iperereza ku byaha, AIGP Grace Akullo, guhita atangira iperereza no guta muri yombi abarebwa n’iki kibazo.

Bamwe mu bapolisi bakaba batangarije uru rubuga ko Gen Kale Kayihura ubwo yari agifite ububasha ku gipolisi nk’umukuru wacyo, yaguze imodoka icumi zihenze muri Chatta Motors, nyuma akazigabanya abapolisi bagera ku 10 bari inshuti ze nk’igihembo cy’akazi bamukoreraga. Bati: “Imodoka zose zaje mu mazina y’abapolisi icumi.”

Abapolisi bari mu iperereza bakaba bavuga ko kugeza ubu bamwe mu bakozi ba Chatta Motors bagize uruhare mu gutanga iizi modoka bamaze gukoreshwa inyandikomvugo ku cyicaro cya CID ahitwa Kibuli. Itsinda riri mu iperereza rikaba ryongeyeho ko hasigaye gutumiza abo bapolisi 10 bahawe izo modoka nabo bakabazwa, ndetse nyuma hakazahamagazwa Gen Kale Kayihura nawe akagira ibyo asobanura.

Umwe muu bari mu iperereza ati: “Mu mpera z’icyumweru gitaha turateganya kuzaba twasoje iperereza ryacu hanyuma twoherereze dosiye ubushinjacyaha ku nama zijyanye n’amategeko

Amakuru akaba akomeza avuga ko Gen Kale Kayihura n’abo bapolisi bashobora gushinjwa ruswa no gukoresha nabi imyanya yabo.

Ubwo yabazwaga kuri iki kibazo, Evert Bashaija, umuyobozi ushinzwe ubucuruzi muri Chatta Motors, yemeje ko bamwe mu bakozi ba Chatta Motors bahamagawe kuri CID bagakoreshwa inyandikomvugo.

Ati: “Icyo nakwemeza nuko bagenzi bacu bahamagawe I Kibuli bakagenda bagakora inyandikomvugo ariko sinababwira ibyo bavuze kubera ko ntari mpari.”

Gen Kale Kayihura akaba avugwaho ibi mu gihe agifite urubanza mu rukiko rwa gisirikare akurikiranwemo kunanirwa gucunga ibikoresho bya gisirikare no kugira uruhare mu gucyura ku ngufu impunzi z’Abanyarwanda we yakomeje gushimanagira ko yakoze mu buryo bwemewe n’amategeko kuko u Rwanda na Uganda bifitanye amasezerano yo guhererekanya abakurikiranweho ibyaha bahunze ubutabera.

 

 

Izindi wakunda

Bwiza.com