bwiza.com
Ahabanza » Bisangabagabo wakozwe ku mutima na jenoside yiyemeje kuvana mu bukene urubyiruko
Amakuru mu Rwanda

Bisangabagabo wakozwe ku mutima na jenoside yiyemeje kuvana mu bukene urubyiruko

Nyuma yo gusoza amashuri ye muri Kaminuza Nkuru y’ u Rwanda mu ishami ry’ Uburezi n’ Ubukungu mu mwaka wa 2008, Bisangabagabo Kimenyi Dieudonne wavutse mu 1979, yihaye intego yo gufasha urubyiruko kwihangira imirimo.

Mu rwego rwo kugera kuri iyi ntego yo gufasha urubyiruko,  Bisangabagabo yahise ashinga umuryango CSDI/Rwanda kugira ngo arwanye ubukene bwugarije ahanini urubyiruko rwacikishirije amashuri, urwize ariko ntirubone akazi ndetse n’ urundi rugizwe n’ abarokotse jenoside yakorewe Abatutsi mu Rwanda mu mwaka wa 1994.

Mu gukemura ikibazo cy’ ubushomeri n’ ubukene mu rubyiruko rw’ U Rwanda , Bisangabago yashinze  amashuri y’ imyuga y’ ubwubatsi (amashanyarazi, amazi…), ubudozi n’ ibindi byinshi bishamikiye kuri tekinike.

Gusa kugeza magingo aya ayoboye umuryango  CSDI/Rwanda umaze guhugura no gufasha kuva mu bukene urubyiruko rufite imyaka y’ amavuko iri hagati ya 16 na 21 rugera ku bihumbi bitandatu, gusubira ku ishuri ndetse no kwihangira imirimo.

Mu kiganiro na Bwiza.com, Bisangabagabo yatangiye avuga ko yihaye iyi ntego bitewe n’ amateka ya jenoside yakorewe Abatutsi muri 1994 aho yasanze ubukene bushobora kuba imbogamizi ku iterambere ry’ urubyiruko rwari rwaravuye mu mashuri rutayasoje bitewe n’ amikoro make y’ imiryango yabafashaga.

Yagize ati” Izi nzozi zo gufasha urubyiruko kwivana mu bukene zabaye impamo nyuma yaho mboneye ubunararibonye ubwo nakoranaga n’ iyindi miryango itandukanye ya Leta ndetse n’ iyigenga bigatuma ntangira gutekereza byimbitse ku bibazo byugarije sosiyete yanjye ariko nshakisha n’ uburyo nagira uruhare rufatika mu kubishakira umuti”.

Hamwe no gushinga Umuryango utegamiye kuri Leta CSDI/Rwanda, Bisangabagabo Kimenyi Dieudonne  agisoza icyiciro cya kabiri cya Kaminuza muri 2008 yahamagariwe gutegura no gukosora ibizamini by’ amashuri yisumbuye.

Mu mwaka wa  2009, yabaye Umunyamabanga Nshingwabikorwa w’Ishyirahamwe ry’Abapfakazi banduye n’abagizweho ingaruka n’ubwandu bw’agakoko gatera SIDA (Association des Veufs Vulnérables Affectés et Infectés  par le VIH/SIDA).

Muri 2013- 2014, Bisangabagabo yatorewe kuba Perezida w’ itsinda ry’ ubugenzuzi mu Ihuriro rya Sosiyete Sivile mu muryango wa Afurika y’ Iburasirazuba.

Mu rwego rwo kurushaho kwagura amarembo y’ ibitekerezo bituma ikirere cy’ ubukungu kiba cyiza, mu ntangiriro z’ umwaka wa 2016,  Bisangabagabo K.Dieudonnee yashinze sosiyete y’ ubuhinzi n’ ubworozi Gahima Farmers Ltd .

Iyi sosiyete ikorera mu Burasirazuba bw’ u Rwanda mu Karere ka Ngoma igamije kugira uruhare mu iterambere ry’ icyaro aho imaze guha abagera kuri 40 akazi kabahemba buri kwezi.

Izindi wakunda

1 Igitekerezo

kiki 15/02/2019 10:35 am at 10:35 am

nimwe igihugu gikeneye

Subiza

Tanga Igitekerezo

Bwiza.com