bwiza.com
Ahabanza » Imbamutima ku baturage bo mu Ntara y’Iburasirazuba, Amajyepfo bashimira RDO
Amakuru mu Rwanda

Imbamutima ku baturage bo mu Ntara y’Iburasirazuba, Amajyepfo bashimira RDO

Ku wa Gatatu tariki ya 13 Gashyantare 2019 , Umuryango RDO (Rwanda Development Organisation) mu mwiherero w’iminsi ibiri wahuje abakozi n’abafatanyabikorwa bawo, bishimira ibikorwa bitandukanye uyu muryango wakoze, ahanini bishingiye ku buhinzi, ibidukikije n’iterambere rirambye byakozwe mu myaka 24 ishize uyu muryango ushinzwe, hagaragajwe impinduka zabayeho zihurizwaho n’abaturage baturuka mu turere tumwe na tumwe two mu Ntara y’Iburasirazuba n’Amajyepfo.

Umunyamabanga Nshingwabikorwa wa RDO, Eugene Rwibasira

Abaturage bo mu Ntara y’Iburasirazuba n’Amajyepfo bashima uruhare RDO yagize mu guhindura imibereho yabo mu myaka 24 ishize. Umunyamabanga Nshingwabikorwa wa RDO, Eugene Rwibasira, we mu ijambo rye  agaragaza bimwe mu bikorwa byakozwe, avuga ko uyu muryango wakoze ubutabazi mu karere ka Bugesera ndetse n’utundi turere.

Ati  “ Mu by’ukuri aka karere ka Bugesera RDO yakozemo ubutabazi bukomeye kuko kari mu butayu bukabije, inzara n’amapfa kU buryo twihutiye gutera amashyamba kugira ngo haboneke imvura.”

Umuyobozi w’Inama y’Ubutegetsi ya RDO (Rwanda Development Organisation), Coletha U. Ruhamya

Muri uyu  mwiherero wabereye La Palisse i Nyamata , Umuyobozi w’Inama y’Ubutegetsi ya RDO (Rwanda Development Organisation), Coletha U. Ruhamya usanzwe ari n’Umuyobozi w’Ikigo cy’Igihugu Gishinzwe Kurengera Ibidukikije, REMA, yavuze ko hari byinshi byo kwishimirwa bamaze kugeraho mu myaka 24 ishize , avuga ko RDO ijya gutangira yahisemo ibintu byiza byafasha Abanyarwanda kugira ngo harengerwe ubuzima bwabo mu buryo butandukanye.

Yakomeje avuga ko mu Bugesera habaga igisa nk’ubutayu, abantu babayeho mu buzima butari bwiza aho babanje gutera ibiti byinshi, nyuma batangira gufasha abantu mu bijyanye n’ubuzima rusange burimo kubakira abatishoboye, ubuhinzi n’ubworozi kugira ngo abaturage barusheho kugira ubuzima bwiza.

Ati “ Iyo urebye hano mu Bugesera ubona ko hari icyahindutse kuko habaga izuba n’ inzara , RDO ijya gutangira yahisemo ibyafasha abaturage birimo ubuhinzi , ibijyanye n’ubuzima, ubworozi no kongera umusaruro kandi hatibagiranye n’ibidukikije kuko iyo ubirengeye bizana ubuzima bwiza .”

Dr. Coletha U. Ruhamya yakomeje avuga ko nyuma yuko RDO igiriye mu turere tugize Intara y’Iburasirazuba n’utw’Amajyepfo, ko hahindutse ikintu kuko abaturage bungutse byinshi bitewe n’uko benshi bongereye uburyo bwo guhinga, bagira umusaruro uruseho, kuko igihe byabatwaraga mu ihinga cyagabanutse, none ubu abaturage babashije kwishyurira abana babo amashuri ndetse no mu buzima busanzwe ngo bungutse ikintu kinini mu kwiteza imbere.

Ibyagaragajwe muri filimi mbarankuru

Biziyaremye Viateur utuye mu karere ka Bugesera , mu Murenge wa Ruhuha, avuga ko bahingaga begera ikiyaga cya Ruhuha kugeza ubwo RDO yazaga ikabafasha mu gutera ishyamba ku nkombe zacyo kugira ngo ubutaka bugikikije bukomeze gufatwa neza, ngo kuko n’icyiyaga cyari cyatangiye gukama.

Ati “Mu by’ukuri inkombe z’ikiyaga zari zatangiye kugenda ku buryo ubutaka bwo ku nkombe z’ikiyaga haba ku ruhande rw’u Rwanda n’u Burundi, zari zatangiye kugenda, ubu zasubiye mu buryo kubera amashyamba RDO yateye hano ku nkombe.”

Abafatanyabikorwa bashimiwe uburyo bafatanya na RDO

Uwamugira Monique, umuturage wo mu Karere ka Gatsibo, mu murenge wa Kiziguro, avuga ko yanejejwe no kuba RDO yarabakuye muri burende ikabubakira. “Twaranezerewe kuba baradukuye muri burende.” Muganza Fred na we utuye muri uyu murenge avuga ko nta bushobozi abo mu mudugudu wabo bari bafite kuko babaga muri burende ariko umushinga wa RDO warabafashije urabubakira babona aho kuba.

Muhanga na Nyagatare nabo bishimira uburyo umusaruro wabo wiyongereye 

Nkunzwenimana Jean Damascene wo mu murenge wa Rukomo mu karere ka Nyagatare, avuga ko bigishijwe gukora umusaruro ukunzwe aho bahuriye na RDO ku buryo ngo basigaye bagira umusaruro ukunzwe ku isoko.

Mukashyaka Therese utuye mu murenge wa Cyeza mu karere ka Muhanga, avuga ko mbere koperative yabo itarahura na RDO umusaruro wayo ku isoko wahendwaga, ko bacuruzaga uko biboneye kandi ku bijyanye n’umusaruro  bezaga toni imwe n’igice ariko ubu bareza toni enye kandi nazo bazigurisha neza badahenzwe.

Uyu Mukashyaka avuga ko umunyamuryango wese agira icyo akuramo, kandi akabihurizaho n’abaturage batandukanye bavuga uburyo bateye imbere mu bikorwa byabo, bashingiye ku buzima bari babayeho mbere y’uko bahura na RDO.

Umuryango RDO watangiye gukora muri 1995, ukora mu mishinga itandukanye irimo kwigisha abaturage guhinga no korora kijyambere, kandi ukabafasha gusarura neza imyaka no kuyihunika.

Ubu RDO irakora mu bikorwa by’ubuzima, ubuhinzi, ibidukikije, kurwanya malaliya n’ibindi, ikorera mu turere twa Bugesera, Gatsibo, Kayonza, Kirehe, Ngoma, Nyagatare, Rwamagana, Kamonyi, Muhanga, Ruhango, Nyanza, Gisagara, Nyaruguru, Nyamagabe, Rulindo, Gakenke na Burera. Ufasha abaturage 53653. Abayobozi ba RDO bemeza ko hari byinshi byitezwe bizakorwa mu rwego rwo gukomeza kuzamura ubuzima bw’abaturage.

Abitabiriye umwiherero barimo abakozi ba RDO ndetse n’abafatanyabikorwa bayo

Izindi wakunda

Bwiza.com