bwiza.com
Ahabanza » Muhanga: Babiri bari bakurikiranweho gushinyagurira umurambo bakatiwe igifungo cya burundu
Amakuru Politiki

Muhanga: Babiri bari bakurikiranweho gushinyagurira umurambo bakatiwe igifungo cya burundu

Urukiko Rwisumbuye rwa Muhanga rwahanishije igihano cy’igifungo cya burundu abantu babiri bari bakurikiranweho gushinyagurira umurambo n’ubujura bwitwaje intwaro nyuma yo kubahamya iki cyaha.

Ku wa 11 Mutarama 2019, nibwo Urukiko ku rwego rwisumbuye rwa Muhanga rwasomye urubanza Ubushinjacyaha bwarezemo Mukunzi Anastase na Ukwigennye Isaie icyaha cyo gushinyagurira umurambo n’ icyaha cyo kwiba hakoreshejwe intwaro byateje urupfu,  ibyaha biteganywa kandi bigahanishwa ingingo ya 170 na 130 mu gitabo cy’amategeko ahana.

Urukiko rwabahamije ibyo byaha byombi maze rubakatira igihano cy’igifungo cya  burundu nk’ uko byari byasabwe n’ubushinjacyaha.

Urubanza rwasomewe aho icyaha cyakorewe ari naho iburanisha ryabereye ku wa 8 Mutarama 2019 mu Mudugudu wa Bweramana, Akagali ka Cyerezo, Umurenge wa Mukingo, Akarere ka Nyanza.

Abaregwa bakaba baragiye kwiba ihene bitwaye icyuma bageze aho zararaga umuzamu arabikanga avuza induru bahita bamuboha bamutera icyuma baramwica batwara ihene ebyiri bageze mu nzira batekereza ko nibapima umurambo mu maso hazagaragaramo abamwishe, maze basubira inyuma bawukuramo amaso bajya kuyajugunya mu gihuru.

Abaregwa baburanye bemera icyaha mu gihe Ubushinjacyaha bwari bwabasabiye igihano cy’igifungo cya burundu.

Izindi wakunda

Bwiza.com