bwiza.com
Ahabanza » Nyamasheke/ Ruharambuga: Bishatsemo ubushobozi bakora umuhanda wabatwaye asaga miliyoni 24
Amakuru mu Rwanda

Nyamasheke/ Ruharambuga: Bishatsemo ubushobozi bakora umuhanda wabatwaye asaga miliyoni 24

?

Abaturage bo mu Murenge wa Ruharambuga, mu Karere ka Nyamasheke barishimira ko biyujurije umuhanda wabatwaye 24.324.500 bishatsemo ubwabo mu bikorwa by’umuganda, bikaba ngo ari ubwa mbere igikorwa nk’iki cy’indashyikirwa gihuza umurenge wose kigezweho muri uyu murenge.

Uyu muhanda ureshya na km 1,7 uva ku muhanda munini wa Kaburimbo Rusizi- Huye ukagera ku kigo nderabuzima cya Kamonyi mu kagari ka Ntendezi ,ngo abaturage bawutekereje nyuma y’ikibazo gikomeye bari bafite cyo kubura aho banyura bajya  gushaka serivisi z’ubuzima ku kigo nderabuzima cya Kamonyi.

Mbere ngo kabanje kuba ari nk’akayira,nta modoka cyangwa moto bishobora kukagendamo cyane cyane mu gihe cy’imvura, ngo bikaba byarasabaga ko umurwayi cyangwa umugore uri ku nda ushaka nko kujyanwa ku bitaro bya Bushenge, imbangukiragutabara iguma kuri kaburimbo, agahekwa mu ngobyi ya Kinyarwanda ikahamugeza.

Mukamugenzi Julienne ati’’  Ni umuhanda ntagereranywa mu murenge wacu ugereranije n’akamaro kanini cyane udufitiye twumva  amaboko yacu n’ibindi byose tuwutanze ho bitarapfuye ubusa  kuko ingorane twagiraga  tuva cyangwa tujya kuri iki kigo nderabuzima nitwe tuzizi kuko ubunyereri bw’akayira twanyuraga mo mbere y’uko tuwukora n’ingorane kadutezaga tutazabyibagirwa kandi bitweretse igipimo cy’ibyo dushobora kwigezaho dufatanije, tukumva abakoze uyu muhanda nta kindi cyatunanira dushyize hamwe.’’

Ngo si abaturage gusa uyu muhanda uruhuye kuko na bamwe mu bakozi b’iki kigo nderabuzima bari bamaze kurambirwa kugikoramo bagenda mu muhanda mubi cyane cyane nk’uwakoraga nijoro mu gihe cy’imvura nk’uko bivugwa n’uwari umuyobozi w’iki kigo nderabuzima,  Nishyirembere Vérène.

Ati’’ Abatuganaga bari batangiye kugabanuka bigaragara atari uko indwara zacitse  cyangwa imitangire ya serivisi  nziza yagabanutse ahubwo ari uko batashakaga kutugana kubera kwiganyiriza aho banyura kuko utavuga ngo uratanga serivisi nziza ntaho abakugana banyura ngo bakugereho,ariko ubu turishimye,dushimye abaturage n’abayobozi bacu ku bufatanye butumye tugera kuri iki gikorwa cy’indashykirwa.

Umuyobozi w’akarere ka Nyamasheke wungirije ushinzwe iterambere ry’ubukungu,Ntaganira Josué Michel  yabasabye  guharanira kugera no ku birenzeho kuko hagikenewe gukorwa byinshi ngo akarere kigobotore ubukene kagifite  kandi nta handi imbaraga zizava atari muri bo.

Abasaba no kurenga imbibe z’umurenge wabo bakavungurira no ku yindi mirenge ibanga bakoresha ngo bagere ku gikorwa nk’iki kandi vuba,kuko uyu muhanda watangiye gukorwa  muri Kanama umwaka ushize bakawiyuzuriza mu gihe gito nk’iki nta nkunga n’imwe yindi bahawe.

Abaturage n’abayobozi babo bishimira umurimo wo kwigira kwabo
Byagoraga abarwayi kugera kuri iki Kigo Nderabuzima
Visi Meya Ushinzwe Iterambere ry’ubukungu,Ntaganira Josué Michel n’abandi bayobozi bafungura ku mugaragaro uyu muhanda

Izindi wakunda

Bwiza.com
error: Alert: Ntabwo byemewe!!