bwiza.com
Ahabanza » Nyanza: Urukiko rwumvise ubujurire bw’uzwi nka Nyiramakoma ushinjwa ibyaha bya Jenoside
Amakuru mu Rwanda

Nyanza: Urukiko rwumvise ubujurire bw’uzwi nka Nyiramakoma ushinjwa ibyaha bya Jenoside

Urukiko Rukuru rwa Nyanza rwumvise ubujurire bwa Sebagabo Julienne ushinjwa ibyaha bya Jenoside yakorewe Abatutsi mu 1994 nyuma yaho yari yarakatiwe igifungo cya burundu n’urukiko rw’isumbuye rwa Huye.

Sebagabo Julienne uzwi ku izina rya Nyiramakoma yafatiwe ku kibuga cy’indege cya Kanombe avuye mu bukwe bw’umuvandimwe we ashinjwa ibyaha bya Jenoside birimo kuyikora, ubufatanyacyaha, gushishikariza abantu gukora Jenoside no gushinyagurira imirambo.

Muri Nzeri mu 2007 yari yarakatiwe n’urukiko Gacaca gufungwa imyaka 19, rumushinja kwicisha nyirarurume no kujya kuri bariyeri aho avuka i Nyange mu cyahoze ari Perefegitura ya Butare, ubu ni mu Karere ka Gisagara mu Ntara y’Amajyepfo.

Nyuma yo gufatwa asubiye muri Norvège yakatiwe n’urukiko rwisumbuye rwa Huye gufungwa burundu, kuri uyu wa kane nibwo urukiko rukuru rwa Nyanza rwatangiye kumva ubujirire bwe.

Radio10 yakurikiranye iri burana, itangaza ko uhagarariye Julienne, Me Hakizimana Martin yagaragarije umucamanza ko Nyiramakoma arengana kuko mu byaha aregwa hari aho bivugwa ko yagiye kuri bariyeri kandi kujya kuri bariyeri gusa atari icyaha ahubwo ko icyaha ari ibyo wahakoreye. Aha umucamanza yavuze ko mu gihe cya Jenoside hari abazaga kuri bariyeri bahagarariye ibiri kuhakorerwa, nkuko ngo byagiye bigaragara mu manza nyinshi.

Maître Hakizimana avuga kandi ko yaje mu Rwanda inshuro nyinshi zirimo no kwitabira inama z’umushyikirano ntafatwe, ahubwo akaza gufatwa avuye mu bukwe bw’umuvandimwe asubiye mu gihugu cya Norvege afitiye n’ubwenegihugu, Dosiye ye igakorwa nyuma, akibaza impamvu itakozwe mbere yuko afatwa.

Umushinjacyaha Uwombonye Sudi yavuze ko kuba Sebagabo yaraje inshuro nyinshi mu Rwanda bidakuraho igihe cyose afatiwe atagomba gushyikirizwa ubutabera.

Maître Hakizimana yagaragaje kandi ko atari afite umugambi wo gushishikariza abaturage gukora Jenoside kuko atari ari mu bayobozi. Aha umushinjacyaha yavuze ko umuntu wese akwiriye kubikurikiranirwa agashinja ubushinjacya kwivuruza mu bihe bitandukanye, ndetse ko ibi byasumwa n’urukiko.

Ubushinjacyaha bugaragaza ko ibyaha aregwa ari ibyiyongera kubyo yari yarakatiwe n’inkiko Gacaca.

Akurikije izindi manza bafite ndetse no kongera kwiga ku byavugiwe mu bujirire, Umucamanza, Kanyegeri Timothée yavuze ko tariki ya 27 Werurwe muri uyu mwaka wa 2019 aribwo uru rubanza ruzasomwa.

 

Izindi wakunda

Bwiza.com