bwiza.com
Amakuru Politiki

RRP+ ikomeje ubukangurambaga bugamije kurushaho kwita ku bana babana n’indwara zidakira

Kujya impaka ku bikenewe n’imbogamizi abana babana n’indwara zidakira nka sida hagamijwe kurushaho kubitaho no kubona ubuvuzi, kuganira ku kuntu aba bana barindwa ndetse no kujya impaka ku iteka rya minisitiri rigena uburyo bwo gufasha umwana wanduye cyangwa urwaye indwara idakira, ni byo abari bateraniye mu nama y’Urugaga Nyarwanda rw’abafite virus itera Sida, (RRP+) bagarutseho kuri uyu wa Gatanu, itariki 15 Gashyantare mu nama yabereye muri Ubumwe Grande Hotel.

Urugaga Nyarwanda rw’abafite virus itera Sida ku bufatanye n’Ikigo cy’Abadage cy’ubufatanye mu Iterambere, GIZ, n’abandi bafatanyabikorwa, rukaba rwarateguye ibiganiro n’abafatanyabikorwa b’ingenzi ngo haganirwe ku bikubiye mu iteka rya minisitiri ryenda gushyirwa ahagaragara bareba ibyakongerwamo bigamije kurinda byihariye abana banduye indwara zidakira

Ni inama yahuriyemo abafatanyabikorwa bagera kuri 50 barimo urubyiruko rubana n’indwara zidakira n’abahagarariye ababyeyi, Minisiteri y’ubuzima, Minisiteri y’uburinganire n’umuryango, Minisiteri y’urubyiruko, minisiteri y’uburezi, Ikigo cy’Igihugu cy’ubuvuzi n’abandi barimo imiryango mpuzamahanga n’abafatanyabikorwa mu iterambere na GIZ, UNAIDS,UNICEF tutibagiwe na Sosiyete sivile.

U Rwanda rwashyize ingufu nyinshi mu kurwanya agakoko gatera sida binyuze mu kukirinda, no kugera ku buvuzi no kugabanya ubwiyongere bwayo aho imibare igaragaza ko ikigero iriho cyagumye kuri 3% mu myaka igera mu 10. Ni mu gihe mu rubyiruko ruri hagati y’imyaka 15 na 24 iri ku rugero rwa 1%.

Imibare kandi igaragaza ko abakobwa bakiri bato barusha inshuro eshanu ibyago byo kwandura agakoko gatera sida bagenzi babo b’abahungu bari mu kigero kimwe, aho ku bakobwa ari 2,5% mu gihe mu bahungu ari 0.5%.

Imibare kandi yavuye mu bushakashatsi buheruka igaragaza ko umubare w’abakobwa bari mu kigero cy’imyaka 15 na 19 babyara bakiri bato wakomeje kuzamuka ku rugero rwo hejuru kuri ubu ikaba igeze kuri 7,3%. Ngo iyo abana b’abakobwa bageze mu myaka 19, imibare iriyongera ikagera kuri 21%.

Nubwo hari ingufu nyinshi zishyirwamo n’abafatanyabikorwa, muri iyi nama hagaragajwe ko hakiri icyuho mu bijyanye no kwita ku ngimbi ngo zibashe kubona serivisi z’ubuvuzi bw’indwara zandurira mu mibonano mpuzabitsina na sida kandi zemewe n’izindi serivisi nko kubona udukingirizo two kwirinda inda zitateguwe, kwandura sida, kuboneza umuryango, gusiramurwa ku bagabo nk’uburyo bwo kwirinda,gusuzumwa agakoko gatera sida n’ibindi.

Ni muri urwo rwego Urugaga Nyarwanda rw’abafite virus itera Sida, RRP+ n’abandi bafatanyabikorwa, batangiye ibikorwa by’ubuvugizi bwo gusaba ko serivisi zo gupimwa sida n’izindi z’ubuzima ziboneka  no ku rubyiruko rutarageza no ku myaka 18 rutiriwe rubaza ababyeyi.

Ubusabe bw’ibyavugururwa mu mushinga w’itegeko rigamije kurinda abana bwashyizwe umukono n’imiryango itandukanye ya sosiyete sivile bukaba bwarashyikirijwe komisiyo y’inteko ishinga amategeko y’uburenganzira bwa muntu ngo ibiteganywa mu ngingo ya 55 y’itegeko ryo kurinda umwana no 54/2011 ryo  kuwa 14/12/2011 bigumeho kandi byagurwe. Iyi ngingo ikaba yaravuguruwe nyuma yo gusuzumwa.

Ingingo ya 55 ikaba ivuga ko “abatanga serivisi z’ubuvuzi bagomba kwita uko bikwiye ku mwana wanduye agakoko gatera sida urengeje imyaka 12 n’iyo yaba adaherekejwe n’ababyeyi cyangwa abamurera”

Naho itegeko ryavuguruwe ririnda umwana no 71/2018 ryo kuwa 31/08/2018, by’umwihariko mu ngingo yaryo ya 20, havuga ko “umwana wanduye indwara idakira ahabwa uburinzi bwihariye n’ubufasha bwa guverinnoma hagendewe ku bushobozi bwa guverinoma. Iteka rya minisitiri w’ubuzima rikaba rigaragaza ibisabwa kugirango uwo mwana ahabwe ubwo bufasha buvugwa mu gika cya mbere cy’iyi ngingo.”

 

 

 

Izindi wakunda

Bwiza.com
error: Alert: Ntabwo byemewe!!