bwiza.com
Amakuru Featured Mu mashuli

Gasabo: Umwarimukazi amaze imyaka itatu mu nzu idakinze

Inzu ntifunze hejuru, urugi narwo rwacitse. Nta mazi ahaba

Mu murenge wa Rutunga, akarere ka Gasabo, abarimu bubakiwe inzu ebyiri zo gucumbikamo ariko nta n’imwe irangiye, ku buryo abarimu bake bazibamo uko ziri: zidakinze, nta mazi, nta mashanyarazi, nta bwiherero, nta pulafo, nta gikoni n’ibindi biburaho.

Ni ku gicamunsi cyo kuwa gatandatu, tariki ya 9 Gashyantare 2019, abaturage babukereye bagana iya sitade Rutunga kwakira abadepite. Nyirakamana Ruth (izina ryahinduwe) nawe ni umunyarwanda akaba n’intore, ariko we yibereye mu rugo. Ni umwarimukazi muri uyu murenge, akaba n’umukorerabushake watoresheje abo badepite, ariko ntasamajwe no kujya kubareba: inzu ye irarangaye yasanga benengango bamucucuye. Ikindi arashyashyana mu bitabo atanguranwa n’uko iziba rirenga, kuko aho atuye nta mashanyarazi arimo, nyamara abaturanyi be baracana.

Iyi nzu Nyirakamana abamo kuva muri Gashyantare 2016, yegeranye n’indi bisa neza. Ziri munsi y’umuhanda, mu metero 200 uvuye ku biro by’umurenge wa Rutunga na sitade yakiriye abadepite. Izi nzu zombi zubatswe na Leta, zitwara akayabo ka miliyoni zisaga 90 (ni ukuvuga miliyoni 45 buri imwe). Hafi buri murenge ufite nibura inzu imwe nk’iyi kuva muri 2013, ariko hamwe ntiziruzura nk’aha I Rutunga, ahandi zaruzuye zibura abazijyamo kuko bafite aho baba cyangwa zubatse kure, ahandi zibamo abatabigenewe nk’iya Nyamagabe yabagamo umuyobozi w’akarere wungirije.

Mu nzu imbere ni ibirangarira gusa

Kiramujyanye, “Usibye ko mudakodesha murutwa n’ababa hanze”

Aya ni amagambo abashyitsi ba Nyirakamana bamubwira iyo bamusuye, dore ko ari inkumi igeze kurangamirwa n’urungano. Abamugana basanga amaso ye atukuye, kubera imihangayiko no gukorera ku gatoroshi.

Bamwe mu bahisi n’abagenzi banyura kuri iyi nzu ntibatinya kuyita Kiramujyanye, bavuga ko isaha iyo ariyo yose igisimba (impyisi) yatwara abayirirmo. Iyi nzu ni ubwugamo bw’amatungo, ni uburaro bw’inyamaswa; ndetse urebye n’abagizi ba nabi bashobora kuhaca ingando, ikaba yakorerwamo ibibi byose kuko idakinze.

Nyirakamana avuga ko ubwiherero bakoresha ari abarimu babwiyubakishirije, ubuyobozi bw’ikigo bukanabasaba kwishyira hamwe bagashyira umuriro w’amashanyarazi muri izi nzu za Leta. Nta byo kwita ku kuba bakwimurirwa ahandi cyangwa kwirukanwa, babasaba gushora ayabo ngo babone aho baba.

Ati, “diregiteri niwe muvugizi wacu, yatubwiye ko dukusanya amafaranga tugashyiramo umuriro, kandi mu by’ukuri kuwuhageza birahenze. Hari bamwe baba bagiye, ntiwawushyiramo wenda kuhava”.

Akomeza agira ati, “Twahageze urugi rwaracitse, nyuma urundi umuyaga urarutwara, tuhaba gutyo. Ingorane, gukosorera mu rugo ntibishoboka, iyo bwije dukoresha agatoroshi. Ntiwacyura imikoro wahaye abana ngo ukosorere mu rugo. Twifuza ko bayubaka akamera nk’ay’ahandi. Abadusuye baraduseka cyane bati, [Usibye ko mudakodesha murutwa n’ababa hanze]”.

Nyamara aba bashyitsi ntibaba babeshya, nubwo inkuru y’imbarirano ituba. Aya mazu arava, hejuru(mu ipinyu: aho amabati ahurira n’igikuta) ntihafunze, ku buryo igihe cyose baba bafite impungenge ko ibyabo byibwa.

Ahateganijwe ubwiherero n’igikoni nta na sima irimo, amazi bakoresha bayakura ku murenge cyangwa imvura yagwa bakareka. Izi nzu kandi zugarijwe no gusenyuka bitewe n’igihuru n’ibyatsi byameze ku isima, ndetse n’amazi amanuka ku mabati akamena isima yo ku rubaraza.

Gasabo n’ahandi bimeze bite?

Mu mirenge igize akarere ka Gasabo ndetse n’ahandi, nta na hamwe imyubakire n’imicungire y’izi nzu z’abarimu ivugwaho rumwe. Zimwe zicungwa n’ubuyobozi bw’umurenge, izindi abayobozi b’ibigo; kandi ari Minisiteri y’uburezi ari na REB ntibashaka gutanga amakuru ahagije kuri izi nzu.

Hagati y’itariki 16 Werurwe na 18 Mata 2016, ushinzwe amakuru muri Mineduc yandikiwe azibazwaho, birangira atanze icyumweru na n’ubu.

Ubutumwa bwagiraga buti: ku bireba INZU YA MWARIMU,

-Gahunda yo kubaka inzu ya mwarimu yabaye mu wuhe mwaka? 

-Hari hateganijwe amazu angahe mu gihugu? 

-Ni abahe bafatanyabikorwa muri iyi gahunda, buri umwe afite uruhe ruhare?

-Ese iriya nzu ifite agaciro k’amafaranga angana iki? 

-Ese zagombaga gutahwa zimeze zite(zirimo iki, zitarimo iki)? 

-Ese ubu zaratashywe?

-Ni nde ushinzwe imicungire yazo umunsi ku munsi? 

-Hari amakuru mufite ku buryo abantu bazibamo( izibamo abarimu, izibamo abandi batigisha, izitabamo abantu namba). 

-Ni ubuhe butumwa mwatanga ku barimu, abayobozi b’ibigo n’abandi bafatanyabikorwa mu micungire ya ziriya nzu?

Ako ni agatuwaleti abarimu biyubabikiye hanze muri metero nka 20

Hari imirenge yubatse inzu ebyiri zirarangira, hari n’iyananiwe kurangiza n’imwe. Hari aho zibamo abarimu (Gikomero), hari n’aho zibamo abatari abarimu (Nduba habamo abakozi ba Sacco). Hari kandi aho usanga zarubatswe kure y’amashuri cyangwa bigaragara ko zidakenewe. Mu murenge wa Ndera, imwe yubatswe Cyaruzinge (ku mudugudu w’abasigajwe inyuma n’amateka), nta shuri ryahabaga, ubu hamaze kugezwa imyaka itatu y’amashuri abanza. Inzu ibamo umwarimu umwe, undi ubuyobozi bwamukuyemo kuko yabanagamo n’abana be. Indi yubatswe ku mashuri ya Jurwe, ahaboneka icyiciro cy’amashuri abanza gusa.

Kicukiro: mu murenge wa Nyarugunga hubatswe ebyiri ziruzura, magingo aya zombi zibamo abarimu

Rwamagana: mu murenge wa Muyumbu hari imwe, ariko yagezemo abarimu itaruzura neza kubera yari ikenewe

Gatsibo: mu murenge wa Gasange, iyi nzu yubakiwe ubwiherero n’igikoni, kandi abamo abarimu bayuzuye.

Gicumbi: mu murenge wa Giti, mu 2016 yabagamo Dasso, mu murenge wa Byumba irakinze, mu murenge wa Kageyo ibamo uburiri wa Gitifu w’akagari; naho mu murenge wa Cyumba abarimu bayibamo.

Gisagara: mu murenge wa Mukindo, 2016 niyo yakirirwagamo impunzi z’abarundi, ariko yari itaruzura neza.

Muhanga: hafi ya zose zaruzuye ariko zibura abazijyamo, zimwe zarenzwe n’ibihuru; ariko akarere kavuga ko gateganya kuzishyiramo abandi bakozi badafite aho baba.

Kayonza: mu murenge wa Kabarondo abazubatse bamaze imyaka itatu batarabona ubahemba

Nyagatare: ku ishuri rya Cyagayaga bayitashye 2014, yuzuye ikoze neza isize n’amarangi

Nyamagabe: hashize amezi make Visi Meya yemeye kuyizibukira akavamo akayirekera abarimu;

N’ahandi n’ahandi.

Utubati(placards), inkuta zacukuwe ahazanyuzwa amasinga y’umuriro

Ubwiru n’urujijo mu makosa

Nubwo amakuru ku micungire y’aya mazu akomeza kugirwa ubwiru, bikomeza guteza urujijo kandi amakosa aragaragara. Nta kuntu inzu zisa, zifite imbata imwe, zatewe inkunga n’ikigo cyangwa urwego rumwe; zituzurira rimwe, ntizishyirwemo bimwe, ntizigengwe n’amabwiriza amwe.

Izi nzu zatangiye kubakwa mu mwaka wa 2012-2013, buri nzu igizwe n’ibyumba umunani na salo ebyiri: bine bigenewe abakobwa na bine by’abahungu. Buri gihande kirimo ubwiherero bw’imbere mu nzu n’igikoni cyo mu nzu. Ibikoni n’ubwiherero byo hanze ni inyongera ishyirwaho n’imirenge cyangwa ibigo by’amashuri.

Iyi nzu ifite agaciro ka miliyoni nibura 45 z’amanyarwanda. Gusa amakuru ahagije ku muterankunga n’uburyo zicungwa, minisiteri yarabibajijwe ntiyasubiza.

Izi nzu kandi zakunze kugarukwaho na raporo y’umugenzuzi w’imari ya Leta, aho mu 2014 yavugaga ko zatinze kuzura, kuko zagombaga kuzura mu 2013. Ubwo izuzuye nyuma n’izitaruzura magingo aya zamaze gutinda.

Mu mwaka wa 2015, umugenzuzi w’imari ya Leta yerekanye ko zimwe muri izi nzu zituzuye neza, izindi zubatswe mu manegeka, aho yagaragazaga ko zugarijwe n’amazi ashaka kuzisenya.

Icyo atarareba ni uko zibyazwa umusaruro, naho izituzuye n’iziri gusenyuka nazo ziracyahari.

Aha ni ahagenewe ubwogero n’ubwiherero
Inzu ibangamiwe n’amazi y’imvura kubera kutagira imireko
Izi nzu zubatswe ari 2, ariko nta nimwe irangiye. Ibihuru bizigeze habi

 

 

Izindi wakunda

2 Ibitekerezo

Mahoro 17/02/2019 8:49 pm at 8:49 pm

Bravo.Dore inkuru icukumbuye.Ntubona ahubwo.Tekereza frws yagiye kuri izi nzu uko angana.Ubutaha cg umusibo ejo uzasubirayo uzasanga uwaguhaye amakuru nubwo wakoze uko ushoboye ukamuhisha uzasanga namuhaye mutation discipiinaire.Tekereza nka RIB yinjiye muri iki kibazo?!Bitinde bitebuke abakojeje intoki muri aya mavuta nako muri aya frws ya Leta bizabagaruka!Iyi ni inkuru y’Imyaka!

Subiza
Nepo 21/02/2019 4:07 pm at 4:07 pm

Karegeya ndakwemeye pe!iyi nkuru iracukumbuye,kdi irasobanutse yewe iranuzuye,kuko harabajya bandika inkuru,ugasanga ituzuye,Abantu bazi ko bari bafite uruhare mu iyubakwa ry’aya mazu ,nibashakishwe basabwe ibisobanuro,kdi uzasanga muribo hari abagiye bazamurwa mu ntera,hejuru yayo mahano yo kunyereza umutungo wa Leta,ako bageni,ubwo harya nabyo ngo bitegerejwe Prezida ko ariwe ugomba kubikemura?ubundi Ministeri bireba baba bakora iki?Abo badepite dutora kuki batabifataho umwanzuro,Jyewe hari ibintu numva nkumva birambabaje,natekereza amaraso abantu bamennye kugirango tugire igihugu cyiza giteza imbere umuturage,natekereza abantu baguye ku rugamba kugirango igihugu gitekane,iyo numva ibyo bintu birimo gukorwa n’abayobozi birambabaza pe!

Subiza

Tanga Igitekerezo

Bwiza.com
error: Alert: Ntabwo byemewe!!