bwiza.com
Ahabanza » Sir Alex Ferguson azongera atozeho Manchester United ku mukino wa gishuti na Bayern Munich
Imikino

Sir Alex Ferguson azongera atozeho Manchester United ku mukino wa gishuti na Bayern Munich

Alex Ferguson yahawe amahirwe yo gutoza Manchester United ku mukino w’abakanyujijeho uzayihuza na Bayern Munich yo mu Budage, muri Gicurasi. Ni nyuma y’imyaka 20 iyi kipe itwaye ibikombe bitatu bikomeye mu mwaka w’imikino w’ 1998/1999.

Mu mwaka w’1999, igihe iyi kipe yo mu Bwongereza yatozwaga n’uyu musaza, yatwaye igikombe cya shampiyona, igihuza amakipe yitwaye neza iwayo ku mugabane w’i Burayi (UEFA Champions League) ndetse n’igikombe cy’igihugu, FA Cup.

Uyu mukino uzahuza abakinnyi bakiniye aya makipe yombi muri uwo mwaka w’imikino, ubwo Manchester United yatsindaga Bayern Munich ibitego 2-1, wabereye muri Espanye, ku kibuga cya FC Barcelona, Camp Nou. Kuri uyu mukino, umutoza Ole Gunnar Solkjaer ni we wahesheje iyi kipe ye insinzi ku gitego yatsinze mu minota y’inyongera.

Ferguson yabwiye ikinyamakuru Sky Sports ko kugaruka nk’umutoza w’iyi kipe kuri uyu mukino ari iby’agaciro.

“Ni ukuri nishimiye uwo munsi udasanzwe ku kibuga, Old Trafford. Ni amahirwe akomeye nzaba mbonye yo gutera inkunga umuryango w’iyi kipe.”

Umuyobozi w’umuryango wa Manchester United, akaba n’umwe mu bagize itsinda ry’abatoza muri iyi kipe, Richard Arnold yavuze ko aya mateka yo mu 1999 ari amwe mu y’ingenzi banditse.

Uyu mukino uzitabirwa na benshi mu bakinnye muri icyo gihe; mu rwego rwo kugira ngo bazishimane n’abakunzi b’iyi kipe y’ubukombe mu Bwongereza.

Sir Ferguson yatoje iyi kipe kuva mu 1986 asezera mu 2013 ku mpamvu y’izabukuru. Yatwaye ibikombe bya shampiyona y’ubwongereza 13, iby’igihugu 5 na 2 bya Champions League.

 

Tuyizere Jean de Dieu

Izindi wakunda

Bwiza.com