bwiza.com
Ahabanza » Gen Kayihura yaguriye rwihishwa imodoka ihenze umupolisi mukuru ushinjwa gushimuta Lt. Joel Mutabazi
Amakuru mashya Featured

Gen Kayihura yaguriye rwihishwa imodoka ihenze umupolisi mukuru ushinjwa gushimuta Lt. Joel Mutabazi

Iperereza ryamaze guhishura amazina y’abantu ba hafi ba Gen Kale Kayihura yaguriye imodoka binyuranye n’amategeko. Aba barimo SSP Nixon Agasirwe ushinjwa gushimuta uwari umurinzi wa Perezida Kagame, Lt. Joel Mutabazi.

Bwiza.com yari iherutse kubagezaho inkuru ivuga ko iperereza ryerekanye ko Gen Kayihura yasohoye mu buryo bunyuranyije n’amategeko akayabo ka miliyoni 500 z’amashilingi akagurira imodoka zihenze abahoze ari abunganizi be ba hafi mu gipolisi nta burenganzira yahawe n’Inama ya Polisi.

Icyo gihe aya makuru yatumye Uyoboye Igipolisi cya Uganda muri iki gihe, IGP Martin  Ochola, ahita ategeka umuyobozi ushinzwe iperereza ku byaha, AIGP Grace Akullo, guhita atangira iperereza no guta muri yombi abarebwa n’iki kibazo.

Kuri ubu rero nk’uko urubuga Spyreports rubitangaza, abagabo baguriwe izi modoka na Gen Kayihura mu rwego rwo kubashimira akazi gatandukanye bagiye bamukorera ku giti cye ubwo yari Umuyobozi wa Polisi ya Uganda.

Muri aba harimo Uwari Umuyobozi w’Inite ya Polisi yihariye Ishinzwe Ibikorwa Bidasanzwe, SSP Nixon Agasirwe Karuhanga kuri ubu ufungiwe Makindye ashinjwa ibyaha birimo gushimuta no gusubiza impunzi eshatu z’Abanyarwanda ziba muri Uganda iwabo binyuranyije n’amategeko. Muri aba Bnayarwanda harimo na Lt Joel Mutabazi.

Abandi barimo  uwitwa Stephen Kagoda, wari ushinzwe  iby’itangwa ry’amasoko, CP Apora wari ushinzwe abapolisi bakorera mu mazi,Umunyamabanga muri Polisi, Muhirwe  Rogdgers,AIGP Remmie na we wakoraga mu by’amasoko na Frank Mwesigwa.

Inkuru Bifitanye isano: https://bwiza.com/2019/02/13/uganda-haravugwa-indi-dosiye-ishobora-kurushaho-guteza-ibibazo-gen-kale-kayihura/

Uru rubuga ruvuga ko imodoka zaguriwe aba bagabo muri Kompanyi ya Chatta Motors zahawe ibiziranga bitari ibya gipolisi bityo ko kugira ngo hamenyekane ba nyirazo byari ingorabahizi ku bakora iperereza.

Umwe mu bapolisi bari muri iri perereza yatangaje ko kugeza ubu abakozi ba Kompanyi ya Chatta Motors bamaze guhatwa ibibazo kuri iki kibazo ku biro bya CID ahitwa Kibuli. Avuga ko igisigaye ari uguhata ibibazo abaguriwe izi modoka nyuma hagatumizwaho Gen. Kayihura.

Umwe mu bantu ba hafi bari ku cyicaro cya Polisi Nakuru yagize ati “ Izo modoka ziri mu mazina icumi y’abapolisi bakuru.”

Gen Kale Kayihura akaba avugwaho ibi mu gihe agifite urubanza mu rukiko rwa gisirikare akurikiranwemo kunanirwa gucunga ibikoresho bya gisirikare no kugira uruhare mu gucyura ku ngufu impunzi z’Abanyarwanda we yakomeje gushimanagira ko yakoze mu buryo bwemewe n’amategeko kuko u Rwanda na Uganda bifitanye amasezerano yo guhererekanya abakurikiranweho ibyaha bahunze ubutabera.

 

 

Izindi wakunda

Bwiza.com