bwiza.com
Ahabanza » Kenya yatangaje Somalia nk’umwanzi nayo yirukana Abanyakenya bose n’abari muri AMISOM
Amakuru Politiki

Kenya yatangaje Somalia nk’umwanzi nayo yirukana Abanyakenya bose n’abari muri AMISOM

Igihugu cya Kenya cyahamagaje ambasaderi wacyo muri Somalia ndetse gihita gitegeka ambasaderi wa Somalia muri Kenya, Mohamud Ahmed Nur, watangiye izi nshingano mu Ukuboza umwaka ushize kuva muri iki gihugu. Somalia yihimuye yirukana abadipolomate n’abaturage bose ba Kenya itibagiwe n’ingabo za Kenya ziri muri AMISOM.

Amakuru aravuga ko igihugu cya Kenya cyatangaje ko umuturanyi wacyo, Somalia, ari umwanzi nyuma y’aho iki gihugu ngo gishyiriye mu cyamunara peteroli na gaz bya Kenya byari mu mazi ya Kenya hafi y’umupaka wacyo muri uku kwezi nk’uko byatangajwe n’itangazamakuru ryo muri Kenya.

Mu itangazo ryashyizwe ahagaragara ku mugoroba wo kuwa Gatandatu, umunyamabanga muri minisiteri y’ububanyi n’amahanga ya Kenya, Macharia Kamau, yavuze ko cyamunara yabereye I London mu Bwongereza kuwa 07 Gashyantare.

Iri tangazo ririmo amagambo akarishye risa nk’iryatangije intambara hagati ya Kenya na Somalia, rivuga ko ubugwaneza no kubana neza n’abaturanyi kwa Kenya birimo kuririrwaho n’abandi kandi Kenya yiteguye kwirwanaho ikoresheje uburyo bwose bushoboka.

Ku ruhande rwa Kenya, Macharia ati: “Kenya yiteguye kurinda ubusugire bwayo ku kiguzi cyose kandi ifata abo bose bavogera ubusugire bw’igihugu, baba Abanyakenya cyangwa atari bo, nk’abanzi ba leta kandi nk’abarwanya abaturage ba Kenya.”

Uyu munyamabanga uhoraho muri minisiteri y’ububanyi n’amahanga ya Kenya yakomeje avuga ko ibyo guverinoma ya Somalia yakoze biteye umujinya kandi ari ubushotoranyi butakwemerwa n’Abanyakenya bose n’abandi bantu bizera iyubahirizwa ry’amategeko mpuzamahanga no gucyemura amakimbirane mu mahoro no mu buryo bwubahirije amategeko.

Igihugu cya Somalia nacyo kuri iki Cyumweru, itariki 17 Gashyantare kikaba cyahise gisohora itangazo rivuga ko minisiteri y’ububanyi n’amahanga mu gusubiza icyo bise ubushotoranyi bwa Kenya yirukana ambasaderi wayo, yategetse abadipolomate bose b’Abanyakenya kuva ku butaka bwa Somalia bitarenze amasaha 72.

Somalia kandi ngo ishingiye ku ngingo ya 14 na 15 z’itangazo rya Kenya ryuzuyemo iterabwoba rijyanye ku kijyanye n’Abanyasomalia baba muri Kenya, visa zose zahawe Abanyakenya bari muri Somalia nta gaciro zigifite kandi ko abaturage bose ba Kenya nta kaze bahawe muri iki gihugu. Ibi kandi ngo bikaba bireba ingabo za Kenya ziri muri AMISOM

 

 

Izindi wakunda

Bwiza.com
error: Ntibyemewe