bwiza.com
Ahabanza » Ibitekerezo ku itorero ry’igihugu – kugarura no kurengera umuco w’abanyarwanda
Amakuru Amateka Amateka n'umuco

Ibitekerezo ku itorero ry’igihugu – kugarura no kurengera umuco w’abanyarwanda

Mu nyandiko yanjye iheruka navuze nshima ubuyobozi bwongereye umurego mu kugarurira agaciro amuco w’u Rwanda kuko ariwo shingiro n’imibereho ya buri mbaga yose aho iva ikagera. Nyuma ya Kamere (nature) hakurikiraho umuco (culture) hagataho gutunganya aho aba (architecture) (Prof Khaled Haj)

Uyu munsi nifuje ko turebera hamwe umuco ubwawo icyo aricyo, icyo umaze, akamaro kawo mu bantu n’uburyo ushyirwa mu buzima bwa bene wo.

Ibitekerezo ku itorero ry’Igihugu, Chairman Bamporiki yanyunganira

 

  1. Isobanura magambo n’impamvu

Igisbobanuro cy’Umuco (définition).

Kubona igisobanuro kimwe kw’ijambo cyangwa kuri concept umuco ni ibintu twavuga ko bidashoboka kubera k’ubumbye ibintu byinshi. Ndagerageza kugenekereza nk’abandi ntange igisobanuro cyegereye iyo nyanja ngari. Ndifashisha Mwalimu Guy Rocher mu gitabo cye Introduction à la Sociologie générale, Montréal 1992, éd Hurtubise ch IV action sociale pg 101-127 (3ème édition)

Yagerageje gukusanya ibisobanuro by’abamubanjirije : Tylor, Emile Durkheim, Maus, Weber na Claude Levis Strauss, maze agera kuri iki gisobanuro (nanjye ngenekereze ngisobanure)

Umuco ni Uruhurirane rw’uburyo bw’imitekerereze, imyumvire n’imikorere yemeranijweho n’itsinda ry’abantu, bigasakazwa, bikamamazwa nabo mu buryo busangiwe na bose, kugirango bibafashe kubagena nk’itsinda ryonyine ryihariye, ritandukanye n’abandi mu buryo bwumvikana ndetse no mu buryo buzimije.   (un ensemble lié de manières de penser, de sentir et d’agir plus ou moins formalisées qui, étant apprises et partagées par une pluralité de personnes, servent, d’une manière à la fois objective et symbolique, à constituer ces personnes en une collectivité particulière et distincte).

Nyuma y’iki gisobanuro, mu buryo busesuye, twareba ingeri Umuco ugaragaramo, aribyo twakwita Ibice biwugize : Amateka, Indangagaciro, Imyemerere (habamo kirazira, imihango n’imigenzo), Ubugeni, Ibibahuza (mémoire collective) byose bikaba bihetswe n’Ingobyi yitwa : Ururimi.

  1. Inkomoko y’Ijambo Umuco .

Bigaragara ko rikomoka ku nshinga : guca : ibi n’ibi mbica kuri…, guca : inzira: iyi mvugo tuyica kuri kanaka, Guca : Kubuza : iki n’iki cyaciwe na Runaka etc…

Ikigaragara gikomeye ni uko hari ababayeho mbere yacu ducaho, dukomoraho, tunyuraho kugirango tugere iyo tujya. Dusubiza amaso inyuma kugirango tubashe kugana imbere.                 

  1. Inzego z’Umuco (niveaux).

Umuco ugira inzego eshatu ushingiraho:

  1. Amahame ngengamuco (idées et concepts)
  2. Inzego nshingwamuco (institutions)
  3. Ibimenyetso ndangamuco (folklore, Ibirango).

 

  1. Akamaro k’Umuco (rôle ).

Umuco ufite akamaro k’ubwoko butatu :

  1. Umuco uha ibintu ireme ukabibera iremezo (rôle constitutif)
  2. Umuco urubaka (ntusenya) (rôle constructif)
  3. Umuco urahanga (rôle créatif).

Ngirango ibi bintu bitatu (inkomoko y’ijambo, inzego, akamaro by’umuco) byatubere umusingi w’ibiganiro k’Umuco dushaka kubaka no guhesha icyicaro iwacu , tuwutuze mu bituza nawo udutuze mu Rwanda tubane dusabane, ibyacu bigire ireme maze Umuco ubibere iremezo iwacu.

Ngirango bitangiye kugaragara ko bitakorohera urwego rumwe gushingwa uyu murimo utoroshye. Birasaba rero ko buri wese aho ari, mu rwego urwo arirwo rwose, ahugukira iby’Umuco kugirango udufashe kuba abantu buzuye (nous humaniser).

II . Ishyirwa Mu Bikorwa.

Ndabanza nisegure kuko ntazi gahunda y’Itorero, ndabikora nk’Umuganda w’ibitekerezo waza wiyongera ku by’abandi banyarwanda bunganira uru rwego rubishinzwe.

Buri mbaga yose (nation) ireme ryayo rya mbere ni Umuryango ; aha ndavuga icyitwa urugo, niho rero hagomba kuboneka urwego rwa mbere shingiro ry’imibereho nyamuco. Nshimangire k’Umuco bene wo bawubamo mu buzima bwabo, ntuba mu mpapuro cg mu bitabo, uba mu buzima bwabo. (la culture se vit, ne se conceptualise pas). Bityo rero Ubuzima bwa mbere buba mu Muryango bikazasingira Umuryango mugari (nation).

Ubwo rero Itorero rifite inshingano igoye aho rigomba guha gahunda ngenderwaho mu miryango yacu kugirango umuco ufate, ugire ireme iwacu. Bitaba ibyo waba mu ma diskuru kuri radio na televisiyo.

Mu ngo, mu mashuli, mu matorero, mu mirimo, mu mutwe w’Ingabo n’ahandi habayo iki ?

Ni ugusubira mu bitekerezo ngengamuco, hakarebwa niba ibyo bitekerezo, bituranga, (Indangagaciro, amateka yacu, amateka dusangiye (mémoire collective) n’ibindi n’ibindi. Bikazava mu muryango, bigasingira amashuli, mu kazi mbese mu nzego zose z’ubuzima.

Ibimenyetso ndangamuco : Mu buryo bw’isesengura muco ibimenyetso bibamo ubwoko butatu:

Ibirango, Ibimenyesha, ibimurika (symboles, signes, signaux).

Hagombye kumenyekana buri rwego rwa buri kimenyetso bigatandukanwa, bikigishwa hakurikijwe agaciro kabyo uko bikurikirana, (kuriya nabitondekanije).

Muri macye jye uko numva Itorero ry’Igihugu ryadufasha guteza imbere umuco wo shingiro rya Muntu-Munyarwanda ryadukusanyiriza : Ibitekerezo Ngengamuco, rikabishinga inzego Nshingwamuco noneho bikagaragarizwa mu bimenyetso Ndangamuco.

Mugire Amahoro y’IMANA

Ntagengwa Omar Servil

 

Izindi wakunda

Bwiza.com
error: Ntibyemewe