bwiza.com
Amakuru Mu mashuli

Rusizi: Abakobwa babyariye iwabo bagaragaje uruhuri rw’ibibazo bahura nabyo

?

Abakobwa 22 babyariye iwabo barimo n’abacikirije amashuri bamaze kubyara, bo mu mirenge ya Kamembe,Gihundwe na Mururu mu karere ka Rusizi, barashimira itorero ry’abangilikani Diyoseze ya Cyangugu rimaze umwaka wose ribigisha umwuga wo kudoda imyenda,bakarisaba ko nyuma yo kurangiza aya masomo no kuyahererwa impamyabushobozi bahabwa n’uburyo bwo gukora bakiteza imbere bakanarera neza abo babyaye, bahabwa ibikoresho n’aho bakorera heza hatuma babyaza umusaruro ufatika ubumenyi bahawe.

Mu kiganiro na Bwiza.com, bamwe muri bo  bavuze ko nyuma yo kubyara bahuye n’ingorane zikomeye cyane zirimo gutabwa n’imiryango yabo n’ababateye inda bamaze kubihakana,hakaba n’abatazi abazibateye kuko baherukana bazibatera  bakaba barababuze, hakaba n’abatagira aho baba kuko batewe izo nda ari imfubyi zitagira epfo na ruguru,  n’abareranwa n’abo babyaye iwabo mu buzima bubi cyane,mu bwigunge no kumva ko ubuzima bwiza butagishobotse.

Muri aba hari abavuga ko nyuma yo gutwara izi nda zitateganijwe bumvise bafata icyemezo cyo kwiyahura cyangwa kuzikura mo  umutima ukanga,hakaba n’abagiye babasigira ba nyirakuru na bo batishoboye aho bagiye ubuzima bukabananira bakagaruka, bakaba ho nta byiringiro by’ubuzima bwiza kuko n’imiryango yabo itari yishoboye,ariko abayobozi b’umuryango w’abategarugori b’abangilikani( Mothers’union ) diyoseze ya Cyangugu babasanga muri ubwo buzima bubi,babigisha imyuga bakaba bayirangije.

Mukansanga Vestine wabyaye umwana wa mbere afite imyaka 20 akaba afite imyaka 30 amaze kubyara abana 2,avuga ko ababazwa n’uko na we ubwe atazi uwamuteye inda ya mbere kuko yamuhohoteye  umwana akaba agize imyaka 10 atazi se, uwa kabiri na we akaba agize hafi imyaka 2 uwayimuteye amubeshya ko azamujyana na we akaba yaramubuze,ariko yishimira ko nibura agiye kwiga umwuga uzamufasha kubaho kuko uku gutwara inda ya mbere itateganijwe byatumye acikiriza ayisumbuye yari ageze mu wa 2.

Yagize ati’’ nashatse kwiyahura mbyaye umwana wa mbere umutima uranga,aho mbyariye uwa 2 umusore wanyizezaga kuntwara na we aranshika na n’ubu sinzi aho ari kandi nta n’ubushobozi mu rugo bafite bwambesha ho n’abo bana bose. Numvise isi inguye ho,ariko aba babyeyi bo muri iri torero baje bashaka ababyariye iwabo ngo babigishe imyuga,turaza turiga tukaba twizeye ko ubuzima bugiye guhinduka,tugasaba ko badufasha kubona ibikoresho n’aho twigira,igihe tuzaba twabonye ubushobozi tukazatangira kwirwana ho.’’

Umuyobozi wa Mothers’union muri iyi diyoseze Esther Murungi yabijeje ko bazafashwa  kugira aho bigeza,bakaba bagiye kubafasha ko koperative yabo yemerwa n’amategeko,bakabaha n’aho bakorera   n’ibikoresho baba bakoresha, bazamara kugira aho bigeza bakazabacutsa kuko bazaba bigisha n’abandi.

Ati’’ twabafashe bari mu bibazo bikomeye cyane by’ubuzima turabigisha,ntibaba bamaze kugira ubumenyi ngo tubatererane ni yo mpamvu  tugiye kubashakira aho baba bakorera n’ibikoresho bakenera,kuko tugiye gufata abandi 30 na bo twigisha, turizera ko igihe bazaba hari aho bageze tuzabacutsa tukita no ku bandi.’’

Ntahomvukiye Abdoul ushinzwe imibereho myizay’abaturage u murenge wa Kamembe,avuga ko  hari bamwe mu bana batwara inda nk’izi babura gifasha bakishora mu buraya cyangwa abo babyaye bakabarwarana imirire mibi,agasaba n’abandi b’umutima mwiza gufasha abana nk’aba kimwe n’abo babyaye  kureba ko bagira imibereho myiza.

Abigishijwe ni abo mu mirenge y’umujyi wa Rusizi, Pasiteri Nyiransabimana Berthe ubakurikiranira hafi akavuga ko bagiye kugera no mu yindi mirenge ya Rusizi na Nyamasheke hakigishwa benshi bashoboka kuko abakobwa nk’aba bagenda biyongera.

Abakobwa babyariye iwabo bamaze kwiga ubudozi bari kumwe n’abana babyaye n’abayobozi banyuranye

Izindi wakunda

Bwiza.com
error: Alert: Ntabwo byemewe!!