bwiza.com
Amakuru Ubuzima

Rwamagana: Ibura ry’amazi ryatumye ijerekani y’amazi igura amafaranaga 300

Abaturage batuye mu karere ka Rwamagana mu mirenge ya Kigabiro na Muhazi bavuga ko bahangayikishijwe no kubura amazi byazamuye ibiciro by’amazi kugera naho ijerekani igura amafaranga 300 .

Abatuye mu murenge wa Kigabiro bafite amazi mu rugo bavuga ko kuyagira mu rugo ntacyo bibamariye kuko kugirango bayabone bibasaba kuyagura amafaranga 300. Ndashimiye Jean Claude avuga ko kugirango ubone amazi yo gukoresha nibura bigusaba amafaranga 900 ku munsi.

Yagize ati “Tumaze ibyumweru nka bitatu tutabona amazi kuburyo amazi kuyabona bidusaba kwishyura amafaranga 300 ku ijerikani, nkanjye iyo umunyonzi unzaniye amazi mwishyura amafaranga 900 ku munsi kuko angurisha amajerikani 300. Ntabwo tuzi ikibazo gihari turasaba ko badukemurira ikibazo cy’amazi kuko biratubangamiye cyane hari n’abaturage babura 300, kuko baguraga amazi y’ijana ariko kuko abayakeneye ari benshi abayacuruzi bazamuye ibiciro bitewe nuko bavomeraga bake batayafite mu rugo ariko ubu natwe abayafite ntacyo robine zitumariye kuko nta mazi tubona .“

Abatuye mu murenge wa Muhazi nabo binubira kutabona amazi bigatuma babona amazi abahenze

Nsengimana Jean Bosco, asanga ababishinzwe bakwiye kubafasha bagahabwa amazi meza ku batayafite ndetse n’abayahawe bahangayikishijwe no kutayabona.

Ati “Hano mu kagari kacu ka Karitutu mu mudugudu w’agatare, dufite ikibazo cyo kutabona amazi kuko abafite robine yari asanzwe aza gake ariko noneho hari n’uduce dukeneye guhabwa amazi, bibaye byiza badufasha kuko kubona amazi hano birahenze kandi amazi akenerwa mu gukora isuku no guteka iyo utayabonye ubuzima ntabwo buba bwiza, umuntu ashobora no gukuriramo indwara bitewe n’umwanda .”

Umunyabanga Nshingwabikorwa w’akarere ka Rwamagana Kakooza Henry yemeza ko ikibazo cy’amazi gihangayikishije abaturage kizakemuka bitarenze ukwezi kumwe .

Yagize ati “Ikibazo cy’amazi abura harimo gukorwa umuyoboro munini uzakemura ikibazo cy’amazi kuburyo nta kibazo cyo kubura amazi bitewe nuko hagiye gukoreshwa amatiyo azadufasha guha abaturage amazi ahagije .

Akarere ka Rwamagana ni kamwe mu turere dufite imigi ibarwa nkigomba kunganira uwa Kigali, aho kari mu turere turi guturwa kandi kazamuka mu iterambere, bivuze ko iki kibazo cy’amazi nabo bagisangiye na bamwe bo muri Kigali bahora binubira ibura ry’amazi rya hato na hato.

 

 

Izindi wakunda

1 Igitekerezo

roros 25/02/2019 1:38 pm at 1:38 pm

birakabije rwose,jye ndabihanya ntamazi namake Umudugudu:kavura,plage.,bigabiro nabandi ariko bemere ko hari n,amatiyo yagijwe n,umuhanda ibiri iri gukorwa mumudugudu wa plage, nibabanze basane ibyo bagije

Subiza

Tanga Igitekerezo

Bwiza.com
error: Alert: Ntabwo byemewe!!