bwiza.com
Amakuru mashya Featured Politiki

U Rwanda ni agati gasharira udapfa kurya gusa-Perezida Kagame

Perezida Paul Kagame yavuze ko u Rwanda ari agati gasharira ubwo yakomozaga ku bibazo byagiye bigaragara mu Ntara y’Amajyepfo, ahanini ngo bijyanye n’abaturanyi b’u Rwanda.

Ni mu kiganiro umukuru w’igihugu yagiranye n’abavuga rikumvikana bo mu Ntara y’Amjayepfo, umuhuro wabo ukaba wabereye mu Karere ka Huye kuri uyu wa Mbere Tariki ya 25 Gashyantare 2019. Umukuru w’igihugu abibutsa ko umutekano ari ngombwa kuri buri wese.

Perezida Kagame yabwiye abavuga rikumvikana bo muri iyi Ntara ko umutekano utaboneka mu bantu badakora neza, badafite nicyo bumva bakwiriye kuba barinda.

Ati “Akenshi iyo udafite icyo urinda ni nko kuvuga ngo ntacyo utakaza. Wibera aho gusa, nubishatse akangiza urebera ukamureka. Aho turi, nudafite icyo afite uyu munsi yibwira ko azakibona ejo. Umutekano uva no mu buryo abantu babana bumva neza ko bagomba gufatanya”.

Agaruka ku mutekano muke wagiye ugaragara muri iyi Ntara y’Amajyepfo, Perezida Kagame avuga ko hagiye hagaragara ibibazo bijyanye n’abaturanyi. Kandi ubundi abaturanyi bahahirana. Ariko ngo iyo akubereye mubi ugomba gukora uko ushoboye, ibyinshi ukaba wabyibonaho aho kugira ngo ubitegereze ku muturanyi.

Avuga ko u Rwanda, rwitwaye neza muri ibi bibazo by’umutekano, aho ngo byari bigamije ubushotoranyi, ati “Ibindi by’umutekano muke twabyitwayemo neza kuko byari bigamije no kudushotora. Twarakomeje turabyihorera kuko hari umurongo utararengwa. Hari igipimo umuntu agenderaho ukavuga uti iyo bitaragera aha ngaha wakomeza ukabyihorera. Niko twagiye tubigenza”.

Akomeza avuga ko ntawe ukwiriye kubana nabi mu gihe ataragerageza kubana neza. Ko igihe hakiri uburyo umuntu arakomeza akagerageza. Ariko na none ngo hari igipimo bigeraho umuntu akabishakira undi muti.

Avuga ko atarabona igihugu cyabereyemo imirwano ngo abaturage bakabyungukiramo. Ati “ Ingaruka mbi nibo zibanzirizaho mbere yuko zijya n’ahandi. Ni byiza ko ibi abaturage bacu bakomeza kubyumva, bakagira uruhare mu kwirindira umutekano”.

Umukuru w’igihugu avuga kandi ko ibibazo byaba bihari bazakomeza kubishakirwa umuti, ati “Ku rwego rw’ibihugu tuzakomeza gushaka uko twabikemura. U Rwanda ni agati gasharira udapfa kurya gusa. Ntabwo dukwiriye kwemera ko abantu batuvana mu nzira y’iterambere ngo batujyane ahandi.

Ni abavuga rikumvikana bo mu Ntara y’Amajyepfo bagera kuri 600 baganiriye n’umukuru w’Igihugu witegura no gusura abaturage bo mu Karere ka Nyamagabe ku wa Kabiri tariki ya 26 Gashyantare 2019.

Abavuga rikumvikana bagera kuri 600 bagiranye ikiganiro na Perezida Kagame/ Ifoto; Village Urugwiro

Izindi wakunda

Bwiza.com