bwiza.com
Ahabanza » Gatsibo: Bahangayikishijwe n’ibyobo byacukuwe mu nsi y’inzu batuyemo
Amakuru mu Rwanda

Gatsibo: Bahangayikishijwe n’ibyobo byacukuwe mu nsi y’inzu batuyemo

Bamwe mu baturage bo mu Mudugudu wa Kamamana, Akagari ka Mamfu, Umurenge wa Muhura ho mu Karere ka Gatsibo, bavuga ko batewe impungenge n’ubucukuzi bw’amabuye y’agaciro bwasize inzu zabo zinegetse, aho hari ibyobo bica mu nsi yazo ku buryo batekereza ko isaha n’isaha zishobora kuriduka bakahatakariza ubuzima.

Ubu bucukuzi bw’amabuye y’agaciro bukorerwa mu mpinga y’agasozi ka Kamamana. Aka gasanteri ni kamwe mu tuzwi muri aka karere kahuriragamo urujya n’uruza rw’abantu bakesha amafaranga ubwo bucukuzi, ku buryo bamwe bahitaga Kigali, izina rizwi kugeza uyu munsi.

Ubwo abanyamakuru bahageraga basanze imirimo y’ubucukuzi bw’amabuye y’agaciro ya gasegereti irimbanyije. Bamwe mu bahatuye bavuze ko abacukura bagiye bakurikira ahari amabuye y’agaciro ya gasegereti bagaca mu nsi y’inzu zabo, none ubu zisigaye zinegetse.

Nyiramaperu Josephine ni umukecuru w’imyaka 68 y’amavuko, atuye ku nkengero y’agahanda gato kari muri uyu mudugudu, inyuma, haruguru no hepfo y’inzu ye hari ibyobo bitari munsi y’icumi byacukuwemo amabuye y’agaciro, hakurya y’ako gahanda hakaba ikindi, ariko ngo byose byagiye bica mu nsi y’inzu ye.

Avuga ko iyo aryamye mu nzu aba yumva abadonda bari gucukura, akaba ahangayitse cyane ko isaha ku isaha inzu ye ishobora kuzarindimuka akahaburira ubuzima ndetse n’ubw’umwuzukuru we babana muri iyi nzu. Iyi nzu kandi ifatanye n’igikoni atekamo.

Agira ati “Ubuyobozi burabizi, inzu yanjye iraregetse, ubuyobozi bwagiye bumbwira ko abahakorera bazangurira ahandi ariko simbizi niba bwarambeshyaga cyangwa niba ari ukuri”.

Umusore witwa Sibomana ni umwe mu bacukuzi bakorera aha, avuga ko inzu y’uyu mukecuru iri hejuru y’icyo yise ikibuga, ngo kuko imyobo yacukuwe muri ibi birombe yagiye ihurira mu nsi yayo. Ati “Iyi nzu yo imeze nk’iri hejuru y’imva rwose, mbese mu nsi yayo hameze nk’ikibuga, kuko umwe yagiye aca hirya abandi hino bagatoborana, isaha ku isaha iyi nzu yarindimuka”.

Hakurya y’aka gahanda Nyiramaperu atuyeho, hari urundi rugo, ni nko muri metero zitarenze icyenda uvuye ku nzu y’uyu mukecuru [Nyiramaperu], abayibamo nabo bavuga ko bahangayitse kubera guhora bumva abacukura baciye mu nsi y’inzu yazo.

Nyiramihanda Theonille, umugore wo muri uru rugo avuga ko n’ubwo abacukura babanza gucukura bajya ikuzimu muri metero nyinshi [nka 20] ngo ntibyababuza guhangayika, ko hari igihe imvura nyinshi izagwa ubutaka bukika bakahaburira ubuzima.

Anashimangira ko batajya bavana ijisho ku bana babo bikanga ko isaha ku isaha bagwamo, ati “Baba baraciye mu nsi cyane ariko iyo barimo gucukura akanyundo tuba tukumva. Babisiga birangaye ku buryo tudashobora kuvana ijisho ku bana bacu, erega bagwamo bakahaburira ubuzima”.

Umuyobozi w’akarere ka Gatsibo Richard Gasana avuga ko ubu bucukuzi bwagiye bukorwa mu buryo bunyuranyije n’amategeko, bityo ko ku bufatanye n’inzego z’umutekano bari guhangana n’iki kibazo gihangayikishije ubuyobozi.

Ati “Rimwe na rimwe biragorana kumenya uwahacukuye, kubera ko bacukura bitemewe n’amategeko. Biba bigoranye kumenya uwabikoze, noneho Leta igasigarana umutwaro wo kwimura abaturage byagizeho ingaruka”.

Akomeza avuga ko baganiriye n’ubuyobozi bw’Ikigo cy’Igihugu gishinzwe ubucukuzi bw’Amabuye y’Agaciro na Mine (RMB) kibasaba gushyira abacukuzi muri za Koperative, kikabona kubaha ibyangombwa bibemerera gucukura mu buryo bwemewe n’amategeko. Ubu bakaba bamaze kwibumbira muri koperative eshashatu.

Ku bijyanye n’ibyo byobo avuga ko bizasibwa n’abazahabwa ibyangombwa byo kuhacukura n’ubwo ngo bigeze gukorerayo umuganda wo kubisiba.

Inzu yasigaye hagati y’ibyobo bacukuramo amabuye y’agaciro, buca mu nsi yayo

Izindi wakunda

Bwiza.com