bwiza.com
Ahabanza » Ibitekerezo 3 by’ubucuruzi mu Rwanda no muri Africa byabyarira inyungu
Amakuru IBYEGERANYO Politiki

Ibitekerezo 3 by’ubucuruzi mu Rwanda no muri Africa byabyarira inyungu

Urubyiruko ndetse n’abakuze bifuza kwiteza imbere bakunze kugira ikibazo cyo kutamenya ibitekerezo byavamo inyungu ikomeye kuri bo ndetse n’abo baba bakoresha. Usanga abenshi bajya gutangira ubucuruzi bakigana ibyo babona bisanzwe bikorwa, abantu benshi bakisanga bakora ibintu bimwe bose, nta gashya.

Ibitekerezo bikurikira ni ibitekerezo byerekana ibibazo biri mu bucuruzi ndetse n’uko byakemurwa, ubikemuye akabyungukiramo.

Imyidagaduro kw’isi ni ubucuruzi bwinjiza amamiliyari y’amadolari ku mwaka. Muri Africa by’umwihariko ni ubucuruzi bwinjiza miliyari 50 z’amadolari ndetse bugatanga akazi ku bantu benshi. Birateganya ko uyu mubare uzakomeza kwiyongera uko n’urubyiruko rw’Afrika rwiyongera kandi rukenera kwidagadura.

FILIME

Uruganda rwa filime muri Nigeria rwinjiza asaga miliyoni 800 z’amadolari rukaba urwa mbere muri Africa, rwinjiza menshi. Rukora filime zisaga 2,000 ku mwaka. Muri Afrika ibyo gutunganya filime muri rusange biracyari hasi aho hakirimo ibibazo byo kutagira igishoro ndetse n’uburyo filime zigezwa ku bantu bikaba bikirimo ikibazo. Inyigo yakozwe na BBC yerekana ko gutunganya filime nyafurika bitwara hagati ya miliyoni 22 na miliyoni 66 z’amanyarwanda.

Igitekerezo cyabyara inyungu cya mbere, hano ni ugukora uburyo filime zagera ku bantu benshi bashoboka, binyuze kuri Televiziyo cyangwa se kuri Telephone kuri ubu zitunzwe na benshi muri Africa. Umunyanigeria witwa Jason Njoku uba mu bwongereza yagerageje iki gitekerezo muri 2010 atangiza icyo yise IROKOTV, bukaba uburyo abantu batunze telephone bashobora kureba filime zikorerwa muri Nigeria batarinze kugura DVD. Uyu mushinga waje gukundwa cyane ndetse kuri ubu winjiza miliyoni imwe y’amadolari asaga miliyoni 900 z’amanyarwanda ku kwezi.

Ibi bikozwe mu Rwanda kuri filime z’inyarwanda byabyara inyungu kuko u Rwanda narwo rugifite ikibazo cy’uburyo filime zagera ku bantu benshi bashoboka.

Igitekerezo cya kabiri, ni aho kurebera filime (movie theaters), kuri ubu mu Rwanda no muri Africa muri rusange aho kurebera filime haracyari hacye bikabije ugereranije n’umubare w’abaturage. Urugero muri leta zunze ubumwe za Amerika hari aho kurebera filime 40,000, mu buhinde 20,000, mu bushinwa hakaba 13,000. Muri Africa twe dufite aho kurebera filime hatageze ku 1,000! Mu gihe Africa ituwe n’abaturage miliyari imwe irenga. Ibi bisobanuye ko abaturage miliyoni bafite aho kurebera filime hamwe gusa. Ugereranije nuko cinema ikura buri mwaka muri Africa hakenewe kubakwa ahareberwa filime nibura 1,000 ku mwaka.

Iki ni ikibazo cyavamo inyungu nyinshi ku bagikemura, ibi ariko ntibisaba kubaka inzu ihambaye abantu bareberamo filime nubwo nazo zikenewe mu mijyi, ahubwo nuwajya akodesha aho yerekanira filime mu byaro kuko ariho abaturage benshi babarizwa yakunguka. Ndetse anashoboye yajya ashinga igisharagati bakagitunganya neza ku buryo kireberwamo filime, yarangira akabasha kukimura byoroshye akakijyana ahandi.

IMYIDAGADURO

Igitekerezo cya gatatu, ni ukubaka ahantu urubyiruko ruhurira rukaganira rukanidagadura, iyo nzu ikaba irimo ibibuga bya basket n’indi mikino, akabari, restaurant byose bikabamo imbere. Ni uburyo bwatangiye gukoreshwa hirya no hino muri Africa ariko biracyari hasi cyane ugereranije n’uko abaturage cyane cyane urubyiruko rwiyongera umunsi ku wundi.

Ubu ni uburyo butatu abashaka kwiteza imbere baheraho, bukenewe muri iki gihe mu Rwanda n’ahandi muri Africa. Gutangira bisaba gutinyuka n’igishoro, ariko no kumenya neza no kumva imiterere y’ ibyo umuntu ashaka gutangira, niba koko bikenewe cyangwa byaramba. Ababishoboye bahera kuri ibi bitekerezo twabonye.

Izindi wakunda

Bwiza.com
error: Ntibyemewe