bwiza.com
IBITEKEREZO Inkuru zicukumbuye

Igitekerezo : Perezida Paul Kagame muri twegerane

Mbyukanye akanyamuneza, ibyishimo n’isheja, mwenyura nseka kubera uburyo mutangiye kwibaza uko perezida Paul Kagame yagendera muri twegerane kandi afite uburyo bugenwa n’itegeko uko arindwa, ibimugenerwa kubera umutekano we, birimo imodoka nziza zirimo n’imitamenwa kuburyo utapfa kumuhangara.

Ndabizi amatsiko yabishe kuko hari abatangiye gukeka ko aherutse kureka iyo mitamenwa y’ibimodoka binabereye ijisho aho anyuze hose bigendana umuvuduko nk’indege ku butaka maze agatega twegerane, zazindi za Col Dodo zuzuye Nyabugogo zigana iyooooo mu ntara.

Hari n’abatangiye gukeka ko ari muri cya kiganiro kitagira uko gisa, twegerane cyo kucyumweru mu gitondo gihuza abaturage n’abanyamakuru kuri radio Rwanda. Ikiganiro gisabanisha abaturage bagatanga intashyo no gusaba indirimbo bishakiye.

Mbamaze amatsiko rero haba muri Twegerane ya Dodo haba ndetse no mu kuganiro twegerane cya Radio Rwanda, nta na hamwe nigeze mbona Perezida Kagame usibye ahantu hamwe nsanzwe mubona cyangwa nkamwumva hirya no hino mu ntara ajyanywe no kwegera abaturage ariko nabo bakamwegera. Aha yegera abaturage abagezaho inama n’imiburo kuri gahunda zitandukanye za leta abaturage nabo bakamwegera batanga ibitekerezo byabo ariko ahanini batanga ibibazo bikomeye bafite, bishingiye ahanini ku karengane bagirirwa n’abagize inzego z’ibanze.

Ubwo Perezida Kagame yari mu karere ka Nyamagabe

Aho Perezida Kagame yagiye hose mu ntara, uko niko nagiye numva byifashe!

Ubundi kwegera abaturage, ni rimwe mu mahame agenga imiyoborere myiza, na rimwe mu biranga umuyobozi mwiza. Iyo unuyobozi yegereye abaturage barushaho gusabana, kuganira, kubwizanya ukuri ku buzima rusange bw’igihugu. Bigaragaza kandi isano riri hagati y’uyobora n’uyoborwa. Bishobora no kugaragaza igipimo cy’imiyoborere niba ari cyiza, giciriritse cyangwa kiri hasi. Kwegerana! Nkuko nari mbivuze hejuru muri uko kwegerana ubwo buryo bwo kwegerana byerekana mu buryo bubiri imikoranire hagati y’uyobora n’uyoborwa.

Iyo umuyobozi gusura abaturage ni inshingano ikomeye cyane kuko usibye nibyo bituma amenya uko abaturage babayeho, nuko bahumeka ubuyobozi. Abaturage batari bake baturuka imihanda yose bakora ingendo ndende bazanywe no kubwira umukuru w’igihugu, akarengane bakorewe n’ababayobora. Iki gice kireba ubwo bwisanzure bw’abaturage nicyo bishimira muri izi nzinduko kuko akenshi abaturage bataha basubijwe, banyuzwe. Ariko kandi n’igice kitorohera abayobozi b’inzego zibanze kugeza ndetse no ku baminisitiri barebwa n’ibibazo biba byagaragajwe n’abaturage. Niho usanga, abo bayobozi batitizwa n’izo nzinduko nkuko twagiye tubyumva hirya no hino hari abafatirwa ibyemezo bikakaye utaretse no gusebera imbere y’abaturage.

Isomo umuntu yakuramo ni irihe?

Kwegera abaturage ni umuco mwiza utuma ukundwa n’abo uyobora. Kuko bikorwa mu buryo bubiri, mu nama y’igihugu y’umushyikirano no gusanga abaturage aho batuye. Ubu buryo iyo utereye ijisho hafi hano mu karere bishobora kuba umwihariko w’u Rwanda. Kuruhande rw’abaturage ari naho handaje ishinga nuko ibibazo by’ingutu usanga byarabarenze ahanini biterwa n’ababayobora kuko iyo batareze Mayor, umunyamabanshigwabikorwa w’umurenge, akagari cyangwa umudugudu, uyobora ingabo cyangwa polisi, bagaragaza n’akarengane bakorewe mu rwego rw’ubutabera.

Ibi rero bikantera kwibaza, uzarenganura abaturage mu gihe Umukuru w’igihugu atabasuye! Birashoboka ko ibibazo nk’ibyo bizajya bihora bitegereza umukuru w’igihugu kuzaza kubikemura?

Yaba Perezida Kagame yasomaga iyi nkuru nari kumumenyesha, nubwo asanzwe abizi, ko no muri ubwo buryo haba harimo itekinika. Iyo hari gahunda nkiyo, inzego zishinzwe gutegura uruzinduko zegeranya akenshi ibibazo bigaragara ahazasurwa kandi bakerekana iberebana n’amashimwe, ibyiza byagezweho gusa. Ibi nabyo nibyiza ariko kuko ukoma urusyo akoma n’ingasire, bakagombye no kugaragaza ibirebana n’akarengane abaturage bagirirwa kugira ngo Umukuru w’igihugu ahagere afite inshusho nyayo y’aho hantu. Nanavuga kandi ko inzego cyangwa abayobozi barenganya abaturage muri iryo tekinika bishyira hamwe bagakingirana ikibaba bagamije guhishira iby’akarengane gakorerwa abaturage.

Umuntu umwe niwe wigeze kuvuga ngo ntawafata icyuma ngo yikegete ijosi, bikumvikana ko abo barenganya abaturage bitapfa koroha kwemera ko bageza akarengane kabo ku umukuru w’igihugu. Ku murongo w’abaje kubaza ibibazo umurongo wa mbere hagashyirwa abashima, bavuga ibyiza byakozwe, inyuma bagakumira abaturage baba bashaka kuvuga kubibazo by’ingutu bakabakumira ari nabo ubona barwana babyigana ku murongo. Abo rimwe na rimwe bavuga ko basaze bakaba badashobora kubaza.

Ibi binyibukije igihe kimwe muri Nyabihu, umuturage nk’uwo bakumiriye bamuhinduye umusazi kuko yashakaga kugeza ku muyobozi wari wahasuye, akarengane yagiriwe n’umuyobozi w’u rwego runaka wakoraga aho wamutewe inda ari umugore wubatse, umugabo we akamusenda noneho n’uwamuteye ntamufashe cyangwa ngo afashe umwana we.

Nkumva bariya baturage barwanira kujya ku murongo w’ababaza inyuma baba bakwiye kujya bitabwaho kuko aribo bashobora kwereka ishusho nyayo y’ahasuwe. Twibutse ko hari abaturage nkabo baba baraye bagenda ijoro ryose cyangwa bagatega baturutse kure bazanywe ko gutura ibibazo umukuru w’igihugu.

Perezida Kagame ubwo yahuraga n’urubyiruko umwaka ushize

Umuti waba uwuhe?

Mu rwego rwo kungurana ibitekerezo, nta rutonde nzanye rw’uko ibi bibazo byakemuka. Gusa natunze agatoki kuri ubwo buryo bw’itekinika ariko nkumva hakwiriye ubundi buryo bw’ikoranabuhanga abaturage bakoresha bwatuma ibibazo byabo bimenyekana bidaciye mu nzira zisanzwe zimenyerewe. Ikibazo ntafitiye igisubizo n’ukwibaza nti ese umukuru w’igihugu yabasha gusoma no gukemura ibyo bibazo byose by’igihugu? Biragoye cyangwa ntibishoboka! Keretse hashyizweho abantu babishinzwe, bakabyegeranya ibishoboka bakabikemura ibindi bakabigeza k’Umukuru w’Igihugu.

Iki kibazo kikabyara ikindi kibazo nacyo ntabasha gusubiza, ese abo bakozi bo ntibanyonga ibyo bibazo byatanzwe bagamije gukingira ikibaba abaregwa, cyangwa bakabinyonga kubera icyenewabo? Uko byagenda kose hashyizweho uwo muyoboro mu gihe Umukuru w’igihugu asuye ahantu umuturage abajije ikibazo bakamubaza aho ikibazo cye yakigejeje harimo no kukinyuza muri uwo muyoboro. Ibi byakanga abakozi bashinzwe uwo muyoboro kuko nabo bishobora kubahitana.

Ikindi gikwiriye kumenyekana n’akarengane gakorerwa bamwe mu bayobozi bagakorewe n’abandi bayobozi bakagombye kubarengera. Aba bo ntibakunze kugaragara kuko ntawahangara kujya muri twegerane bakurikiye umukuru w’igihugu bakajya ku murongo babaza nk’abaturage basanzwe. Nta numwe ndumva wabikoze! Ese nuko akarengane ko muri ubwo bwoko kadahari? Bo ninde ushinzwe kubarenganura? Mu buhe buryo? Bapfiriye mu mitima babuze kirengera bicazwa kugatebe kandi bafite ubushobozi bwo gukorera igihugu.

Ingaruka ni uko baba mu igihugu bameze nka za nyeshyama zo mu mitima nigeze kwandikaho abandi bagafata iy’ubuhungiro bakarwanya leta cyangwa ntibayirwanye bitewe n’ibikomerezwa bikuviraho inda imwe. Nkunze kuvuga ko ari abayobozi b’inzego zibanze ari n’abo ku rwego rwisumbuye barenganya umwenegihugu ntaho ataniye n’umwanzi urwanya u Rwanda.

Ikindi nuko abarenganya abaturage bagomba gucisha make, kuko iby’isi ari gatebe gatoki kandi bakamenya ko nta gahora gahanze, bakareka kwiremereza, kwikakanya no kwikomeza. None se biyibagije bagenzi babo mu gihe runaka bari bakomeye ubu bakaba baribagiranye? Dore aho nibereye aha, bitinde bitebuke abarenganya abandi nabo bazarenganywa bisange bangaye, baturumbutse kandi sibyo mbifuriza.

Reka twegerane yogere hose bityo amahoro asagambe iwacu i Rwanda.

Munyakayanza Samuel

Izindi wakunda

Bwiza.com