bwiza.com
Ahabanza » Kigali: Rev. Past Usabwimana Samuel wayoboye ADEPR ashinjwa gusiga yakije umuriro mu muryango we
Featured Umuryango

Kigali: Rev. Past Usabwimana Samuel wayoboye ADEPR ashinjwa gusiga yakije umuriro mu muryango we

Ibi ni ibivugwa n’abaturage bo mu kagari ka Kamuhoza, Umurenge wa Kimisagara, Akarere ka Nyarugenge, ku bibazo biri muri uyu mu muryango wa Njyamubiri Ezechias na Mukarusagara Adele bamaze kwitaba Imana, ariko ukaba uhagarariwe na Usabwimana Samuel, wari umuyobozi wa ADEPER akaza kubuvanwaho ajya kuba mu Bubiligi. Uyu muryango kuri ubu urimo ibibazo bishingiye ku mitungo yasizwe n’ababyeyi.

Umuryango wa Njyamubiri ugizwe n’abana Batanu, aribo Usabwimana Samuel akaba n’umukuru w’umuryango, Musonera Leonard ari na we wabuze aho kuba, Njyamubiri Jean D’amour ariwe uri mu mitungo bivugwa ko yasizwe n’abayeyi, Mariya Mukamusoni , Uwimbabazi Veronique na Umurerwa Jeanne d’arc. Mu bagize uyu muryango babiri nibo baba mu Rwanda abandi baba mu mahanga ngo bakaba barasabye ababa mu Rwanda kubana neza mu mitungo igizwe n’amazu 19.

Uyu muryango urazwi cyane, ukaba uzwi nk’uwizeraga Imana cyane, abaturanyi n’abavukiye Kimisagara bavuga ko uyu muryango waje kuhatura uvuye mu buhunzi mu 1966 , bose bahuriza ku kuba ari umuryango wari wifashije kugeza n’ubu , bakibaza impamvu uyu muryango urimo umwiryane ushingiye ku butunzi.

Bimwe mu ibibazo abaturanyi n’abazi uyu muryango bibaza

*Iyo Njyamubiri Ezechias aba akiriho yari kwicwa n’agahinda

*Njyamubiri ajya gupfa yarababwiye ngo mbasigiye amahoro

*Byose ni Samuel , umukuru w’umuryango udakemura ibibazo yawusizemo

*Ubuyobozi bukwiye gukemura iki kibazo kuko nticyari gikwiye kuba cyagera aha

Abaturanyi bavuga ko umusaza Njyamubiri ajya gupfa yabwiye abana be, ati “Mbasigiye amahoro, muzabane amahoro mwe ubwanyu ndetse n’abantu bose”. Undi ati “ Iyo Njyamubiri aba akiriho yari kwicwa n’agahinda.” Abaturanyi bagaruka kandi kuri Usabwimana Samuel, bamwe bavuga ko yahunze, akigira mu Bubiligi agasiga yakije umuriro yakabaye azimya.

Musonera Leonard

Musonera Leonard wavutse mu 1958, aganira na Bwiza.com, yavuze ko yimwe n’umuvandimwe we Njyamubiri Jean D’amour aho kuba, yavugaga ko akeneye ubuvugizi akaba yarenganurwa akagira uburenganzira ku mitungo yasizwe n’ababyeyi be, bitewe n’uko umuvandimwe yayihariye ndetse akaba abona byihishwe inyuma na mukuru we Usabwimana Samuel ufatwa nk’umukuru w’umuryango , wigendeye atabikemuye kugeza ubu ibintu bikaba bikomeje kuba bibi.

Yavuze ko yagiye mu bunzi agatsinda ndetse akajya mu Rukiko rw’Ibanze n’Urwisumbuye hose agatsinda ariko hose bikarangira imyanzuro y’urukiko iteshejwe agaciro.

Abaturage baganiriye na Bwiza.com bagaragaza amarangamutima bafite kuri iki kibazo , aho abenshi bashimangira ko umurava warangaga Njyamubiri wakagombye kuranga abana be. Uyu ati “Twatunguwe n’ukuntu abana be baryanira mu mitungo yabasigiye, Njyamubiri yari umuntu mwiza, birababaje kubona uwakabaye umukuru w’umuryango ntacyo yigeze akora ahubwo yarigiriye mu Bubiligi none n’ubuyobozi ntacyo bukora ngo ibi bibazo bimaze imyaka Umunani bikemuke.”

Ubwo umunyamakuru wa Bwiza.com yageraga mu Mudugudu wa Kamuhoza, akagari Kamuhoza Tariki ya 18, Gashyantare 2019, imbere y’igipangu cyo kwa Njyamubiri, harunze ibintu byinshi birimo ibiryamirwa n’ibikoresho byo mu rugo birunze ku muhanda imbere y’urugo. Aha kandi hari abaturage benshi ndetse n’abayobozi barimo umuyobozi w’akagari, bose bari ku muhanda aharunze ibintu bavuga ko bahararanye na Musonera Leonard uvuga ko yabuze aho kuba ndetse yirukanwe mu nzu kubera kubura ubwishyu.

Ibintu bya Musonera ubwo byari hanze y’igipangu kiwabo

Mu kiganiro yagiranye na Mukasangwa Marie, avuga ko ikibazo gihari ari icy’abavandimwe bapfa imitungo ahanini giturutse ku kuba umwe mu bahungu ba Njyamubiri yarikubiye imitungo y’umuryango, hanyuma mukuru we Musonera Leonard akaba yarabuze aho aba.

Ati “Kuva mu 1980 nari ntuye hano, abasaza n’abakecuru narabahasanze , nsanga Musonera ariwe ubana n’ababyeyi, uyu uba mu mitungo nta n’ubwo yari ahari kuko yaje anasanga mukecuru wabo yarapfuye. Ntitwumva uko uyu Musonera wabanye n’ababyeyi, akabafasha muri byose akaba ari ku gasozi undi ayirimo wenyine, ntitwumva impamvu ubuyobozi budakemura iki kibazo”.

Mukarurangwa we abona ubuyobozi bukwiye kugira icyo bukemura kuko bisebetse kubona umuntu umwe yiharira umutungo ugizwe n’amazu arenga 19 undi akaba yandagaye ku gasozi .

Gakuba Haruna utuye mu Murenge wa Kimisagara, avuga ko yaherekezaga Musonera mu manza zose yagiye aburanamo na murumuna we, Njyamubiri Jean D’amour, ahereye mu bunzi no mu Rukiko rw’Ibanze n’Urwisumbuye, aha hose ngo uyu Musonera yagiye atsinda ariko kuva icyo gihe nta kirahinduka ahubwo agakomeza gusiragizwa.

Uyu Haruna avuga ko atumva impamvu uru rubanza rutarangizwa ashingiye ku kuba uyu Musonera yaratsinze mu nkiko bagiye bajyamo, byongeye uyu Musonera akaba ariwe wabanye n’ababyeyi mu gihe cya Jenoside, ubwo bafungwaga mu byitso by’Inkotanyi kugeza aho umwe mu bavandimwe be yicwa muri Jenoside yakorewe Abatutsi, Musonera akarokoka agakomeza kubitaho.

Haruna ati “ Njye mbona iki kibazo cyoroshye , ariko ipfundo riri kuri Usabwimana Samuel wagiye mu Bubiligi adakemuye ikibazo cyari kiri mu muryango kugeza na n’ubu akaba yibera mu mahanga barumuna be bakaba bakomeje kuryanira mu mitungo bitari ngombwa, njye nagiye mperekeza uyu Musonera, yagiye atsinda rwose, ariko ubu sinzi impamvu ubuyobozi butadufasha ngo bikemuke.”

Umunyamabanga Nshingwabikorwa w’Akagari ka Kamuhoza, Musoni Kalisa

Umunyamabanga Nshingwabikorwa w’Akagari ka Kamuhoza, Musoni Kalisa, avuga ko iki kibazo akizi ko n’ubwo ahamaze umwaka n’ubundi yahageze akihasanga. Avuga ko kikigoranye kuko yasanze hari umwanzuro umwe w’abunzi wo mu 2011 wavugaga ko Musonera azajya ahabwa ibihumbi 85 hanyuma agategereza igihe umuryango wose uzateranira ugakemura iki kibazo kugeza na n’ubu ukaba utari waterana.

Uyu muyobozi avuga ko iki kibazo kikigoye , ariko na none akabona cyoroshye igihe uyu mukuru w’umuryango yaba abonetse. Uba mu nzu niwe muto [Jean D’amour Njyamubiri], we avuga ko nta kindi yakora mu gihe umukuru w’umuryango cyangwa umuryango wose utarafata umwanzuro.

Ati “ N’ubwo ntafata umwanzuro, ku bwanjye mbona nta mpamvu umuturage Musonera yaba hanze, ubundi niyo yahabwa inzu imwe mu nzu 19 z’umuryango, ubundi hagategerezwa inkiko cyangwa guterana k’umuryango byaba byoroshye.”

Uyu muyobozi w’akagari yumva Njyamubiri Jean D’amour akwiye gushaka aho uyu muvandimwe we aba, ngo birababaje kumubona ku gasozi n’abana n’ibintu kandi iwabo hari amazu 19.

Inteko y’abunzi yarabikemuye biba iby’ubusa hitabazwa inkiko

Byabaye ngombwa ko umuyobozi w’Umurenge wa Kimigagara ahagera

Umuyobozi w’umurenge wa Kimisagara, Havuguziga Charles, yahageze Saa kumi n’imwe n’igice, na we ashaka uko yagikemura ariko ahagera asanga n’ubundi hari inzego zagerageje ariko Njyamuri Jean D’amour yabatsembeye.

Imbere y’abaturage bari bararanye hanze ndetse birirwana n’uyu muryango wabuze aho kuba, yashatse uburyo yahuza aba bavandimwe n’abaturage kuba bafatanya bagashaka uko uyu muryango wari waraye hanze ndetse ukahirirwa wabonerwa aho kuba mu maguru mashya.

Hahamagawe Njyamubiri Jean D’amour ndetse na mukuru we Musonera kimwe n’abaturage ngo babikemure maze Njyamubiri avuga ko yabatsembeye kandi ko nta kindi barenzaho usibye gukomeza kumwishyurira inzu ku mafaranga ibihumbi 85000, ariko biza kugaragara ko hari aho atayishyuye neza bituma uyu Musonera yirukanwa mu nzu kubera kubura ubwishyu.

Aha rero niho hajeho imibare kuva mu 2011 kugeza 2019 harebwa inyemeza bwishyu baza gusanga harimo ibihumbi 390.000 bitishyuwe byanaviriyemo uyu Musonera kwirukanwa mu nzu.

Umuyobozi w’umurenge yasabye Njyamubiri kwishyura ayo mafaranga hagashakwa inzu uyu muvandimwe yaba acumbitsemo hagategerezwa umukuru w’umuryango, kuko bavugaga ko azahagera ku wa Gatanu tariki 22 Gashyantare 2019, cyangwa ibyemezo by’inkiko. Uyu Njyamubiri yababwiye ko ntayo yakwishyura, abwirwa ko natayishyura byanze bikunze agomba gucumbikira umuvandimwe we.

Ubuyobozi bwakomeje gusaba Njyamubiri Jean D’amour kuba yafasha umuvandimwe akamuha aho kuba arabyanga ,akavuga ko ntacyo yamumarira usibye gutegereza umukuru w’umuryango, ikiba zo cyarakomeje kugeza saa yine n’igice z’ijoro 22h :30 nibwo uyu Njyamubiri yaje kwemera guha icumbi umuvandimwe we icumbi ry’umunsi umwe ubundi bugacya agenda . Musonera Leonard yasabwe ko ijoro rimwe ariryo yemerewe ubundi bugacya ashaka ahandi yerekeza.

Inteko y’Abunzi yategetse Usabwimana Samuel gukemura ikibazo cyari mu muryango agenda atagikemuye

Kuva Tariki ya 19 Gashyantare 2019, Musonera Leonard yanze gusohoka muri rya cumbi yari yataijwe umunsi umwe. Mu kiganiro bwiza.com yagiranye na Njyamubiri Jean D’amour imubaza uko iki kibazo giteye, niba koko yaba arenganya mukuru we nkuko abishinjwa n’abaturage ndetse na mukuru we Musonera , yavuze ko ikibazo kiri hafi kugera ku musozo kandi ko atarenganya mukuru we ndetse nta nicyo yaba amushakaho.

Ati “Iki kibazo kiri hafi kugera ku musozo kuko dutegereje imyanzuro y’urukiko, turi gushaka uko yabona umugabane we, gusa na we agenda abisubiza inyuma kuko yatureze mu Mudugudu, mu Kagari, mu Murenge no mu Karere ndetse hose avuga ko dutanga ruswa muri izo nzego.”

N’ubwo na we aba mu by’umuyango, Njyamubiri yakomeje avuga ko ikibazo cyabo kirimo gukemuka ndetse bageze aho kugabana ariko ko akavuga ko uyu Musonera yagurishije ibintu bye akaba ashaka n’iby’umuryango bityo akabona ahubwo bimaze kurenga umugabane we yakagombye kubona, Jean D’amour kandi yemeza ko baburanye bagatsinda mu nkiko mu gihe kandi bwiza ifite kopi zigaragaza ko Musonera ariwe wagiye atsinda kuva mu bunzi no mu Rukiko rw’ibanze ndetse n’urwisumbuye kugeza naho Usabwimana Samuel yasabwe kuba yamaze kubikemura mu gihe kitarenze imyaka itatu ariko ubu hakaba hashize imyaka 6.

Iki kibazo kikaba kitezwe gukemurirwa hagati y’umuryango mu gihe Rev. Past Usabwimana Samuel yaba agarutse akawuhuza cyangwa bakerekeza mu nkiko bundi bushya, cyangwa hakagaragazwa ibaruwa yasizwe na muzehe, Njyamubiri Ezechias, ibi kandi  Jean D’amour Njyamubiri nawe avuga ko ntakemezo yafata kidafashwe n’umukuru w’umuryango .

Mu nkuru yacu y’ubutaha tuzabagezaho ibyerekeye inkiko n’uburyo hari aho abaturage bakemanga inkiko bashinja kudakemura ikibazo mu gihe uyu Musonera yaburanye na murumuna we bikarangira atsinze ariko ntibigire icyo bitanga. Tunagerageza kuvugisha Rev .Past usabwimana Samunel ngo twumva icyo avuga kuri iki kibazo.

Musonera Leonard nabwo yari yatsinze mu Urukiko

Izindi wakunda

Bwiza.com