bwiza.com
Ahabanza » Muhanga: Umuveterineri umwe muri12 ni we ufite ubumenyi bwo kumenya inka ihaka
Amakuru mu Rwanda

Muhanga: Umuveterineri umwe muri12 ni we ufite ubumenyi bwo kumenya inka ihaka

Abavuzi b’amatungo bakorera mu Karere ka Muhanga barasaba guhabwa ubumenyi bwo kumenya inka yimye, mu gihe iyo barimo gushaka inka zo gutanga muri gahunda ya Girinka usanga basabwa gushaka ihaka bikaba ngombwa ko hitabazwa abaveterineri b’ahandi.

Ushinzwe  ubworozi mu murenge wa Kiyumba, Gasengayire  Francine, avuga ko ubu muri gahunda yo koroza abaturage muri gahunda ya Girinka hafashwe gahunda ko hazajya hashakwa inka zo muri aka gace zihamenyereye kandi zigomba kuba zifite amezi .

Uku kuba badafite ubumenyi bwo kumenya inyana yimye bigira n’igihombo ku baturage kuko hari uba ayifite yanayigurirwa ku mafaranga menshi ugasanga bamuhaye make.

Agira ati “Nk’ubu iyo igihe kigeze cyo gutanga inka batanga amatangazo wa mworozi ayifite ihaka yaza akabivuga tukamurebera na we akabona amafaranga yo kwikenuza ariko natwe ntabwo dufite ubwo bumenyi bwo kumenya inka ihaka.”

Uhoranyeneza Clément avuga ko bafite ubumenyi bucyeya mu kumenya uko bapima amaraso bakabona ko inka ihaka ariko kuko batabizi bamenya ko inka ihaka ari uko we abibwiriye ko yayijyanye ku kimasa cyangwa bayimutereye intanga.

Agira ati “Kumenya ko amezi yayo yafashe ni uko iba imaze iminsi 21 itarongera kurinda ubwo duhita twumva ko yamaze kwima nyamara si byo hari ubwo tubyibwira gutyo nyuma y’amezi angahe ukabona irongeye irarinze, byaba byiza Leta irebye uko iduhugura tukabimenya wenda n’iyo batubwira kuzifata amaraso tukayazana ku karere bazayapima bya bisubizo tukabishyira abaturage nibura bakamenya ibisubizo by’inka zabo».

Umuyobozi w’Ishami ry’Ubuhinzi n’Ubworozi mu karere ka Muhanga, Ngume mbarebe Thacien, na we yemeza ko ubu bumenyi bukenewe kuko  kuba inka yaba ihaka umuntu atabimenya gusa akoresheje ijisho ,ahubwo ngo bisaba ko akoramo akamenya ko ari byo ayo mezi iyafite.

Avuga ko nk’abaveterineri bashinzwe no kuzikurikirana umunsi ku wundi ari byiza ko baba bafite ubumenyi, uyu muyobozi avuga ko batangiye gushaka ubushobozi bwo kuba bahugurwa.

Agihra ati “twabanje kubahugura ayo gutera intanga ubu rero ayo kumenya ko inka ihaka bimara iminsi ine, turimo gushaka ubushobozi nitumara kububona tuzahamagara RAB ize ibahugure kuko ntitwajya kubahugura tutaranababonera ibikoresho , ibyo kubatunga ,ibyo nibyo turimo gutegura ngo tubahugure kuko ubu bumenyi bugrakenewe.”

Kugeza ubu mu karere ka Muhanga habarurwa abaveterineri 12 b’abakozi b’akarere,  umwe muri bo akaba ari we usobanukiwe uko bamenya inka ihaka .kuri aba hiyongera abarenga 30 bigenga.

Izindi wakunda

Bwiza.com