bwiza.com
Ahabanza » Muhima: Ibyiciro by’ubudehe byagombye guhera mu masibo
Amakuru mu Rwanda

Muhima: Ibyiciro by’ubudehe byagombye guhera mu masibo

Abaturage bagize utugari twose tw’Umurenge wa Muhima bamaze iminsi baraza inkera y’abahizi, aho baganira ku muco no ku bindi bibazo bibugarije. Akagari ka Rugenge niko kaheturiye utundi kuri uyu wa Gatandatu tariki ya 23 Gashyantare 2019, aho ubuyobozi bw’umurenge buvuga ko hatahiwe imidugudu n’amasibo, ari naho hatangirwa amakuru yose, arimo n’areba ivugururwa ry’ibyiciro by’ubudehe.

Rugenge niko kagari gaheturiwemo inkera y’abahizi mu murenge wa Muhima. Abaturage bose babukereye, bamwe mu bayobozi bambaye gitore, bahuje urugwiro. Mu gitaramo kiganjemo kuganira ku muco nyarwanda, harimo no kuremera abaturanyi babikeneye, ndetse no kwibutsa iby’ubukwe bwa kera, uko abageni batwikururwaga.

Umunyamabanga Nshingwabikorwa w’uyu murenge, Mukandori Grace avuga ko kubaka itorero ku nzego zose ari imwe mu nzira zo guhuza abayobozi n’abaturage. Ati, “Iterambere ryose rigomba gushingira ku isibo, ibitaramo nk’ibi bizakomeza ku rwego rw’umudugudu ndetse bigere no ku masibo mu ngamba zose uko ari esheshatu. Imihigo, ibikorwa by’iterambere, amakuru yose arebana n’ibyiciro by’ubudehe agomba gutangirwa mu masibo”.

Abaturage bashaka ko ibyiciro by’ubudehe bivugururwa

Gitifu Mukandori avuga ko abaturage ba Muhima bashaka ko amakuru y’umwimerere azajya aguma mu masibo, rwa rwitwazo rw’uko byahindukiye mu mashini rukavaho.

Akomeza agira ati, “Bashaka ko ibyiciro byava kuri bine bikaba bitanu, ariko icya mbere kikabamo A na B. Wa muturage ufashwa utazagira aho yigeza abe muri A, naho afashwa afite imbaraga akajya muri B”.

Ahandi mu gihugu, bashaka ko isuzumwa ry’ibyiciro by’ubudehe ryajya rikorerwa ku mudugudu, ufashwa adatera imbere akavanwa ku rutonde nyuma y’imyaka itatu. Gahunda yo kuvugurura ibyiciro by’ubudehe yatangijwe muri iki cyumweru na Minisiteri y’Ubutegetsi bw’igihugu.

Dore zimwe mu mpamvu zitangwa:

Kuba imibare y’abaturage bigaragara ko bivanye mu bukene bukabije ikiri hasi, bava mu byiciro byo hasi bazamuka, kandi Leta yarashoye amafaranga muri gahunda zo kurengera abatishoboye zigamije guhindura imibereho yabo. Urugero: Kuva mu mwaka wa 2013/2014 ubukene bukabije bwavuye kuri 16.3% bugera kuri 16% muri 2016/2017;

Kongera umubare w’ibishingirwaho (criteria) mu  gushyira abaturage mu byiciro bikajyanishwa n’igihe;

Kwigira hamwe uko ubudehe bwakoreshwa nk’inzira yo kwikemurira ibibazo ku mudugudu, gufashanya kwiteza imbere no kwigira nk’uko byahoze mu muco nyarwanda;

Kuba gahunda zo kurwanya ubukene bisa n’ibyahariwe Leta n’abafatanyabikorwa, uruhare rw’umuturage ntirugaragare;

Kuba hari abaturage bagifite imyumvire ko bagomba guhora bafashwa bityo bagahora ngo bagume mu byiciro by’ubudehe byo hasi bigenerwa ubufasha bwa Leta ndetse n’ubw’imiryango itari iya Leta;

Kunoza imikoreshereze y’amakuru y’ubudehe mu gutoranya abagenerwabikorwa  ba gahunda zitandukanye nk’ubuvuzi, uburezi, gahunda zo kurengera abatishoboye nka VUP, Girinka n’izindi.

Ingingo zizibandwaho mu biganiro n’abaturage

Umubare w’ibyiciro ukwiriye bijyanye n’imibereho y’abanyarwanda;

Ibiranga (criteria) buri cyiciro cy’ubudehe;

Uburyo buzakoreshwa mu gushyira abanyarwanda mu byiciro by’ubudehe;

Imikoreshereze y’ibyiciro by’ubudehe mu gutanga ubufasha;

Uruhare rw’umuturage wo mu cyiciro cy’abafashwa mu rugamba rwo kwivana mu bukene, kwigira no kwihesha agaciro;

Igihe urugo rukwiye kumara mu cyiciro runaka n’uburyo ruzajya rukivamo.

Izindi wakunda

Bwiza.com