bwiza.com
Amakuru Politiki

Perezida Maduro arashinja Amerika gushaka gushoza intambara mu karere

Perezida wa Venezuela Nicolas Maduro arashinja Leta Zunze Ubumwe za Amerika gushaka gushoza intambara mu karere igihugu cye giherereyemo binyuze mu kubanza gutegura akajagari.

Perezida Maduro akaba avuga ko inama iheruka kubera I Bogota muri Colombia ari bumwe mu buryo bwo gushyiraho leta muri Venezuela izorohereza Amerika kugera kuri peteroli nyinshi iki gihugu gifite munsi y’ubutaka.

Maduro yagize ati: “Barimo kugerageza kurema intambara kugirango babone uko basobanura ko igihugu kiri mu bibazo bya politiki, ko ari ngombwa kohereza imitwe y’ingabo muri Venezuela no guteza intambara mu karere ka Amerika y’Epfo.”

Ibi Perezida Nicolas Maduro yabitangarije mu kiganiro yahaye Televiziyo ya ABC News yo muri Leta Zunze Ubumwe za Amerika ari mu ngoro ye iri Caracas mu murwa mukuru w’igihugu.

Juan Guaido aramukanya na Mike Pence

Ni nyuma y’aho kuri uyu wa Mbere ushize, visi perezida wa Leta Zunze Ubumwe za Amerika, Mike Pence, yatangaje ko  bagiye kongera guha abaturage ba Venezuela imfashanyo zifite agaciro ka miliyoni 56 z’amadolari  ubwo yabonanaga na Juan Guaido utavuga rumwe n’ubutegetsi muri Colombia.

Perezida Maduro  akaba yaravuze ko iyo nama yabereye i Bogota, ari bumwe mu buryo bwo gushyiraho leta ibangikanye n’iriho muri Venezuela, kugirango Amerika ibone uko igera kuri peteroli y’umurengera iki gihugu gifite munsi y’ubutaka.

 

 

Izindi wakunda

Bwiza.com