bwiza.com
Amakuru Ubuzima

Rusizi: Abana b’abakobwa bari hagati ya 450 na 500 batwara inda zitateganijwe buri mwaka

?

Ubuyobozi bw’akarere ka Rusizi buvuga ko buhangayikishijwe bikomeye n’abana b’abakobwa bakomeje gutwara inda zitateganijwe n’ingaruka kuri bo ubwabo n’abo babyaye,aho buvuga ko buri mwaka abari hagati ya 450 na 500 bazitwara kandi abenshi batazi n’uburenganzira bwabo bikabakururira imibereho mibi.

Byatangajwe n’umuyobozi wako wungirije ushinzwe imibereho myiza y’abaturage,Nsigaye Emmanuel  ubwo kuri uyu wa kabiri tariki ya 27 Gashyantare 2019, abakobwa babyariye iwabo bagera ku 100 bo mu mirenge ya Bugarama,Kamembe,Mururu na Gihundwa y’aka karere bagiranaga ibiganiro by’umunsi umwe n’umushinga ‘Baho Neza’ ukorera mu muryango  nyarwanda uharanira iterambere ry’abaturage mu bijyanye n’ubuvuzi no kubakorera ubuvugizi mu by’ubuzima ku bufatanye na MINISANTE, ku nkunga ya Imbuto foundation,aho baganirizwaga ku bijyanye n’uburenganzira bwabo n’ubw’abo babyaye  n’ubuzima bw’imyororokere.

Mu bibazo aba bakobwa bakomeje guhura na byo nk’uko babigaragaza ngo hari mo kubyara imburagihe  kuko abenshi baba batagejeje ku myaka y’ubukure,hakaba muri bo abazitwara bari mu mashuri abanza  n’ayisumbuye nta kindi bashobora kwikorera  ngo barere abo bana, gutereranwa no kwihakanwa n’abazibateye bakanababuza kubavuga babakangisha ko bazabagirira na bi, kutita ku byo kwandikisha abo bana mu bitabo by’irangamimerere,kumva banze ubuzima bigeza n’aho bakumva bakwiyahura n’ibindi.

Bavuga ko mu byo bifuza harimo kurusha ho kwgerwa n’ubuyobozi bunyuranye bukumva ibibazo byabo,kubashakira imishinga yabafasha nibura kubonera abo bana mituweli kuko abenshi baziterwa babana na ba nyirakuru batishoboye cyangwa bakabajyana gukodesha amazu bashobora no guhurira mo n’ibindi bibazo biruta ibya mbere, bamwe bakemeza ko baramutse bategerewe hari n’ abashobora kubona ubuzima bubarambiye bakaba babwiyambura.

Uzayisenga Chantal w’imyaka 14 y’amavuko afite umwana umaze icyumweru gusa avutse. Avuga ko yatewe inda n’umumotari  w’imyaka 40 utuye mu murenge wa  Gihundwe  mu mujyi wa Rusizi, ayimutera yiga mu wa 5 w’amashuri abanza   amushukishije amafaranga 3.000 y’amanyarwanda kandi afite abana barimo abamuruta n’abo bangana,ubu yu mugabo ngo yaracitse,undi yabuze epfo na ruguru.

Yabwiye Bwiza.com ati’’ nasanze umugore we ngo nibura anderane n’umwana wanjye mu bana be aranga,umugabo we wayinteye naramubuze,sinzi ikindi nakora kuko no kuri polisi nagiye yo bambwira ko bazakomeza kumushakisha kandi mbana na nyogokuru ushaje, nta kindi nshobora kwikorera uretse kumesera abantu imyenda bakampa icyo turarira kandi ayo ntiyambonera mituweli y’umwana, nkifuza ko ubuyobozi bwamfasha  umugore w’uwo mugabo akagira icyo amfasha.’’

Impuguke mu bijyanye n’ubuzima bw’imyororokere n’ubuzima rusange,Mporanyi Théobald, umwe mu bahaye aba bana ibiganiro avuga ko iki kibazo gihangayikishije cyane kuko mu myaka 3 ishize mu gihugu hose habarurwaga abana bari munsi y’imyaka 19 y’amavuko bagera ku 18.000 batewe inda zitateganijwe,ikibabaje kikaba ari uko abazibatera babihanirwa bakiri bake kubera akenshi kubahishira no kubyungira mu miryango,imigirire nk’iyi ikaba ikwiye gucika kugira ngo uburenganzira bw’aba bana n’abo babyaye  bubashe kubahirizwa.

Avuga kandi ko ibyo kwihanaka abana kw’abagabo n’abasore bamwe bitazajya biborohera kuko uburyo bwo gupima ADN ngo se w’umwana amenyekana mu Rwanda bwatangiye gukoreshwa, gusa aba bakobwa  bagasabwa kwitabira gahunda zo kuboneza urubyaro aho gukomeza kubyara abo batazashobora kwita ho.

Ubuyobozi bw’aka karere buvuga ariko ko nubwo ababyarira iwabo bari ku mubare munini ,abahanwa mu bazibatera bo bakiri bake cyane kuko ngo abashyikirijwe ubutabera bakanakatirwa  umwaka ushize batarenga 30.

Ushinzwe ibikorwa by’ubuzima ku rwego rw’akarere ka Rusizi, Habarugira Wencesilas agira inama aba bakobwa 
Visi Meya, Nsigaye Emmanuel avuga ko ikibazo cy’abangavu batwara inda zitateganijwe kiri mu bihangayikishije cyane aka karere

Izindi wakunda

Bwiza.com
error: Alert: Ntabwo byemewe!!