bwiza.com
Amakuru Politiki

Algeria: Abaturage bariye karungu bamagana manda ya 5 ya Perezida Abdelaziz w’imyaka 82

Abantu babarirwa mu bihumbi amacumi muri Algeria bigabije imihanda mu kugaragaza uburakari bafitiye Perezida Abdelaziz Bouteflika w’imyaka 82 y’amavuko ufite gahunda yo gushaka kongera kwiyamamaza ngo ategeke iki gihugu cyo mu Majyaruguru ya Afurika kuri manda ya Gatanu.

Polisi yarashe imyuka iryana mu maso ku bigaragambya mu murwa mukuru Alger. Abategetsi bavuze ko abigaragambya barindwi n’abapolisi barenga 50 bakomeretse, naho abandi bantu 45 batabwa muri yombi.

Imyigaragambyo yamagana leta iba gacye cyane muri Algeria, ariko myinshi yarabaye kuva Bouteflika yakwemeza ko azongera kwiyamamaza mu matora ya Perezida ateganyijwe kuba mu kwezi gutaha kwa Kane uyu mwaka.

Ku myaka 82, Abdelaziz Bouteflika nta kibasha kwigenza, agendera mu kagare k’abamugaye

Kuva yarwara indwara y’imitsi yo mu bwonko mu mwaka wa 2013,  Bouteflika aboneka gacye cyane mu ruhame, ndetse kuri ubu arigukorerwa ibizamini byo kwa muganga mu Busuwisi.

Ubwo bagendaga mu mihanda yo mu murwa mukuru Alger ku wa Gatanu, bamwe mu bigaragambya bari bafite ibyapa byanditseho ngo “Kurekera aho bisobanuye kurekera aho”. Abandi bashimangiraga ko bashaka kwigaragambya mu mahoro.

Umugore umwe mu bigaragambyaga wari uri kumwe n’umugabo we n’abana, yabwiye ibiro ntaramakuru AFP ati “Imyaka 20 irahagije”.

Ibiro ntaramakuru Reuters byo byasubiyemo amagambo ya Ali Selmi, na we wigaragambyaga, agira ati: “Uyu ni umunsi w’ibyishimo, ntabwo ari uw’imyigaragambyo. Turikwishimira kongera kuvuka kwa Algeria”.

Bouteflika yageze ku butegetsi mu mwaka wa 1999. Ashimirwa kuba yararangije intambara yasubirishanagamo abatuye iki gihugu bigereranywa ko yahitanye abantu barenga ibihumbi 100.

Abigaragambya bamagana manda ya gatanu ya Abdelaziz Bouteflika

 

Izindi wakunda

Bwiza.com