bwiza.com
Amakuru Politiki

RDC: Hafashwe umwana w’Umurundi bivugwa ko yari mu nyeshyamba za Kayumba Nyamwasa

Abana bane bari abarwanyi mu mitwe y’inyeshyamba, igisirikare cya Congo (FARDC) cyabashyikirije ingabo za Monusco mbere yo gusubizwa mu miryango bakomokamo. Umwe muri aba bana, ngo ni umurundi, akaba yarwanaga  mu nyeshyamba za Kayumba Nyamwasa.

Monusco yashyikirijwe aba bana ku wa 28 Gashyantare 2019,  ku biro bikuru bya gisirikare i Uvira muri Kivu y’Amajyepfo. Batatu ngo barwana mu nyeshyamba za Kihebe no mu za Yakutumba, undi umwe ngo yari mu nyeshyamba z’Abanyarwanda ziyobowe na Kayumba.

Radiyo Okapi dukesha iyi nkuru itangaza ko imyaka y’aba bana, iri hagati ya 13 na 16. Umuyobozi w’ingabo za Monusco muri aka gace, Ganda Abdourahamane ashima FARDC ku bw’iki gikorwa.

Ati “FARDC yubahiriza uburenganzira bw’umwana, izi neza ko abana bagomba gusubizwa imiryango bakajyanwa ku ishuri. Kuba mu mitwe y’inyeshyamba ntabwo ari umwanya ugenewe umwana, ni imyaka yo kuba ari ku ishuri”.

Batatu bakomoka muri Congo bashyikirijwe imiryango yabo, mu gihe undi umwe uvuga ko yarwanaga mu mutwe w’inyeshyamba za Kayumba, ngo azajyanwa iwabo mu Burundi.

Uyu muyobozi wa Monusco yakomeje avuga ko kwinjiza abana mu mitwe y’inyeshyamba ari icyaha cy’intambara gikomeye kandi gihanwa n’amategeko. Agasaba imitwe y’inyeshyamba guhagarika ibi bikorwa ndetse n’abo ifite ikabarekura bagasubira mu miryango yabo.

Mu gihe bitangazwa ko umwe muri aba bana yari mu mutwe w’inyeshyamba ziyobowe na Kayumba Nyamwasa wahoze ari umugaba mukuru w’ingabo z’u Rwanda, ndetse na raporo y’agateganyo y’inzobere za Loni ikaba ivugwamo ko uyu musirikare afite umutwe w’inyeshyamba zigamije gutera u Rwanda, mu kwezi gushize aganira na RFI, yahakanye aya makuru, avuga ko nta mutwe w’inyeshyamba afite muri Congo.

 

Izindi wakunda

Bwiza.com