bwiza.com
Ubukungu

Aho wakura igishoro gihagije cy’umushinga wawe

Building in a hand businessmen

Urubyiruko ruhura n’imbogamizi ikomeye yo kutamenya aho rwakura igishoro cy’imishinga ruba rufite. Umushinga uko waba mwiza gute iyo udafite amafaranga yo kuwutangiza ntaho ugera. Icyo kibazo tugiye kugiye kugikemura tumenyesha urubyiruko ahantu hatandukanye rwavana inkunga y’imishinga yarwo.

Aho hantu ariko hagiye hatandukanye bitewe n’umushinga ndetse n’igishoro gikenewe, turagerageza kwerekana bimwe mu bisabwa kugira ngo ube wabasha gukorana na bimwe muri ibi bigo.

  1. Acumen Fund

Iki kigo kibanda ku mishinga izakemura ibibazo bikomeye mu buryo burambye. Muri 2014 cyateye inkunga umushinga wo muri Ghana witwa Esoko Networks Limited “ESOKO”, kiwuha inkunga ingana na miliyoni n’igice y’amadolari, asaga miliyari n’igice y’amafaranga y’u Rwanda.

Uwo mwaka kandi cyateye inkunga ingana na miliyari n’igice y’amafaranga y’u Rwanda umushinga wo muri Uganda witwa SolarNow ucuruza ibijyanye n’ingufu z’imirasire y’izuba.

Iki kigo kiba gishaka imishinga irwanya ubukene mu buryo bushya kandi buzaramba. Ushaka amakuru arambuye wasura urubuga rw’iki kigo www.acumen.org

  1. Africa Entreprise Challenge Fund

Iki kigo gishyigikiwe na guverinoma z’ibihugu nka Australia, Denmark, Netherlands, Sweden ndetse n’Ubwongereza. Gihabwa miliyoni 207 zo gushora mu mishinga yo muri Afrika.

Kibanda ku mishinga y’ubuhinzi, ingufu zikomoka ku mirasire y’izuba n’imishinga yo guhangana n’ihindagurika ry’ibihe.

Inkunga iki kigo kiyitanga binyuze mu marushanwa, aho batumira ba nyir’imishinga bakarushanwa utsinzwe agahabwa angana miliyari n’igice y’amafaranga y’u Rwanda nk’inkunga cyangwa umwenda udafite inyungu. Ku makuru arambuye wayasanga ku rubuga www.aecfafrica.org

  1. Africa Media Ventures Fund

Iki kigo cyo kibanda ku mishinga mito n’iciriritse ijyanye n’itangazamakuru. Gitanga inkunga y’amafaranga ndetse n’iyibitekerezo byo kwagura umushinga.

Gitera inkunga kuva ku mafaranga miliyoni 17 kugeza kuri miliyoni 170 z’amafaranga y’u Rwanda. Aya mafaranga akunze imishinga yibanda ku gusakaza amakuru binyuze ku ma telephone cyangwa applications. Batera inkunga kandi imishinga ijyanye n’ubukerarugendo, imyidagaduro, ibiribwa n’ibindi. Ku yandi makuru wayasaga ku rubuga www.amvf.nl

  1. Africa Development Foundation

Iki kigo ni ikigo kigenga gikorera muri Leta zunze ubumwe za Amerika, gishinzwe gutera inkunga imishinga yo muri Afrika izamura ubukungu.

Muri 2014 gusa iki kigo cyatanze amafaranga angana na miliyoni 50 ku mishinga 336 yagiriye akamaro abatuye Afrika abarenga na miliyoni n’igice. Iki kigo kibanda ku mishinga y’abagore n’abakobwa n’ abahinzi. Gitanga angana na miliyoni 220 z’amafaranga y’u Rwanda ku mishinga iba mu byaro ariko yiteguye kuyakoresha neza. Ku yandi makuru wagana urubuga www.adf.gov

  1. Africa Women’s Development Fund (AWDF)

Iki kigo ni cyo kigo cya mbere gitera inkunga imishinga y’abagore muri Afrika. Kimaze gutanga igishoro kingana na miliyari 15 z’amafaranga y’u Rwanda ku mishinga 800 y’abagore mu bihugu 42 bitandukanye. Gifite intego kandi yo guteza imbere umuco w’ubufatanye hagati y’abagore muri Afrika, nyuma y’inkunga y’amafaranga kinabasha mu kubereka uburyo bagira ibigo by’ubucuruzi bikomeye.

Gitera inkunga imishinga yibanda ku muco na siporo, ubuhanzi, kurwanya Sida n’imishinga y’amahoro. Inkunga gitanga iva kuri miliyoni 7.5 kugera kuri miliyoni 44.5 z’amafaranga y’u Rwanda. Ku yandi makuru wagana urubuga www.awdf.org

Urubyiruko rw’u Rwanda rufite imishinga ariko rwabuze igishoro rwagerageza amahirwe kuri ibi bigo bitanu bitandukanye mu gihe iyo mishinga iri mu murongo ibi bigo bigenderaho.

 

 

Izindi wakunda

Bwiza.com