bwiza.com
Ahabanza » Nyagatare: Gukoresha Gazi biracyari inzozi ku batuye Rwempasha
Amakuru mu Rwanda

Nyagatare: Gukoresha Gazi biracyari inzozi ku batuye Rwempasha

Agasanteri k'ubucuruzi ka Rwempasha

Leta y’u Rwanda ishishikariza abaturage gukoresha ubundi buryo bwo gutekesha butari inkwi burimo gazi, biyogazi n’ibindi mu rwego rwo kurengera ibidukikije, ariko mu duce tumwe na tumwe tw’igihugu bigaragara ko umubare w’abakoresha ubwo buryo ukiri mbarwa, ndetse hari n’abatarabusobanukirwa. 

Urugero ni mu Murenge wa Rwempasha ho mu Karere ka Nyagatare, aho abantu bane cyangwa batanu ari bo bakoresha gazi yo gutekesha, ahazwi nko mu Gasanteri ka Rwemapasha.

Bamwe mu batuye muri uyu murenge utuwe n’abasaga ibihumbi 19, bavuga ko guteka kuri gazi birenze ubushobozi bwabo, hari abatazi uko zimeze, abandi bazibona kuri Televiziyo mu gihe iwabo nta bashoramari bari batangira kuzihacururiza.

Ubuyobozi butangaza ko abenshi mu bawutuye bacana inkwi, nyamara ngo kuzikoresha si uburyo bwiza bwo kubungabunga ibidukikije, bukaba bubakangurira gukoresha ubundi bubirengera.

N’ubwo ari umurenge ukora k’uwa Nyagatare( urimo umujyi wa Nyagatare), wubatsemo  ibiro by’akarere, ibitaro bikuru, sitade, gare, isanteri y’ubucuruzi ikomeye,… Abawutuye bavuga ko gazi batayizi, ndetse ko ntaho babona igurishwa.

Umucuruzi wo kuri aka gasanteri k’ubucuruzi witwa Karinda Richard, umwe muri bake bakoresha gazi muri aka gace, avuga ko na we imugeraho imuhenze; ku buryo ku giciro gisanzwe asabwa kurenzaho amafaranga y’u Rwanda asaga 2500 y’urugendo, ajya kuyigura mu Mujyi wa Nyagatare.

Ati “Yego ndi umwe muri bake bateka bakoresheje gazi, urebye abantu bakoresha gazi ntabwo barenze batanu ahangaha kubera izo mbogamizi. Ibyiza byayo ni uko bitantwara igihe ntetse ikindi kandi harimo n’inyungu yo kurengera ibidukikije kubera ko nta myotsi iba ihari ngo irabyangiza, ariko iraduhenda cyane, birakwiye ko twegerezwa aho igurirwa, tukayigura ku giciro gisanzwe(iy’ibiro bitandatu ntirenze 7200).”

Karinda Richard, umwe muri bake bakoresha gazi muri Rwempasha

Karinda asanga hari bamwe mu baturage bagifite imyumvire y’uko gutekesha inkwi ari byo bihendutse, n’abakeka  ko ishobora guturika ikabateza impanuka, ariko ngo ntabwo ari ukuri.

Umugore uhakorera akazi ko kudoda imyenda, avuga ko gazi bazibona kuri Televiziyo bazamamaza. Ati “Izo za gazi n’iriya mbabura ikoreshwamo bateri birahenze, gazi nyibona bayamamaza kuri televiziyo, bazizanye hano bakazitugurisha kuri make cyangwa ku nguzanyo,  tukazagenda twishyura buhoro buhoro twazigura, ariko ubushobozi bwacu ntibutwemerera guhita tuzigura”.

Umuyobozi w’Akarere ka Nyagatare, Mushabe David Claudian, avuga ko bazakomeza kwigisha abaturage kugira ngo imyumvire ihinduke, bareke gukoresha uburyo bwo guteka bwangiza ibidukikije.

Ati “Icya mbere ni inyigisho, ni ugukomeza tukigisha abaturage icyo kuvuga ngo irahenda tugereranyije n’umufuka w’amakara uko ugura ubungubu ugeze ku bihumbi 10, ugasanga gazi igura 12500Frs, gazi ishobora kumara ukwezi itekera umuturage”.

Akomeza avuga ko umuturage ashobora kubigira byose, nko mu gihe agiye guteka ibishyimbo akifashisha ubundi buryo bushoboka, ati “Wagira ibyo uteka ku ruhande ukoresheje inkwi ku buryo bwa rondereza ariko gazi mu by’ukuri ntabwo ihenze”.

Meya Mushabe avuga ko bazakomeza gukora ubukangurambaga kugira ngo abaturage bumve neza akamaro ko guteka bifashishije ubundi buryo butari inkwi mu rwego rwo gukomeza kubungabunga ibidukikije.

Mu rwego rwo kurengera no kubungabunga ibidukikije, muri uyu murenge ariko hari bamwe mu baturage bateka kuri biyogazi(biogas) ituruka ku myanda y’amatungo, n’ubwo umubare wabo ukiri hasi cyane.

Mu rwego rwo korohereza abaturage kubona gazi, Leta y’ u Rwanda yakuyeho imisoro ku binjiza mu gihugu GazI zifashishwa mu guteka. Ubushakashatsi bwa Gatnu bw’Ikigo cy’Igihugu cy’Ibarurishmibare ku mibereho (EICV5), bugaragaza ko 79.9 % by’Abanyarwanda bakoresha inkwi mu gucana, byumwihariko Intara y’Iburasirazuba bakaba ari 89.3 %.

Mu gihugu abakoresha Gazi na Biogas mu gucana ni 1.1 %, mu gihe mu Ntara y’Iburasirazuba ubu bushakashatsi bugaraza ko ari 0.3%.

Izindi wakunda

Bwiza.com