bwiza.com
Ahabanza » Kigali: Umushoferi n’umumotari bafashwe bagerageza guha ruswa abapolisi
Amakuru mu Rwanda

Kigali: Umushoferi n’umumotari bafashwe bagerageza guha ruswa abapolisi

Umumotari n’umushoferi bafashwe ku wa Mbere tariki 4 Gashyantare 2019, mu turere twa Gasabo na Nyarugenge, mu Mujyi wa Kigali, bagerageza guha ruswa abapolisi  bari babafatiye mu makosa atandukanye yo mu muhanda.

Umuvugizi wa Polisi ishami rishinzwe umutekano wo mu muhanda Senior Superntendent of Police (SSP) Jean Marie Vianney Ndushabandi  yatangaje ko abafashwe ari Mbarushimana Olivier na Nsengiyumva Erneste mu gihe bageragezaga guha ruswa abapolisi bari mu kazi.

Yagize ati:” Mbarushimana Olivier yafatiwe mu murenge wa Remera ari kumwe na Kamarade Jean Damascene wari utwaye imodoka ifite icyapa kiyiranga RAA 051P, iyi modoka yageze ku mupolisi wari uri mu kazi asaba ibyangombwa shoferi asanga nta ruhushya rwo gutwara ikinyabiziga afite nibwo Mbarushimana Olivier wari kumwe n’utwaye ikinyabiziga yahise agerageza guha wa mupolisi ruswa yi 18,000frw ahita amufata.”

SSP Ndushabandi yakomeje atangaza ko undi wafashwe ari umumotari witwa Nsengiyumva Erneste  wafatiwe mu murenge wa Muhima mu karere ka Nyarugenge.

Yagize ati:” Yafashwe ubwo yaragonze mugenzi we w’umumotari umupolisi amuhagaritse amwatse ibyangombwa ashyiramo inote y’ibihumbi 5000frw ngo nta mwandikire.”

Yakomeje aburira abatwara ibinyabiziga kwirinda kwishora mu cyaha cyo gutanga ruswa kuko gihanwa n’amategeko, abasaba ko mu gihe basabwe ibyangombwa bakwihutira kubitanga kandi uhanwe akishyura amande yaciwe aho kugerageza gutanga ruswa kuko ari icyaha gihanwa n’amategeko.

SSP Ndushabandi yibukije abatwara ibinyabiziga ko bakwiriye gushaka impushya zibemerera gutwara ibinyabiziga  kuko biba biri mu nyugu zabo  kandi Polisi ikaba yarashyizeho uburyo bunoze bwo kuzibona, aboneraho   kubasaba no kwirinda amakosa yose akorerwa mu muhanda mu rwego rwo gukumira impanuka zihitana ubuzima bw’abantu abandi zikabamugaza.

Mbarushimana Olivier na Nsengiyumva Erneste bashyikirijwe Urwego rw’Igihugu  rw’ubugenza cyaha (RIB)  ku girango bakurikiranwe ku byaha bacyekwaho.

Itegeko rihana ruswa mungingo yaryo ya 4 riteganya ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

 

Izindi wakunda

Bwiza.com
error: Alert: Ntabwo byemewe!!