bwiza.com
Ahabanza » Nyanza: Abafashamyumvire mu bworozi bahawe amagare azabafasha mu ngendo
Amakuru mu Rwanda

Nyanza: Abafashamyumvire mu bworozi bahawe amagare azabafasha mu ngendo

Muri Werurwe 2018,  nibwo  hashyizweho  abajyanama mu bworozi  bo gufasha abandi muri aka karere ka Nyanza hagamijwe  kongera umukamo w’amata n’ubwiza bwayo hagendewe  ku kumenya gutegurira inka indyo yuzuye ndetse no gufasha aborozi kumenya uko bahinga ubwatsi.

Bamwe mu bafashamyumvire muri aka karere bavuga  ko n’ubwo akazi bakora ari ubukorerabushake ariko ngo bahuraga n’imvune zo gukora ingendo  bajya gusura amatsinda y’aborozi bashinzwe.

Mukamugema Prisca utuye mu kagari ka Gatagara, Umurenge wa Mukingo, mu Karere ka Nyanza, avuga ko umurimo bakora wagize umumaro haba ku ruhande rwabo ubwabo ndetse n’aborozi bandi baturanye nabo.

Abenshi ngo wasangaga batazi uko bita ku nka bayigaburira, bamwe bazi ko urubingo ari bwo bwatsi baha inka gusa. Avuga ko aho batangiriye kwigisha aborozi umukamo wiyongereye ndetse n’inka zikamera neza kurusha mbere uko babikoraga.

Gusa avuga ko bakigorwa n’urugendo rwo kubageraho mu gihe baba bafite amatsinda bagomba gukurikirana.

Agira ati “Turavunika ariko ikibazo cya mbere kitugora ni uburyo bwo kugera ku matsinda hari aho tuzamuka imisozi tugendesha amaguru, nkanjye kuva kuwa Mbere kugera ku wa Kane mba nagiye gusura ya matsinda kuko mfite amatsinda ane nshinzwe, kugenda buri munsi n’amaguru biramvuna cyane, amaguru aba yarahiye».

Umukozi w’umushinga wa Minagri ushinzwe kongera umukamo RDDP(Rwanda Development Diary Project) mu karere ka Nyanza, Munyaneza Jean Noèl ari nawo ushinzwe gukurikirana aba bafashamyumvire, avuga ko muri rusange aho bamariye kubahugura batanze umusaruro kuko amata yariyongereye muri aka karere.

Ariko ngo nyuma yo kubona imvune bahura nazo mu kazi kabo bahawe amagare azajya abafasha mu ngendo bakora .

Agira ati “Ubusanzwe umufashamyumvire iyo yabaga agiye gusura amatsinda twamuhaga amafaranga ibihumbi bibiri mu cyumweru ariko twasanze bidahagije bavunika cyane kuko bisaba kuva mu kagari kamwe ujya mu kandi tubagurira amagare ,twizera ko azajya abafasha kugera ho bifuza kujya ariko na none akanabafasha mu zindi gahunda zabo».

Umuyobozi wungirije ushinzwe imibereho myiza muri aka karere,  Umutesi Solange avuga ko guha amagare aba bafashamyumvire  ari ukugira ngo  niba aho bageraga mu isaha imwe cyangwa amasaha abiri bakurikirana abo bashinzwe bizajya bibafasha mu kazi biyemeje .

Ikindi ngo n’uko amagare bahawe azanabafasha kwiteza imbere ubwabo akanafasha imiryango yabo igihe bagiye muri bya bikorwa byo guhugura aborozi .

Mu karere ka Nyanza ubu habarizwa amatsinda agizwe n’aborozi 656 harimo abagabo 341 n’abagore 315, aya matsinda yose akaba akurikiranwa n’abafashamyumvire 17 aho buri muntu aba afite amatsinda akurikirana. Gusa ubuyobozi buvuga ko iyi gahunda ikomeje kuko ubu harimo guhugurwa abandi bafashamyumvire 12 nibura ngo buri murenge ukazaba urimo abafashamyumvire Batatu. Uko ari 17 bose bahawe amagare.

Visi Meya Ushinzwe imibereho myiza mu karere ka Nyanza, Umutesi Solange ashyikiriza abafashamyumvire amagare

Izindi wakunda

Bwiza.com
error: Ntibyemewe