bwiza.com
Amakuru mu Rwanda

Rwamagana: Abakora ubucuruzi buciriritse babangamiwe n’umusoro urenze amikoro yabo

Abagore bakora ubucuruzi bw’imboga mu gasoko gato kari inyuma y’irya Kigabiro riherereye mu Mujyi wa Rwamagana, barasaba gufashwa bakabona aho gukorera aho kwirukanwa kubera imisoro badashobora kubona. 

Abagore n’urubyiruko bahakorera ubu bucuruzi buciriritse bavuga ko babangamirwa no kwirukanwa muri iri soko, mu gihe bagaragaza ko bagamije kwivana mu bukene ariko umusoro ukababera inzitizi.

Manishimwe Clementine yemeza ko barangura imboga n’ibitoki, bakabyamburwa n’ubuyobozi kandi ariho baba bateze amaramuko.

Yagize ati “Twebwe abagore badafite ubushobozi tubangamirwa n’uko batwambura imboga zacu bakajya kujugunya kandi twakazicuruje tukabona amafaranga yo gutunga abana bacu, twe twumva bakwiye kutureka natwe tugakora tugasora make aho kutwirukana no kutumenera imboga. Nk’uko badushishikariza gukora nibadufashe baduhe aho gukorera kuko natwe dukeneye kwiteza imbere tukabona ibidutunga n’abana bacu”.

Undi witwa Uwingeneye Chantal avuga ko abayobora  Inama y’Igihugu y’Abagore bakwiye kubakorera ubuvugizi, abagore badafite ubushobozi bagashwa kwiteza imbere.

Yagize ati “Abagore bafite igishoro gito bafite ikibazo muri iri soko bitewe n’uko iyo udashoboye kujya gukorera ku bisima byo mu isoko, uza gukorera hano ariko hano nta gaciro dufite bitewe n’uko utira umuntu amafaranga make kugira ngo urangure amashu n’inyanya cyangwa intoryi ariko waba ugitangira gucuruza bakaba batangiye kubifata bakabijyana kubibika mu misarani y’isoko, bugacya bajya kubijugunya mu myanda bakubura mu isoko”.

Akomeza agira ati “Icyo twasaba abagore baduhagarariye Ni uko batuvugira natwe tukabona uko dukora aho kutwambura ibyo twaranguye bikajugunywa”.

Umunyamabanga Nshingwabikorwa w’Umurenge wa Kigabiro, Hanyurwimfura Egide avuga ko yakoranye inama n’aba bacuruzi biganjemo abagore, abereka aho bazajya bacururiza mu isoko imbere. Mu gihe haba hari umuyobozi wabafashe bacururiza hanze yaryo, ngo nta kosa yaba afite.

Ati “Ntabwo nzi uwabibatse ariko yaba umuyobozi cyangwa n’urundi rwego rwabibaka nta kosa baba bakoze, njyewe twakoranye inama mbereka aho bakorera imbere mu isoko, ubwo yagiye gucururiza hanze agafatwa n’umuyobozi akabimwaka nta kosa yaba afite”.

Akomeza avuga ko aba bacuruzi babasaba gukorera imbere mu isoko kugira ngo bace ubuzunguzayi bukorerwa hanze yaryo. Icyo kuvuga ko bagabanyirizwa imisoro, agashimangira ko atari we ubigena ariko ko bakwegera ubuyobozi bukabakorera ubuvugizi.

 

Izindi wakunda

Bwiza.com
error: Alert: Ntabwo byemewe!!