bwiza.com
Ahabanza » Icyogajuru n’umupaka wa Gatuna byabaye igipimo cy’umwete muke w’Abanyamakuru bo mu Rwanda
Amakuru mu Rwanda

Icyogajuru n’umupaka wa Gatuna byabaye igipimo cy’umwete muke w’Abanyamakuru bo mu Rwanda

Icyogajuru bivugwa ko ari icy’u Rwanda cyoherejwe mu kirere, n’ibibazo ku mupaka wa Gatuna; ni zimwe mu nkuru zagarutsweho  mu kiganiro cyabaye ku wa Gatanu taliki ya 1 Werurwe 2019,  kigamije gukangurira abanyamakuru gushaka ibimenyetso(facts check) no kurwanya ibihuha(fake news).

Ni ikiganiro gihuza abanyamakuru n’inzego zitandukanye zirimo umuryango urwanya ruswa n’akarengane TI-Rwanda, PaxPress,Kaminuza ya Aga Khan, abasesenguzi, inzobere n’imiryango itari iya Leta, barebera hamwe uburyo itangazamakuru ryafasha abaturage kumenya no kugira uruhare mu bibakorerwa.

Abashakashatsi n’inararibonye mu itangazamakuru banenze uburyo ibinyamakuru byo mu Rwanda byatangaje ziriya nkuru, bavuga ko habayemo umwete muke mu guha abaturage amakuru, kuko ayo babonye atari ahagije kuyo bari bakeneye.

Amani Athar, ni umujyanama mu by’itangazamakuru muri ambasade ya Amerika mu Rwanda. Amenyereye itangazamakuru, yayoboye ibinyamakuru binyuranye ubwo yigaga muri kaminuza y’u Rwanda mbere y’umwaka wa 2000, aho yanabaye Komiseri ushinzwe itangazamakuru, ni umwanditsi akaba n’umukinnyi w’amakinamico.

Mu kubimburira abandi impaka, avuga ko hari aho abanyamakuru bagaragaza ubunebwe mu gutanga inkuru ituzuye atanga urugero rw’umupaka wa Gatuna byavugwaga ko wafunzwe.

“Mumbabarire mbanenge kuko hari ibyo mbona nkabona ari ubunebwe, nkibyuka mu gitondo nafunguye ibinyamakuru bya Uganda mbona birandika ko umupaka wa Gatuna uhuza Uganda n’u Rwanda ufunze, mfunguye n’ibyo mu Rwanda nabyo mbona niko byose byanditse.” Akomeza avuga ko asanga harabayemo ubunebwe mu gutangaza iyi nkuru ku ruhande rw’abanyamakuru b’Abanyarwanda.

Ati, “ Nkigera ku kazi mfunguye imashini nta minota itanu byantwaye kugira ngo menye amakuru ko umupaka udafunze ko yari amakuru y’ibinyoma nasomaga (fake news).”

Ashimangira ko kuba kuri uwo munsi nta munyamakuru w’i Kigali wari wakageze ku mupaka ngo arebe ukuri kwabyo cyangwa ngo avugane n’ababishinzwe byari ikibazo gikomeye ku makuru Abanyarwanda babonye.

Gusa uyu mupaka ntufunze nk’uko Minisiteri y’ububanyi n’amahanga y’u Rwanda yabitangarije abanyamakuru kuri uyu wa kabiri. “Hari imirimo y’ubwubatsi iri gukorerwa ku mupaka wa Gatuna, imodoka ziremereye zirakoresha imipaka ya Cyanika na Kagitumba, naho izitaremereye zigatambuka zitabangamiye imirimo y’ubwubatsi”.

Urujijo rurimo ni uko amabwiriza yo gufunga umupaka ku mpamvu z’inyubako, yahuriranye n’ayihanangiriza abanyarwanda kudahirahira bambuka bajya mu gihugu cya Uganda.

Aha niho hagaragara umwete muke w’abanyamakuru, batacukumbuye ngo babwire abaturage niba imipaka ifunze yose kuri bose na byose, cyangwa se niba ifunze ku banyarwanda gusa.

Icyogajuru “Icyerekezo” ni icya nde?

Urundi ni rugero rwahise ruzamurwa, ni urw’icyogajuru cyoherejwe mu kirere bamwe bavuga ko ari icy’u Rwanda ariko bavuga ko nta makuru babonye yemeza ko ari byo cyangwa atari byo. Ni icyogajuru ngo kizafasha abaturage bo ku kirwa cya Nkombo kubona murandasi (internet) yihuse.

Ibi byazamuwe na Alphonse Chiundu, inzobere mu itangazamakuru ricukumbura ukomoka muri Kenya, ukorana na AfricaCheck.

We avuga ko na n’ubu atarabona gihamya imwereka ko u Rwanda rwohereje icyogajuru mu kirere.

“U Rwanda rwazanye drones zitwara amaraso twishimira kubibona kuko icyo gihe baduhaye amakuru afatika , ariko kuri ubu usibye kumva ko icyogajuru cyoherejwe mu kirere, nta yandi makuru ahagije atwemeza ko ari icy’u Rwanda tubona.” Aha abandi bari mu nama bahise bamwunganira bibaza bati.

“ Icyogajuru cyohererejwe mu Bufaransa si mu Rwanda nta ngengo y’imari yacyo ibinyamakuru byatweretse ndetse nta n’ikinyamakuru kigeze kivugana n’Umunyarwanda wari uri aho cyohererejwe mu kirere”.

Bamwe bavuga ko cyazamuriwe Kicukiro, abandi ngo ku Nkombo, nta makuru ahagije.

Ku mbuga nkoranyambaga zihuriraho abanyamakuru, bibaza ukuntu kizamuka nta bendera ry’u Rwanda ryagaragaye nk’uko riboneka ku myambaro y’abakinnyi ba Arsenal “Visit Rwanda”.

Abandi bati, “kiriya cyagajuru cyarimo satellites esheshatu, harimo imwe y’u Rwanda, mu kukizamura ntabwo amabara y’ibendera yari kugaragara kandi harimo n’ibindi bitanu by’abandi”.

Abandi bakunga mu rya Alphonse Chiundu bagira bati, “Ni gute twatashye twa tudege dutwara amaraso (drones), ariko icyogajuru ntitumenye ibyacyo”.

Umunyamabanga nshingwabikorwa w’ishyirahamwe ry’abanyamakuru mu Rwanda, Muganwa Gonzaga, avuga ko kuba abanyamakuru batarashatse kumenya byinshi kuri iki cyogajuru bibujije abanyarwanda uburenganzira bwabo bwo kumenya ibibakorerwa.

Ati “Abanyamakuru nibo bari bafite inshingano zo kujya muri Minisiteri y’ikoranabuhanga bakaka amakuru kuri kiriya cyogajuru, bakabaza impamvu kitohererejwe mu kirere mu Rwanda, amafaranga iyi minisiteri yagishoyemo n’igihe umushinga wacyo umaze n’Abanyarwanda bazagikurikirana, n’ibindi.”

Bamwe mu banyamakuru bitwaza ubushobozi buke bafite, ariko umunyamabanga Nshingwabikorwa w’inama nkuru  y’itangazamakuru, Mbungiramihigo Peacemaker avuga ko bari kugishakira igisubizo biciye mu kumvikanisha akamaro k’itangazamakuru mu miryango itari iya Leta no mu bikorera.

Naho ku ruhande rw’urwego rw’abanyamakuru bigenzura (RMC), umunyamabanga nshingwabikorwa Mugisha Emmanuel yibutsa abanyamakuru kuzirikana inyungu rusange n’inyungu z’igihugu (public interests/ national interests), n’ubwo bidakuraho kugira umwete mu gushaka amakuru nyayo, ngo kuyatangaze bibe indi ntambwe.

 

Izindi wakunda

3 Ibitekerezo

katsinono 07/03/2019 6:23 pm at 6:23 pm

Ari Abayobozi b’inzego, ari n’abanyamakuru ninde uzahwitura undi kureka GUTEKINIKA????????????????????. Gukora byose mu nyungu z’igihugu??????????????????????????.

Birababaje gutukisha igihugu!.

Subiza
Claude 09/03/2019 7:49 am at 7:49 am

Ku by’icyogajuru muzasome ikinyamakuru cyitwa rwandadailynews.com gifite inkuru ibivuga neza! Kuvuga ko nta kinyamakuru cyabyanditseho ndumva ari ubunebwe bw’abasomyi batareba ibinyamakuru byose. Ubwo busesenguzi bw’abo bitwa inzobere na bwo ntibwuzuye.

Subiza
Mageza 09/03/2019 7:54 am at 7:54 am

Nimunenga ntimugakubiranye kuko hari abagerageza gukorana umuhate ngo abanyarwanda babone amakuru atari ibinyoma na propaganda.
Kuri izi ngingo z’icyogajuru n’umupaka wa Gatuna n’iyindi ya UG na Rda ufite amatsiko azirebe ku kinyamakuru Umuseke arabona itabdukaniro n’umuhate wabo mu kumenyesha abanyarwanda amakuru nyayo.

Kunenga ni byiza kuko bihwitura abanyamakuru ariko no gushima abakora neza nubwo baba bacye cyane nabyo ni byiza.
Uburyo Umuseke utanga amakuru n’uko utanga free space of expression ku bawukurikira bikwiye kubera ibindi bitangazamakuru urugero, namwe Bwiza courage mbona mugerageza rwose. Ntimuzabe nk’ibi ibinyamakuru bizwi ko bikomeye mu Rwanda ariko bibyina itewe yose bitanashunguyemo na busa ngo byumve injyana.

Mugire amahoro

Subiza

Tanga Igitekerezo

Bwiza.com