bwiza.com
Ahabanza » Leta y’u Burundi ngo irimo kwaka abaturage ku ngufu amafaranga izifashisha mu matora yo mu 2020
Amakuru Politiki

Leta y’u Burundi ngo irimo kwaka abaturage ku ngufu amafaranga izifashisha mu matora yo mu 2020

Leta y’u Burundi ngo nta mafaranga ifite izifashisha mu matora y’umukuru w’igihugu ateganijwe mu 2020, bityo ngo ikaba yarasabye abayobozi muri za komini kuyaka abaturage.

Nk’uko bitangazwa n’ibiro ntaramakuru by’Abafaransa, AFP, ngo Komini 119 z’u Burundi ziri mu gisa n’ipiganwa, zaka abaturage amafaranga no ku ngufu kugira ngo zizahige izindi mu gukusanya iyi nkunga.

Radiyo Ijwo rya Amerika itangaza ko iki gikorwa cyo gukusanga ya mafaranga cyatangiye mu mwaka wa 2017, gitangizwa bivugwa ko nta gahato karimo none ubu imiryango Iharanira Uburenganzira bwa Muntu ikaba avuga ko ari igikorwa cy’ubujura cyateguwe na Leta.

Itangaza ko abantu bafatwa, bagafungwa, bagakorerwa iyicarubozo ngo ni uko batatanze iyo mfashanyo,….Mu Cyumweru gishize Perezida Nkurunziza ngo yatangaje ko ubu Leta imaze kwinjiza 70% by’amafaranga akenewe.

Minisitiri w’Ubutegetsi bw’Igihugu, Pascal Barandagiye atangaza ko uguhiganwa hagati y’Intara n’Amakomini agize igihugu ari uburyo bumwe Leta yifashishije kugira ngo abaturage bitabire iki gikorwa ku bwinshi.

Leta y’u Burundi yiyemeje kwigira, ikishakamo aya mafaranga nyuma y’aho bimwe mu bihugu byo ku mugabane w’u Burayi bihagarikiye inkunga byabugeneraga mu bikorwa by’amatora, kubera imvururu zavutse mu 2015, zikuruwe na manda ya Gatatu ya Perezida Nkurunziza abaturage bose batavugagaho rumwe.

Perezida Nkurunziza yatangaje ko mu mwaka wa 2020, atazongera kwiyamamaza ku mwanya w’umukuru w’igihugu, ashimangira ko azakomeza gutanga ubufasha ku uzaba yamusimbuye mu kubaka igihugu cyabo, ariko mu Ishyaka CNDD FDD bakaba bataratangaza uzarihagararira muri aya matora.

 

Izindi wakunda

Bwiza.com