bwiza.com
Amakuru mu Rwanda

Muhanga: Umunuko n’amasazi bibangamiye abaturiye ahagenewe kumenwa imyanda

Bamwe mu batuye mu kagari ka Kanyinya, mu Murenge wa Muhanga, Akarere ka Muhanga begereye ahamenwa imyanda itandukanye iva mu mujyi wa Muhanga, bavuga ko babangamiwe n’umunuko uva mu bishingwe bimenwa hafi y’ingo zabo n’amasazi abiturukamo.

Habamenshi  valens, umwe mu baturage baturiye iki kimoteri avuga ko uburyo kibabangamiye, bakifuza ko ubuyobozi bw’aka karere bwakihakura kuko bafite impungenge z’ubuzima bwabo.

Agira ati “Kibangamiye abana, nanjye ubwanjye kirambangamiye ,umunuko ukivamo ntutuma umuntu asinzira rwose, turasaba ubuyobozi ngo buzaze bukihakure bushake ahandi bugishyira”.

Ni ikibazo ahuriyeho na  Uwimana Vedaste na we utuye hafi yacyo uvuga ko mu gihe bagiye kurya  usanga bibananira kubera amasazi  aba atumuka ari menshi.

Agira ati “Ugira ngo ushyize inkono ku ziko, ni ukuba uri aho hafi ngo zitagwamo, waba ugiye kurya nabwo  isazi ziba ari nyinshi zuzuye  ku masahane, ni ukurya tunazikoma ,batugiriye neza baza bakakimura naho ubundi  twararenganye

Ku ruhande rw’ubuyobozi, Uwamariya Béatrice  umuyobozi wako  avuga ko muri aka karere nta kimoteri gihari, gusa iki ngo cyahashyizwe mu buryo bwo kwifashishwa mu gihe bagitegereje ko babona Rwiyemezamirimo uzajya utwara iyo myanda ayijyana mu karere ka Ruhango aho bazifashisha ikimoteri kirimo kuhubakwa.

Agira ati “Muri uyu mujyi ntabwo dufite ikimoteri cya kijyambere kuko biriya bimoteri kubikora birahenze ubwo rero kuko hari icyubatswe muri Ruhango kandi bigaragara  ko itagihaza yonyine twagiriwe inama yo kuba ari cyo dukoresha kugira ngo nacyo gikoreshwe uko bikwiye , uyu munsi wa none rero ntabwo Rwiyemezamirimo araboneka wo kugikoreramo »

Uyu muyobozi kandi avuga ko kubera ko abaturage bakomeje kukinubira hari imiti bashyiramo ituma bitanuka cyangwa ngo bizane amasazi ari bwo buryo bagiye kuba bakoresha mu gihe hategerejwe umuti urambye.

Uku kutagira ikimoteri kandi muri uyu mujyi binatuma abahatuye bamena ibishingwe aho babonye hose  muri za ruhurura ziri muri uyu mujyi .

Izindi wakunda

Bwiza.com
error: Alert: Ntabwo byemewe!!