bwiza.com
Ahabanza » Perezida Uhuru Kenyatta uri mu Rwanda yakiriwe mu Mwiherero w’Abayobozi bakuru b’igihugu
Amakuru Featured Politiki

Perezida Uhuru Kenyatta uri mu Rwanda yakiriwe mu Mwiherero w’Abayobozi bakuru b’igihugu

Perezida wa Kenya, Uhuru Kenyatta, mu gitondo cyo kuri uyu wa Mbere, itariki 11 Werurwe, yasesekaye I Kigali mu Rwanda mu ruzinduko rw’akazi, aho yakiriwe ku Kibuga cy’Indege Mpuzamahanga cya Kigali na Minisitiri w’Ububanyi n’Amahanga, Dr Richard Sezibera, mbere yo kwerekeza i Gabiro mu Karere ka Gatsibo ahabera Umwiherero w’Abayobozi bakuru b’igihugu kuva mu cyumweru gishize.

Akigera mu Rwanda, Perezida Uhuru Kenyatta yahise yerekeza ku Kigo cya Gisirikare cya Gabiro, mu Ntara y’Iburasirzauba, ahari kubera Umwiherero w’abayobozi bakuru b’igihugu ku nshuro ya 16, kuva kuwa Gatanu ushize, aho yabonaniye na Perezida wa Repubulika, Paul Kagame.

Biteganyijwe ko mu Rwanda, Perezida Kenyatta azagirana ibiganiro na mugenzi we w’u Rwanda bigamije gutsura umubano hagati y’ibihugu byombi bihuriye mu Muryango wa Afurika y’Iburasirazuba, EAC, Perezida Kagame ayoboye muri iki gihe.

Ibi bihugu byombi bikaba bifitanye umubano ukomeye ushingiye ku nzego zitandukanye nk’ubucuruzi, umutekano, kubaka ubushobozi, ishoramari n’ibindi.

Perezida Uhuru Kenyatta akaba yaherukaga mu Rwanda mu mwaka ushize, aho yari yitabiriye inama idasanzwe y’abakuru b’ibihugu bigize Afurika Yunze Ubumwe (A.U), inama yafunguriwemo Isoko Rusange rya Afurika(African Continental Free Trade Area).

 

Izindi wakunda

1 Igitekerezo

Mbaguta March 11, 2019 at 12:56 pm

Mbega byiza!, iyo abaturanyi baturanye bumvikana, bahuje kdi buzuzanya nta kiza nk’icyo.

Subiza

Tanga Igitekerezo

Bwiza.com