bwiza.com
Ahabanza » Ndatekereza Uganda n’u Rwanda bishobora kujya mu ntambara – Andrew Mwenda
Amakuru Featured Politiki

Ndatekereza Uganda n’u Rwanda bishobora kujya mu ntambara – Andrew Mwenda

Umunyamakuru uvuga rikijyana muri Uganda akaba ari n’inshuti y’abakuru b’ibihugu bya Uganda n’u Rwanda, aremeza ko ibi bihugu byombi bishoboka cyane ko byajya mu ntambara kandi iki gitekerezo agisangiye na benshi kuva mu Ukwakira umwaka ushize.

Mu nkuru ndende yiyandikiye ubwe yacishije mu kinyamakuru cye, The Independent, Mwenda atangira agira ati: “Reka nkore ibyo abanyapolitiki buri gihe bakora, bavuga ko byo biyamamariza ubuyobozi kuko babisabwe n’abaturage. abantu benshi bakunze kunsaba kugira icyo mvuga ku mwuka mubi uri hagati ya Uganda n’u Rwanda. Mu kwandika iyi nkuru nabikoze mbitewe n’igitutu cy’abaturage.”

Ati: “Ndatekereza ko Uganda n’u Rwanda bishobora kujya mu ntambara, ikintu nsangiye na benshi mu nshuti guhera mu Ukwakira umwaka ushize ari nayo mpamvu ari ingenzi ko mvuga uko mbibona.”

Avuga ko ibiri kuba bibi bibaye mu gihe hashize ibyumweru bike Perezida Yoweri Museveni agejeje imbwirwaruhame kuri bakuru b’ibihugu bya Afurika bagenzi be mu nama ya Afurika Yunze Ubumwe i Addis Abeba ashyigikiye ukwishyira hamwe kw’ibihugu, ari nayo minsi Perezida Kagame yahawemo kuyobora Umuryango wa Afurika y’Iburasirazuba. Kuba bombi bageze aho kuba bajya mu ntambara birerekana intera iri hagati yo kuvuga no gukora.

Andrew Mwenda akomeza avuga ko ibibazo biri hagati ya Uganda n’u Rwanda bishobora gukemuka mu buryo bworoshye Perezida Museveni agumye ku ngengabitekerezo ye ko kwishyira hamwe kw’ibihugu ari ingenzi ku hazaza ha Afurika kandi ko ibyo ibihugu bitumvikanaho ari bito ugereranyije n’inyungu z’ubufatanye.

Aha Mwenda akaba avuga ko ugendeye kuri ibi ibihugu byombi bifite ibyo bitumvikanaho, byashaka uko bibiganiraho bigakemuka. Mwenda ati: “Ikibazo kiri hagati ya Uganda n’u Rwanda uko nkizi, ni uko Kampala yanze kumva impungenge z’u Rwanda ngo ziganirweho.”

Yatanze urugero rw’ukuntu u Rwanda rwasabye ibisobanuro Uganda kenshi mu nzira zemewe n’izitemewe ku bantu icumbikiye bashaka guhungabanya umutekano w’u Rwanda. U Rwanda rukaba rwaravuze ko aba bantu bakoresha statut y’ubuhunzi mu buryo bunyuranyije n’amategeko bajya mu bikorwa bya politiki bibangamiye Guverinoma y’u Rwanda.

U Rwanda rukaba rwarashimangiye ko aba bantu bakorera muri Uganda bafashwa n’ubutasi bw’iki gihugu mu kwinjiza abantu mu gisirikare babakuye mu nkambi z’impunzi bakajyanwa mu myitozo ya kinyeshyamba muri Repubulika iharanira Demokarasi ya Congo.

Uyu munyamakuru akomeza avuga ko u Rwanda rwakomeje gushaka kuganira kuri ibi bibazo na Kampala ariko ntihagire icyo bitanga. Ahubwo ngo u Rwanda rukaba rwaragiye rwumva mu itangazamakuru no ku mbuga nkoranyambaga ko Guverinoma y’u Rwanda ari yo irimo gushaka guhindura ubutegetsi bwa Uganda. Imbuga zikorana bya hafi na leta ya Uganda ngo akaba ari zo zagiye zikwirakwiza aya makuru, ndetse na bamwe mu bakuru b’inzego z’umutekano z’iki gihugu.

Nyamara ariko, ngo Uganda ntiyigeze igira ibisobanuro isaba Leta y’u Rwanda kuri ibi birego bituma u Rwanda rubura aho ruhera rusubiza izo mpuha z’itangazamakuru.

Mwenda ati: “Ibi bibazo byakabaye byarahagaritswe kera ariko imbaraga zose zashyirwagamo zacibwaga intege na Uganda. Igikomeye cyane ni hagati mu mwaka ushize igihe nakoranaga na Gen Salim Saleh ngo twohereza intumwa i Kigali cyangwa dutumire intumwa z’u Rwanda zize i Kampala mu biganiro. Twanemeranyije ku itsinda ry’abayobozi ba Uganda. Navuganye na Kagame wahise ashyiraho itsinda ry’abayobozi bari guhura n’uruhande rwa Uganda. Ku munota wa nyuma Museveni ubwe yasubitse umugambi avuga ko iki kibazo azakikemurira na Kagame.

Akomeza agira ati: “Nagerageje kenshi ubwanjye kwereka Museveni ibibazo u Rwanda rwavugaga ariko ntabyiteho cyangwa akavuga ko azabyiganiriraho na Kagame. Ibintu atakoze.  Ibi byarambabaje kuko guhera mu 2011 nakoranye bya hafi na Perezida wa Uganda mu kuzahura umubano wacu na Kigali. Muri icyo gihe nashimishijwe n’umuhate Museveni yerekanaga n’uburyo yarebaga akure. Uburyo byaje guhinduka nta mpamvu igaragara byanteye urujijo”.

Mwenda akomeza avuga ko Uganda itakurikiranye iki kibazo kandi ngo azi neza ko n’igihe Museveni yagiye abonana na Kagame atigeze azana iki kibazo cyo guhindura ubutegetsi bwe bikozwe n’u Rwanda.

Kagame yabwiye Museveni ko CMI ya Uganda ikorana n’abarwanya ubutegetsi bw’u Rwanda. Museveni yasezeranyije kubigenzura no kurangiza ikibazo. Ubwa nyuma numvise ko Uganda yohereje umwe muri aba bantu muri Norvege.”

Agaruka ku kuntu uru rwego rushinzwe ubutasi mu gisirikare cya Uganda (CMI) rwagiye rufungira Abanyarwanda ahantu hatemewe, bagakorerwa iyicarubozo ndetse bagacyurwa ku ngufu mu Rwanda.

CMI ikaba ishinja aba bantu kuba intasi ariko ntabo yigeze igeza imbere y’urukiko, ndetse ngo nta nubwo ibi irabibwira u Rwanda ku mugaragaro.

U Rwanda rwo rukaba rwarakunze kwamagana ibi bintu ariko nabwo ntihagire icyo bitanga. Hagati aho ariko Uganda ishinja u Rwanda gushimuta no kwica Abanyarwanda baba muri Uganda no gushaka guhindura ubutegetsi ariko ntiyigeze itanga amazina cyangwa ibimenyetso cyangwa ngo ibimenyeshe u Rwanda haba mu nzira zemewe n’izitemewe.

Ati: “Nabwiye abayobozi ba Uganda ko nubwo ibi birego byo gushimuta no kwica byaba ari ukuri, u Rwanda rwakabaye inshuti yacu. Iyo inshuti yitwaye gutyo, ntuhagarika kubavugisha. Israel ni inshuti ya Amerika. Kenshi inzego z’ubutasi zayo zagiye zifatwa zishimuta abantu zibakuye muri Amerika cyangwa zicengera mu butasi bwa Amerika zikiba amakuru yo ku rwego rwo hejuru y’ibanga.”

Akavuga ko nubwo ibi byabaye ibihugu byombi bitageze aho bicana umubano. Yongera gutanga urugero rw’uko Amerika nayo yagiye ivugwaho gutata inshuti zayo bahuriye mu Muryango w’Abibumbye ariko bitageze aho bicana umubano.

Mwenda yakomeje avuga ko azi Museveni nk’umuntu ureba kure akaba adatekereza ko yakwishimira kuyoborera hejuru ku mubano wangiritse hagati y’ibihugu by’inshuti ahubwo ibibazo bifitanye byaba impamvu yo kuganira aho gucana umubano.

Ati: “Umwanzuro nafata nkurikije imyitwarire ye kuri Kigali n’uko adafata u Rwanda nk’inshuti cyangwa adatekereza ko imibanire yacu ari ngombwa cyangwa byombi. Nkunze kwishyiramo ko Museveni afata u Rwanda rwa Kagame nk’ikibazo, ikintu nzasobanura birambuye mu nkuru yanjye itaha.”

Mwenda ati: “Dore rero igishobora gutera intambara: Niba u Rwanda rwemeza ko Kampala yifuza gukuraho ubutegetsi bwa Kagame ntabwo ruzicara aho ngo rurebere. Na Uganda igira abanzi. Bishobora kuzatuma Ikizaba Kigali nayo ibafasha. Ushingiye ku kuntu abaturage na politiki z’ibihugu byombi byivanze, Kampala izabona ibimenyetso by’ubu bufasha. Ubwo icyatangiye ari igihuha ko u Rwanda rushaka ihinduka ry’ubutegetsi bwa Museveni kizaba ari ukuri gufite ibimenyetso!”

 

Izindi wakunda

Bwiza.com