bwiza.com
Ahabanza » RDC: Abantu batandatu bishwe batemeshejwe imihoro n’inyeshyamba zikomoka muri Uganda
Amakuru Politiki

RDC: Abantu batandatu bishwe batemeshejwe imihoro n’inyeshyamba zikomoka muri Uganda

Abaturage babarirwa muri Batandatu bishwe batemeshejwe imihoro n’abiswe inyeshyamba za ADF (Forces démocratiques alliées) zikomoka mu gihugu cya Uganda.

Izi nyeshyamba zishe aba baturage mu mpera z’icyumweru gishize, i Lubwasi, muri Teritwari ya Beni, Intara ya Kivu y’Amajyaruguru, Muri Repubulika Iharanira Demokarasi ya Congo.

Aba baturage bishwe barimo n’umugore, zabafashe ubwo bavaga mu mirima. Bamwe bagiye baraswa bahunga abandi batemeshwa imihoro, abandi batwikirwa mu nzu zabo.

Nk’uko bitangazwa n’ikinyamakuru Actualitecd, Umuyobozi wa Teritwari ya Beni, Nyonyi Bwanakawa, avuga ko n’ubwo ubwo bwicanyi bwahakorewe, nta butabazi ingabo za Leta (FARDC) zakoze cyangwa ngo zihoherezwe kugira ngo umutekano w’abaturage ubungwabungwe.

Inyeshyamba za ADF zimaze imyaka isaga 20 zirwanira mu mashyamba ya Congo ndetse zigashinjwa kwica abaturage ibihumbi muri Beni. Ubu bwicanyi bukaba bubaye bukurikira ubuheruka ku wa 24 Gashyantare 2019, ubwo izi nyeshyamba nabwo zicaga abaturage babiri i Mamove, muri iyi Teritwari ya Beni.

Ubuyobozi bwatangaje ko izi nyeshyamba zanatwitse inzu umunani, ndetse n’ikigo nderabuzima. Akanama ka Loni gashinzwe amahoro n’umutekano ku Isi kakaba gashyira uyu mutwe w’inyeshyamba mu mitwe y’iterabwoba.

 

Izindi wakunda

Bwiza.com
error: Alert: Ntabwo byemewe!!