bwiza.com
Ahabanza » Rwamagana: Ibikorwaremezo birimo kubakwa byitezweho guhindura isura y’umujyi
Amakuru Politiki

Rwamagana: Ibikorwaremezo birimo kubakwa byitezweho guhindura isura y’umujyi

Ubuyobozi bw’akarere ka Rwamagana butangaza ko ibikorwaremezo birimo imihanda ya Kaburimbo ndetse no kuvugurura umuyoboro w’amazi, inyubako n’ibindi, bizatuma isura y’umujyi wa Rwamagana ihinduka ku buryo witezweho iterambere.

Mu kiganiro Bwiza.com yagiranye n’umuyobozi w’akarere wungirijwe ushinzwe ubukungu n’iterambere, Mudaheranwa Regis,  yavuze ko Umujyi wa Rwamagana ubu urimo kubakwamo ibikorwaremezo ku buryo byitezweho guhindura isura yawo .

Yagize ati “Icyo nabwira abanyarwagana, ni uko bashonje bahishiwe bitewe n’uko ubu turimo kububakira ibikorwaremezo bizatuma isura y’umujyi wacu ihinduka ukarushaho kuba mwiza, kandi murabona ko kuva muri 2016 hari impinduka zagiye ziba”.

Avuga ko hari imihanda irimo gukorwa isanzwe, inganda zubakwa mu cyanya cy’inganda, imihanda ya Kaburimbo mu gice cy’umujyi. Ati “Tugendeye ku bindi bihugu byateye imbere, twabyigiyeho ko iyo ufite ibikorwaremezo bikurura abantu bakahubaka bakanahakorera ibindi bikorwa”.

Mudaheranwa anakomeza avuga ko ubu umujyi bawuhinduriye icyerekezo ugiye kuvugururwa bawerekeza mu murenge wa Muhazi, mu gihe ahitwa Buswayirini ariho hafatwaga nk’ishingiro ry’umujyi .

Aragira ati “Ubu igishushanyo mbonera cy’umujyi cyararangiye, hariho ibiganiro na RSSB ku butaka bwayo buri ahitwa Pulage kugira ngo tubwifashishe kuko umujyi twahisemo ko ukura werekeza muri kiriya gice muzi ko byari bisanzwe bizwi ko aho bita Buswayirini hafatwaga nk’umujyi kandi turimo turahashyira ibikorwaremezo bihagije ndetse twatangiye no kuvugurura umuyoboro w’amazi ku buryo mu bihe biri imbere tuzaba dufite amazi meza  kandi ahagije”.

Abaturage basanga ibikorwaremezo barimo kubakirwa bizabafasha mu iterambere, ndetse baniteguye kubibyaza umusaruro.

Ntazinda Charles, ati “ Twishimira ko duhiga utundi turere mu mihigo, buri wese aba ashaka kumenya Rwamagana[…]Ubu barimo kudukorera imihanda myiza ya Kaburimbo bizatuma abashoramari bashaka gukorera mu mujyi wacu, natwe bizadufasha mu mibereho ya buri munsi kuko tuzabona akazi tubeho neza”.

Rwamagana ni kamwe muri turindwi tugize Intara y’Iburasirazuba kakaba ari nako karimo icyicaro cyayo. Kagizwe n’imirenge 14, utugali 82, imidugudu 474 n’ingo zisaga 74175, izisaga 63.5% zituye ku midugudu. Gafite ubuso bungana na kilometero kare 682 n’abaturage basaga 313,461.

 

Izindi wakunda

Bwiza.com