bwiza.com
Ahabanza » Burundi : Pierre Buyoya yasabye ko amasezerano ya Arusha yahabwa agaciro mu kwirinda ‘ingaruka mbi’
Amakuru mu mahanga

Burundi : Pierre Buyoya yasabye ko amasezerano ya Arusha yahabwa agaciro mu kwirinda ‘ingaruka mbi’

Uwahoze ari perezida w’u Burundi, Pierre Buyoya yandikiye umuhuza mu bibazo bya politiki biri mu Burundi, Yoweri Kaguta Museveni amusaba ko yakora uko ashoboye kugira ngo amasezerano ya Arusha yubahirizwa hirindwa ko hazabaho izo yita “Ingaruka mbi nyinshi.”

Ibi bibaye nyuma yaho Leta y’u Burundi, ishyize ahagaragara impapuro zita muri yombi Maj. Pierre Buyoya ushinjwa kwicisha Perezida Melchior Ndadaye wari umaze kumutsinda mu matora muri 1993.

Buyoya akomeza avuga ko u Burundi buri mu bibazo by’ ingutu byiganjemo iby’ umutekano w’ abantu bishingiye ahanini ku ubutabera kuva mu mwaka wa 2015.

Kuri iyi ngingo, Intumwa idasanzwe y’Umuryango w’Abibumbye (ONU) muri Mali, Pierre Buyoya  yashimangiye ko umuzi w’ ingorane u Burundi bukomeje guhurana nazo bishingiye mu kutubahiriza amasezerano ya Arusha yateweho umukono mu mwaka wa 2000.

Muri iyi baruwa kandi , Buyoya yanenze izi mpapuro zashyizweho zo guta muri yombi abahoze ari baperezida avuga ko bivuguruje amasezerano ya Arusha.

Mu gutanga ubwo butumwa, Buyoya yasabye Perezida Museveni ko yifuje guhamagarira abahagarariye ayo masezerano bose kuyubahiriza  nk’ uko ikinyamakuru Burundi Today kibitangaza.

Pierre Buyoya yanashimangiye ku ruhare yagize mu rwego rwo gushyira mu bikorwa ibyavuye mu masezerano ya Arusha aho avuga ko  byatumye demokarasi yongera kubaho mu Burundi.

Kugeza magingo aya, Pierre Buyoya ashinja Perezida Pierre Nkurunziza ko yanze kuganira nabo batavuga rumwe bahunze igihugu.

Ku bwa Buyoya asanga impapuro zifata abakekwaho kwica Melchior Ndadaye zitakagombye gusohorwa ngo kuko amasezerano ya Arusha yari yateganyije Urukiko rudasanzwe rwakemura ibibazo byose bishingiye ku makimbirane yavuka hagati y’ Abarundi.

Muri iyi baruwa ya Buyoya asaba ko urupapuro rumuta muri yombi ruseswa yabimenyesheje Ibihugu bya Tanzania, Kenya, Uganda, Ubumwe bwa Afrika ndetse n’Ubumwe bw’ i Bulaya.

Gaston Rwaka/Bwiza.com

Izindi wakunda

Bwiza.com
error: Ntibyemewe