bwiza.com
Ahabanza » Col. Bagosora yanze kumena ibanga ku ruhare rw’ u Bufaransa muri Jenoside
Amakuru Politiki

Col. Bagosora yanze kumena ibanga ku ruhare rw’ u Bufaransa muri Jenoside

Col Bagosora wari Umuyobozi Mukuru w’Ibiro muri Minisiteri y’Ingabo za FAR, ushinjwa kuba umwubatsi mukuru wapanze ishyirwa mu bikorwa rya jenoside yakorewe Abatutsi igatwara ubuzima bw’inzirakarengane zisaga miliyoni, yanze kumena ibanga rya gisirikare ngo avuge uruhare rw’u Bufaransa muri iyi jenoside.

Col. Bagosora yagiye yumvikana ahakana yivuye inyuma uruhare yagize muri jenoside aho umunsi umwe yabajijwe n’ itangazamakuru mpuzamahanga ku ruhare yagize mu kwicisha Abatutsi, agira ati” Uwo nishe azaze anshinje”.

Kuki Col. Bagosora yanze kuvugana n’ iperereza?

Iperereza ryakozwe n’ inzobere z’ Abafaransa ryerekana ko 2/3 by’ amafaranga yaguze intwaro zakoreshejwe muri Jenoside yakorewe Abatutsi mu Rwanda yatanzwe na Banki  y’ U Bufaransa, BNP Paribas.

Iri perereza rishingiye mu kumenya inkomoko y’ amafaranga yaguraga intwaro no gutoza Interahamwe ryakomeje gukorwa ku bufatanye bw’ amashyirahamwe ya  sosiyete sivile yo mu Bufaransa ndetse na Ibuka ikorera muri Diaspora nyarwanda, nk’ uko byatangajwe na Le MondeAfrique.

Kuri iyi ngingo, abashinzwe iperereza bashingiye mu kwibaza uburyo ingabo za Juvenal Habyarimana zakomeje kubona intwaro mu gihe Loni yari yakomatanyirije u Rwanda muri 1994.

Mu rwego rwo kumenya inkuru y’ impamo ku nkomoko y’  intwaro zakoreshejwe n’ abajenosideri muri 1994, abashinzwe iri perereza bifuje kugirana ibiganiro na Col. Théoneste Bagosora nk’ umuntu uzi byinshi bahise bamusanga aho afungiye i Koulikoro muri  Mali.

Mu mpera za 2017, ngo Col Bagosora yanze kumena ibanga rya gisirikare dore ko yari amaze gukatirwa igifungo cy’ imyaka 35, mu ncamake yanze kuganira n’ abari bashinzwe iperereza ubwo bamubazaga uburyo igisirikare cya FAR cyabonaga imbunda ndetse naho zavaga mu gihe igihugu cyari muri embargo.

Amakuru dukesha Le MondeAfrique yemeza ko intwaro nyinshi zinjiye mu  Rwanda muri 1994 zavuye mu Bufaransa ku mayeri menshi, zanditseho ko zigiye mu birwa bya Seychelles.

Ese Diplomasi irahagije mu kongera kuzana umwuka mwiza?

Abaperezida ku mpande zombi bakomeje kugaragaza ubushake mu gukemura ibibazo by’ umubano hagati y’ U Bufaransa n’ U Rwanda nyuma ya jenoside yakorewe Abatutsi.

Ni muri urwo rwego , U Rwanda rwateye intambwe rutumira Perezida w’ U Bufaransa, Emmanuel Macron mu muhango wo kwibuka jenoside yakorewe Abatutsi ku nshuro ya 25.

Amateka yaranze Isi agaragaza ko bidasanzwe ko igihugu cy’ igihangage cyasaba imbabazi igihugu gito kuko bifatwa nkaho ari ukugipfukamira n’ubwo umuhanga w’ Umufaransa, Gaston Bachellard yavuze ko amakosa y’ amateka akosorwa n’ iterambera.

Rwaka Gaston/ Bwiza.com

Izindi wakunda

Bwiza.com