bwiza.com
Ahabanza » Rwamagana: Abanyeshuri batoroka ikigo n’abambara impenure bafatiwe ingamba zikarishye
Amakuru Mu mashuli

Rwamagana: Abanyeshuri batoroka ikigo n’abambara impenure bafatiwe ingamba zikarishye

Ubuyobozi bw’Urwunge rw’Amashuri rwa Rwamagana (GS/Rwamagana Cathorique) rwitiriwe Mutagatifu Vincent de Paul, mu nama yabuhuje n’ababyeyi tariki ya 10 Werurwe 2019, bwamenyesheje ingamba zikarishye bwafatiye abanyeshuri basimbuka uruzitiro ndetse n’abambara impenure.

Umuyobozi wa GS Rwamagana, Safari Ignace yabwiye ababyeyi ko hari abanyeshuri batoroka ikigo buriye igipangu cy’ishuri kandi ko bikorwa n’abahungu n’abakobwa, ngo ku buryo biteye inkeke. Avuga ko hari n’abana b’abakobwa bambara impuzankano z’impenure ku buryo nabwo ngo buteye isoni.

Yagize ati “Dufite ikibazo cy’abana batoroka ikigo bakagenda harimo n’abakobwa. Abana banyu cyane cyane abakobwa turiya dukapu mubona bavana mu rugo tuba turimo indi myenda itari iy’ishuri ku buryo wohereza umwana uzi ko yagiye kwiga akaba yakwigira mu zindi gahunda, hari abandi bana b’abakobwa bambara utujipo tugufi, umwana arayambara mu muhanda ukabona abanyonzi n’abamotari barimo baramusifura bitewe n’imyenda yambaye. Birababaje, niyo mpamvu twabifatiye ingamba”.

Yakomeje agira ati “Ese nk’ababyeyi mwananiwe kudodeshereza abana banyu imyenda ibakwira aho kwambara ubusa? Turasaba kujya musura abana ku ishuri kugira ngo mumenye imyitwarire yabo”.

Uhagarariye ababyeyi, Bwana Gashagaza yasabye ko bazashaka imikasi bagaca amajipo magufi yambarwa n’abanyeshuri mu gihe bazaba bananiranye, banze kuva ku izima .

Ku banyeshuri burira uruzitiro rw’ishuri, hafashwe icyemezo ko uzafatwa yurira azaba yirukanwe akazasubira ku ishuri ajyanye umufuka wa Sima .

Abanyeshuri baganiriye na Bwiza.com, kuri uyu wa Mbare tariki ya 11 Werurwe, basanga ibihano byashyizweho aribyo bizarandura burundu kwambara impenure no gutoroka.

Umunyeshuri wiga mu  mwaka wa Gatanu [Yiswe Kamana] yemeza ko hari abanze kureka kwambara impenure kandi bibakoza isoni.

Kamana ati “Abakobwa nyine bumva bakwambara utujipo tugufi, batubwiye ko tugomba kwambara amajipo nibura agera mu nsi y’amavi ariko hari abitwaza ngo bigezweho bakamba twa Mini ariko nyine nibazica cyangwa bakabirukana bazabireka bambare imyenda ibakwira, kuko badukoza isoni. Ababibona bavuga ko ku kigo cyacu higa indaya”.

Undi munyeshuri wiga mu mwaka wa Kane nawe yemeza ko hari abanyeshuri batoroka bakurira uruzitiro, anavuga ko ubuyobozi nibutangira kubahanisha Kwishyura umufuka wa Sima bizacika.

Agira ati “Hari abanyeshuri b’ibirara usanga badashaka kwiga nibo burira ikigo mu gihe bagiye kwiga amasomo badakunda, barurira kajya kuzerera, niba bazajya babatega kwishyura umufuka wa sima bazajya batinya kurira igipangu cy’ikigo”.

Urwunge rw’Amashuri rwa Rwamagana rwigamo abanyeshuri 3557. Mu mashuri abanza higa 2370, naho mu yisumbuye hakiga 1187.

Ngabonziza Justin/ Bwiza.com

Izindi wakunda

Bwiza.com