bwiza.com
Ahabanza » UBUHINDE: Umugore yagerageje kubyara ari kureba amashusho (video) bimuviramo kuhasiga ubuzima
Amakuru

UBUHINDE: Umugore yagerageje kubyara ari kureba amashusho (video) bimuviramo kuhasiga ubuzima

Umugore w’imyaka 25 wo mu Buhinde mu mujyi wa Gorakhpur, yitabye Imana azira kugerageza kwibyaza areba amashusho (video) ku rubuga rwa You tube uko bikorwa.

Uyu mugore ndetse n’umwana yari yabyaye, babasanze bapfiriye mu nzu yabagamo mu mujyi wa Gorakhpur nkuko bitangazwa na polisi yo muri ako gace. Ku cyumweru tariki ya 10 Werurwe 2019 nibwo abaturanyi b’uyu mugore babonye amaraso aturuka mu muryango w’inzu yabagamo uyu mugore. Aba baturanyi bahise babimenyesha polisi.

Umuyobozi wa polisi mu mujyi wa Gorakhpur Ravi Rai yatangarije ikinyamakuru Indian Times ko uyu mugore bamusanze afite telefone igaragaza amashusho y’abagore bari kwibyaza ndetse na CD iriho amashusho yerekana uburyo abagore babyara.

Abaturanyi b’uyu mugore batangaje ko uyu mugore yaje gucumbika aho ari wenyine dore ko nta mugabo yagiraga mu buryo bwemewe n’amategeko. Bakaba bavuze ko ashobora kuba yaranze gusaba ubufasha kugira ngo batamuseka agahitamo kwirwanaho yifashishije kureba amashusho.

Mu gihugu cy’u Buhinde, ni igisebo gikomeye cyane ku bagore kubyara mu gihe udafite umugabo mu buryo bwemewe n’amategeko. Abakobwa bamwe babyaye badafite abagabo bacibwa mu miryango yabo.

Nkurunziza Viateur Bwiza.com

 

 

Izindi wakunda

Bwiza.com
error: Ntibyemewe