bwiza.com
Amakuru Imikino

UCL: Ronaldo yafashije Juventus gusezerera Atletico Madrid naho Manchester City inyagira Schalke 04

Umukinnnyi rurangiranwa Christiano Ronaldo yafashije ikipe ya Juventus de Turin yo mu Butariyani gutsinda ikipe ya Atletico Madrid yo muri Espagne ibitego bitatu kubusa (3:0) bituma Juventus ikomeza muri 1/4 cy’irushanwa ry’amakipe yabaye ayambere iwayo ku mugabane w’uburayi.

Ibitego byose bikaba byatsinzwe na Christiano Ronaldo. Ni umukino watangiye ikipe ya Juventus iri gusatira mu buryo bukomeye binyuze kuri barutahizamu bayo bayobowe na Christiano Ronaldo , Mandzukic n’abandi dore ko yasabwaga gutsinda ibitego bitatu kubusa kugira ngo ikomeze muri ¼.

Juventus yari imbere y’abafana bayo, yatangiranye ishyaka ridasanzwe iziko isabwa ibitego bitatu kubusa kugirango ikomeze muri ¼ maze ifungura amazamu ku munota wa 27 w’umukino itsinda igitego gitsinzwe na Ronaldo. Ronaldo yakomeje kotsa Atletico Madrid igitutu maze ku munota wa 48 yongera gutsinda ikindi gitego cy’umutwe.

Christiano Ronaldo yashimangiye itsinzi ya Juventus ku munota wa 86 ku gitego yatsinze kuri penaliti ku ikosa ryari rikorewe umukinnyi wa Juventus Ferederico Bernardeschi mu rubuga rw’amahina.

Ikipe ya Atletico Madrid yatangiye umukino ihuzagurika ndetse ishaka no kugarira mu buryo bukomeye . Umukino ubanza wari wabereye mu gihugu cya Espagne , wari warangiye Atletico Madrid itsinze ibitego bibiri kubusa (2:0). Bivuze ko Juventus isezereye Atletico ku giteranyo cy ’ibitego bitatu kuri bibiri (3:2) mu mikino yombi.

Mu wundi mukino wabaye muri iri rushanwa wahuje Manchester City yo mu Bwongereza na Schalke yo mu Budage. Uyu mukino warangiye Manchester City inyagiye imvura y’ibitego birindwi ku busa (7:0). Manchester City ikaba yakomeje muri ¼ ku giteranyo cy’ibitego 10 :2 kuko umukino ubanza wabereye mu Budage wari warangiye Manchester City itsinze ibitego bitatu kuri bibiri.

Nkurunziza Viateur Bwiza.com

 

;

Izindi wakunda

Bwiza.com