bwiza.com
Ahabanza » Visi Perezida wa Kenya yakeje Museveni anenga ifungwa ry’umupaka wa Gatuna
Amakuru Featured Politiki

Visi Perezida wa Kenya yakeje Museveni anenga ifungwa ry’umupaka wa Gatuna

Visi Perezida wa Kenya, William Ruto yanenze icyemezo cy’ifungwa ry’umupaka uhuza u Rwanda na Uganda, avuga ko ifungwa ry’Umupaka wa Gatuna rihangayikishije akarere ndetse asaba Museveni gukomeza kureberera EAC nk’umuntu w’inararibonye bareberaho.

Dufite umupaka mu gihugu kimwe urimo gufungwa n’ikindi gihugu. Muri East Africa. Koko ?”, uyu ni William Ruto kuri uyu wa Kabiri, itariki 12 Werurwe ubwo yari mu nama yiswe Africa Now i Kampala.

Yakomeje agira ati: “Murabizi mu by’ukuri ibyo biraduhangayikishije. Twakabaye ubu turi gutekereza gukuraho impushya z’akazi. Twakabaye dutekereza uko aka karere kakwihuza neza.”

U Rwanda rukaba ruherutse kwandikira ikigo gishinzwe kwegeranya imisoro muri Uganda (URA) ruvuga ko imodoka zikoreye ibintu biremereye zigomba kuba ziretse gukoresha umupaka wa Gatuna zigakoresha uwa Kagitumba kubera imirimo y’ubwubatsi iri gukorerwa kuri uyu mupaka wa mbere.

Ikinyamakuru Chimpreports dukesha iyi nkuru kikaba kivuga ko ku mupaka wa Cyanika mu birometero 100 uvuye Gatuna, abayobozi b’u Rwanda bakubye kabiri imisoro icibwa ibicuruzwa biva muri Uganda.

Ni ku nshuro ya mbere rero umuyobozi w’umunyamahanga anenze icyemezo cy’u Rwanda.

Ruto akaba agira ati: “Tugomba gukuraho imbogamizi zose ku bucuruzi, kongera ubwisanzure bw’urujya n’uruza rw’ibicuruzwa, servisi no gukorana kw’abantu mu kugera byuzuye ku kwishyira hamwe kw’akarere.”

Visi Perezida wa Kenya yakomeje anenga abayobozi bamwe ba Afurika avuga ko badashyira mu bikorwa ibyo baba bakunze kuvuga.

Ati: “Iyo numvise abayobozi muri Afurika, buri wese avuga ururimi rwiza. Tuzi igikwiye ariko ntidukora igikwiye. Turacyafite ibibazo by’amatungo aturuka mu gihugu kimwe arimo gutezwa cyamunara mu kindi gihugu kubera ko yambutse umupaka.”

Perezida wa Uganda, Yoweri Museveni na Visi Perezida wa Kenya, William Ruto mu nama ya Africa Now

Aha Ruto urebye akaba yatungaga urutoki igihugu cya Tanzania cyakomeje gutangaza ko atari igikingi cy’amatungo y’ibihugu by’abaturanyi kubw’ibyo kikaba hari inka zaturutse muri Kenya yateje cyamunara mu buryo nk’ubu.

William Ruto kandi yakomeje asaba perezida Museveni kujya imbere umuryango wa EAC. Ati: “Nyakubahwa, uri nk’umubyeyi mu karere kacu. Tukureberaho ibijyanye n’ubuyobozi. Uri Mzee. Ntushobora gucika inshingano. Ndakubwira ibi nk’umuhungu wawe. Ugomba guha ubuyobozi East Africa ngo ikomeze kujya imbere”.

Yakomeje avuga ko abayobozi bakabaye batekereza kwishyira hamwe. Umuryango wa Afurika y’Iburasirazuba ukaba warahaye Museveni inshingano zo gutegura uko izi nzozi zo kwishyira hamwe zagerwaho.

Nubwo Visi Perezida wa Kenya atangaza ibi, u Rwanda rwakomeje gushyira mu majwi Uganda ruyishinja guhohotera no gufunga mu buryo bunyuranyije n’amategeko Abanyarwanda bajya gukorera muri Uganda. umuntu akaba yakwibaza ukuntu uko kwishyira hamwe kw’ibihugu kwagerwaho abaturage b’igihugu kimwe bibasirwa mu gihe bagiye mu kindi ku mpamvu za politiki abenshi baba badafite n’aho bahuriye nazo.

 

 

 

Izindi wakunda

Bwiza.com