bwiza.com
Ahabanza » Banki y’Isi igiye gutanga miliyari 22 z’amadorari mu guhangana n’ihindagurika ry’ikirere
Amakuru

Banki y’Isi igiye gutanga miliyari 22 z’amadorari mu guhangana n’ihindagurika ry’ikirere

Banki y’Isi igiye gutanga miliyari 22 z’amadorari mu gihe cy’imyaka itanu, mu rwego rwo gufasha umugabane wa Afurika guhangana n’ingaruka ziterwa n’imihindagurikire y’ikirere.

Umuyobozi w’agateganyo wa Banki y’isi Kristalina Georgieve yabwiye BBC ko umugabane wa Afurika ukomeje kugerwaho n’ingaruka z’imihindagurikire y’ikirere zirimo: Amapfa y’igihe kirekire, imyuzure, inkubi y’imiyaga n’ibindi.

Yagize ati’’ Niba tutubatse Afurika ikomeye, muri 2030 abaturage bagera kuri miliyoni 100 bazakomeza kuba mu bukene’’.

Uyu muyobozi kandi yatangaje ko Banki y’isi ishishikariza abantu gushora imari mu ngufu z’imirasire y’izuba. Ingufu z’imirasire y’izuba itanga 1.5% by’umuriro ukoreshwa n’umugabane wa Afurika.

Iyi nkunga itanzwe mu gihe uyu munsi hatangiye inama ya ‘One Planet Summit’ muri Kenya igamije kurebera hamwe uko umugabane wa Afurika wahangana n’ingaruka z’imihindagurikire y’ibihe no gusigasira ibidukikije.

Iyi nama irahuza prezida w’Ubufaransa Emmanuel Macron , perezida wa Kenya Uhuru Kenyatta , abakuru ba za guverinoma,abikorera ndetse na sosiyete sivile.

Imihindagurikire y’ikirere iterwa no kohereza ibyuka bihumanye mu kirere biturutse mu nganda zitandukanye ku isi, gutwika amashyamba, kurasa ibitwaro bya kirimbuza, kwangiza ibidukikije n’ibindi.

Umugabane wa Afurika wohereza mu kirere ibyuka bihumanya ikirere ku kigero cya 4% ariko niwo ugerwaho n’ingaruka zikomeye z’imihindagurikire y’ikirere.

Nkurunziza Viateur @bwiza.com

Izindi wakunda

Bwiza.com